Read njo 2 PUTIPUYANG 4 Bible Online

2 PUTIPUYANG 4 - njo bible

2 PUTIPUYANG 4

¹ Pai yongmenyin tenladak ka yanglu; süklep metsü talang, aser lenten nung süklep metsü lenten, aser touchi nung süklep ter,

²Ano pai yongmenyin Tzüyim ka menok aji tenari liasü, külen Tzüyim ka menok; ajia tenari liasü, külen bang nungi külen bang tashi süklep ter, aser touchi nung süklep pungu, meketlung nung süklep semer.

³Iba kübok meso mesüka noksa liasü, koba agi Tzüyim meketbanga süklep ter liasü. Meso mesük noksaji taren ana nung temenok dang menoksema yanglua liasü.

⁴Aji nashi pungchi terana manung noktak, asemi anüdoklentip shia, aser asemi anüolen shia, aser asemi anüolentip shia aser asemi anüdoklen shia; aser Tzüyimji parnok madak temalen; aser parnok tatembanglak ajakji Tzüyim telunglen shia liasü.

⁵Aser aji süngtsüng tekabu ka lema liasü, aser iba bangji marok bang mesüka yanglua liasü, labu naro ka mesüka; iba nungji mori tatakzük meyi metsür pezü sema liasü.

⁶ Pai ano sujong ter yanglu, aser pungu teka tajichilen, aser pungu tabelenlen iba nung shitoktsü atema ayu; tarongba tenla atema osettem parnoki iba nung shitok; saka Tzüyimjibo putirtem shitoktsü atema liasü.

⁷ Aser pai hon agi milendong ter temelaba amato yanglu, aser pai itemji tenla kidang ayu, pungu tajichilen aser pungu tabelenlen.

⁸ Pai ano langbang ter yanglu, aser itemji tenla kidang ayu, pungu tajichilen, pungu tabelenlen. Aser pai hon susa noklang ka yanglu.

⁹Ano pai putirtem atema kilempok, aser kilempok tuluji, aser kilempok asoshi kishitem yanglu, aser item kishitem yongmenyin yangloka yanglu.

¹⁰Aser pai tzüyimji tentsü anüdoklen ki tezülen ayu.

¹¹Hurami potemji, aser tateptsü aser susatemji yanglu. Anungji Tsüngrem kidang Solomon chuba asoshi pai inyakba mapaji tatem atem;

¹²tongshi anaji, aser susatem, aser tongshibang nung aliba noksa anaji aser tongshibang noksa yokba nembangtsü temechiba ana;

¹³aser temechiba ana asoshiji jarem jang noklang pezü; temechiba shia nung jarem jang taren ana-na tongshibang nung aliba tongshibang noksa susa anaji nembangtsü asoshi.

¹⁴Pai ano tamentakdak yanglu, aser tamentakdak manung teshitokdak susatem yanglu;

¹⁵Tzüyim ka, aser iba teküboklen nashi ter-ana.

¹⁶Aser ano chipotem aser tateptsü, aser shi tushiba, aser Solomon asoshi aser KIBUBA ki asoshi yongmenyin sentsüprang agi Hurami marok ausu ajak yanglu.

¹⁷Yordan lenten nung chubai itemji, Sukkot aser Zerada tsüngda nung ajongli nung mulua yanglu.

¹⁸Solomoni item oset jenti yanglu, anungji yongmenyin touzükjibo mebushitet.

¹⁹Anungji KIBUBA kidang aliba oset ajak yanglu; hon agi yangluba tenladak, tenla kidang ayuba amtsük asoshi langbangtem,

²⁰milendong aser yimsü ozüng amato, tenla kidang telungba madang arongtsü hon temeja agi yangluba milentemji;

²¹narotem, milentem, aser mi mijeprutem, temejatiba hon agi yangluba;

²²misü enokbatem, susatem, liangmesen asoshi ausutem, misü, hon temeja agi; aser tenla ki asoshi tesembangtsütem temeshitiba taktangi ailen telungba kishitem asoshi aser tenlaki kishitem asoshi hon agi yanglu.