Read njo 2 PUTIPUYANG 36 Bible Online

2 PUTIPUYANG 36 - njo bible

2 PUTIPUYANG 36

¹Idangji linük nüburi Yosia chir Yehoahaz, ania arua tebu melen Yirusalem nung chuba kümdaktsü.

²Yehoahaz chubatsü tenzükdang pa küm metsür asem liasü; aser pai Yirusalem nung ita asem chuba.

³Aser Ijip chubai paji Yirusalem nungi atsüngtok aser taribi seret semermer ozükba noklang ka aser hon seret semer ozükba ka putisü agi.

⁴ Aser Ijip chubai tenu Eliakim Yihuda aser Yirusalem madak chuba kümdaktsü, aser pa tenüng Yehoiakim ta melendaktsü. Aser Nekoi tedi Yoahaz agi aser Ijipi pa bener ao.

⁵ Yehoiakim chubatsü tenzükdang küm metsür pungu liasü; aser pai Yirusalem nung küm terka chuba; aser pai KIBUBA pa Tsüngrem madang kechi majung aji inyak.

⁶ Pa anema Babilon chuba Nebukadnezzar atu, aser Babiloni pur aotsü yinzü agi pa alen.

⁷Nebukadnezzari ano KIBUBA kidang marok-ausutem Babiloni bener ao, aser itemji par chuba kidang ayu.

⁸Tang Yehoiakim mapa tanüngbaji aser pai inyakba tesempatsütemji, aser kobasa pa dak ajitet, ajiang, itemji Israel aser Yihuda Chubatem Kaket nung zülua lir; aser par chir Yehoiakini pa melen chuba.

⁹Yehoiakin chubatsü tenzük dang küm terti liasü; aser pai Yirusalem nung ita asem ser anogo ter chuba aser KIBUBA madang kechi majung aji inyak.

¹⁰ Tanaben küm meyipa arudang Nebukadnezzar chubai KIBUBA kidang senti marok-ausutem dena, pa Babiloni bener ao, aser tenu Zedekia Yihuda aser Yirusalem madak chuba kümdaktsü.

¹¹Zedekia chubatsü tenzükdang küm metsür ka liasü; aser pai Yirusalem nung küm terka tashi chuba:

¹²aser KIBUBA pa Tsüngrem madang kechi majung aji pai inyak; Yerimia shibai KIBUBA bang nungi jembi, pa madang ajemalua maküm.

¹³ Pai Nebukadnezzar, shibai pa nem Tsüngrem tenüng nung azüngashidaktsü, pa anema noktak; saka KIBUBA Israel Tsüngrem anema pai tekong aser pa mulungjang meranga aküm.

¹⁴Tanishir putir aser nisung ajaki iba amaji onsara temulung magütsü, kintem tesempatsü mapa sülen anitaka liasü; aser KIBUBA ki koba pai Yirusalem nung meshitet aji parnoki menentsü.

¹⁵KIBUBA parnok Tsüngrem parnok dangi osang benertem, yakta shishili yokli ta asü; kechiaser pei nüburtem dak aser pa talidak pa taochi liasü:

¹⁶saka KIBUBA ain adokba parnok anema madok tashi, tanebtsü makai maküm tashi parnoki Tsüngrem osang abenertem sensatsü, aser pa otem atalatsü, aser pa ainkartem tilu.

¹⁷ Anungji pai parnok madak Kaldea nunger chuba anir aru, pai parnok asangurtem parnok temeshidak kidang nok agi lepset, aser aiür-asangur mesüra tain mesüra asar, danga taochi mesayu; parnok ajak pai pa ket nung agütsü.

¹⁸Aser Tsüngrem kidang marok-ausu ajak, tulu aser tila, aser KIBUBA kidang rongsen, aser chubar rongsen, aser par tongtipur meyong, item ajak pai Babiloni bener aru.

¹⁹ Aser parnoki KIBUBA ki arong, aser Yirusalem jara raksatsü, aser chuba ki aliba ajak mi agi rongdok, aser marok-ausu tajungbo ajak raksatsü.

²⁰Aser shirnok nok nungi jenbu, pai Babiloni bener ao; aser Persia yimli yimsüsüba matong tashi parnok pa aser par chirtem lar küma liasü.

²¹ Yerimia bang agi KIBUBA o jembiba ataloktsü asoshi, linüki pei amungnü memungi liasü. Küm neter abensadaktsütsü asoshi linükji azüng azünga toktsüba anogo ajak, linüki amungnü mamung.

²²Tang Persia chuba Cyrus mezüngbuba küm nung, Yerimia bang agi jembiba KIBUBA O ataloktsü asoshi KIBUBAi Persia chuba Cyrus tanela ajongmeso, anungji pa yimli ajak nung pai o sangdong aser züludaktsü.

²³ Yamai Persia chuba Cyrusi ashir, “KIBUBA, anüng Tsüngremi, alima yimli ajak kü nem agütsüogo, aser Yihuda nung aliba Yirusalem nung pa nem ki ka yanglutsü kü dang melaogo, nenok rongnung shirsa pa nüburtem lir, KIBUBA pa Tsüngrem pa den denangma, aser pa uludakjang.”