Read njo 2 PUTIPUYANG 5 Bible Online

2 PUTIPUYANG 5 - njo bible

2 PUTIPUYANG 5

¹ Yamai KIBUBA ki asoshi mapa ajak Solomoni inyakba renem. Aser Solomoni tebu Dawidi meshiteta ayuba osettem benden, aser taribi, hon, aser Tsüngrem kidang chipo anpo ajak rizünga ayu.

²Dawid yimti, koba Zion lir, iba nungi KIBUBA temeshi süngden bener atutsü asoshi Israel tamburtem aser kidong tongtipur ajak, Israel nunger tebou semchirtem tanishirtem Solomoni atenshidaktsü.

³Israel ajak chuba dangi ita tenetbuba benjongi atenshi.

⁴Aser Israel tambur ajak aru, aser Levitemi temeshi süngdenji bena aru.

⁵Aser süki nung aliba temeshi süngden, sentep süki, aser temeshi chipo anpo ajak parnoki bener atu, itemji Levi putirtemi bener aru.

⁶Aser Solomon chuba aser pa dangi adenshia alir Israel telokti temeshi süngden madang san aser nashi tenla jenti tepsetbaji mezüngdangteti liasü.

⁷Anungji putirtemi KIBUBA tezüngzüktepba temeshi süngdenji iba talidak, ki telungba temeshitiba taktang, cherubim tashikang küboki bener aru.

⁸Kechiyong cherubimi parnok tashikangtemji temeshi süngden alidak temalen parnok tashikang sara-a liasü, anungji cherubimi temeshi süngden aser süngra asoshi tenembangtsü ki yanglu.

⁹Aser süngratemji kanga talang asünung süngra tatemlenjibo tenla ki telungba madang temeshidak nungi ngua liasü, saka itemji kimalen nungi angutsü makok, aser tanü tashi itemji yangji lir.

¹⁰Temeshiba süngden nungji KIBUBAi Israel nüburtem Ijip nungi adokdang tezüngzüktepba yangluba koba Mosai Sinai tenem nung lungpak ana yanglu, iba dakji alaka tanga kecha maliasü.

¹¹Kodang putirtem temeshidak nungi adoka liasü; kechiyong dena alir putir ajak parnok sasa meshiteta liasü, aser parnok telemsa makai liasü;

¹²ano Levitem shirnok kentenertem liasü, parnok ajak, oda Asaf, Heman, Yehuthun, aser parnok chirtem, aser parnok adianutem, angsem sü sobur, laya aser tsürang kongki, tawaba kongki bener tenladak anüdoklen tatemlen noktak, aser parnok den putir noklang ka ser metsü jangzü apua liasü.

¹³Kodang jangzü apurtem aser kentenertem, KIBUBA tenüngsang aser tepela sayuba nung ola ka dang ama liasü; aser kodang parnoki jangzü aser laya aser ken kongkitem agi parnok ola adokdaktsü, aser KIBUBA tenüng sanga ashi, “Kechiyong pa tajung lir, kechiyong pa yimlibilem teti lir.” Idangji kiji, oda KIBUBA kiji mepet agi asüng.

¹⁴Anungji mepet alibayong putirtemi tenzüktsü menoktaktet, kechiyong KIBUBA sentsüwangshi agi Tsüngrem kiji asüng.