Read njo 2 PUTIPUYANG 6 Bible Online

2 PUTIPUYANG 6 - njo bible

2 PUTIPUYANG 6

¹Idangji Solomoni ashi, “KIBUBA, nai tammang temelem nung alitsü ta shiogo.

²Saka ni ne nem talidak ki ka, aser na teti alitsü talidak ka yanglutsüogo.”

³Idangji chubai pa tejak meyipa Israel telokti moatsü, aser Israel telokti noktak.

⁴ Aser pai ashi, “Israel Tsüngrem KIBUBA moajang, shibai pei tebang agi kübu Dawid dang jembi, aser pei teka agi atalokdakja ashi,

⁵‘Ijip lima nungi kü nübur anir adokba anogo nungi ki ka yanglutsü asoshi Israel kidong ajak nung, oda yangji kü tenüng alitsü ni yimti kecha meshimtet; mesüra kü nübur Israel madak tanishir asütsü nisung shinga meshimtet;

⁶saka ni kü tenüng lidaktsütsü Yirusalem shimtetogo; aser kü nübur Israel madak Dawid shimtetogo.’

⁷Tang Israel Tsüngrem, KIBUBA tenüng asoshi ki ka yanglutsütsü kübu Dawid mulung nung liasü.

⁸Saka KIBUBAi kübu Dawid dang ashi, Kü tenüng asoshi ki ka yanglutsü ne mulung nung aliba atemaji nai junga inyakogo,

⁹aji saka nai kiji meyanglutsü; saka ne shi aser azü nungi adokba ne jabasoi kü tenüng asoshi kiji yanglutsü.

¹⁰Aser KIBUBAi pai nangzükba oji atalokdaktsü, kechiyong kübu Dawid talidak nungi ni adoka lir, aser KIBUBAi nangzükba ama, Israel chuba menden nung amener, aser Israel Tsüngrem KIBUBA tenüng asoshi kiji yangluogo.

¹¹Aser yangji KIBUBA tezüngzüktepba koba pai Israel chirtem den yanglu aji Temeshi Süngden nung yua lir.’ ”

¹²Israel telok ajak madang KIBUBA tenladak madang pa noktak, aser pa teka songtok;

¹³kechiyong Solomoni süklep pungu talang, lenten süklep pungu, aser touchi süklep asem yongmenyin sabang ka yanglu, aser aji kilempok nung ayu; aser iba manung pa noktak. Idangji Israel sentepa alir ajak madang pai temokok agi apudak, aser pa teka anüngleni songtok,

¹⁴aser pai ashi, “Oh KIBUBA, Israel Tsüngrem, kotak nung mesüra alima nung na mesük Tsüngrem mali; ne tenzükertem shirnoki pei mulungsentsü ajak agi ne madang jajar parnok dang tezüngzüktepba benshi aser mechioktetba temeim nai sayur.

¹⁵Nai ne tenzüker kübu Dawid dang nai kechi nangzük aji inyak; hau, nai ne bang agi jembir aser tanü ne ket agi aji ataloktsüogo.

¹⁶ Tang aji asünung, Oh KIBUBA, Israel Tsüngrem, ne chirtemi pei lenmang nung nai kü madang jajaba ama kü ozüng nung kümdanga jajara, kü madang Israel chuba menden nung amentsü na kodanga nisung agi anünga malitsü, ta ne tenzüker Dawid kübu dang nai nangzükba benshiangma.

¹⁷Tang aji asü nung, Oh KIBUBA, Israel Tsüngrem, ne tenzüker Dawid dang nai jembiba ne oji akangshidakjangma.”

¹⁸ “Saka atangjila alima nung nisung den Tsüngrem lidi ma? Ajiang, anüng aser tematiba anüngi na masar; ajangla iba ki koba ni yanglu koda tila ka dang lir!

¹⁹Aji saka Oh KIBUBA kü Tsüngrem ne madang ne tenzükeri ayimtenba aser sarasademba dang anga-a, ne tenzüker sarasadem aser mepishiba dang anga-angma.

²⁰ Oda iba ki tsütsülen ammang sangwa nai ne tenüng kolen ayutsü ta ashi, ilenji ne tenük lapokangma; angji iba talidak tsütsüji ne tenzükeri sarasademba nai angashitsü akoktsü.

²¹Aser ne tenzüker aser ne nübur Israeli iba talidak tsütsülen kodang sarasademdir, parnok dang angangma. Hau, nai ne talidak, koda kotak nungi angangma; aser kodang nai angashidir, tai tokangma.”

²²“Nisung kati pei kiyonger anema temenen menara, aser pa azüngashidaktsütsüsa pa madak züngyazüngku yutsüra, aser iba kidang ne tenladak madangi pa adoka azüngashira;

²³idangji taisang mapaji pai pei kolak manung lepa bendakja, aser ochibaji kümzüka pa temeshiba yari pa nem tajangzük agüja nai kotak nungi angashiang, aser inyakang aser ne tenzüker o bendangang.”

²⁴“Ne nübur Israeli na anema temenen menaba yong parnok tsükchir madang tamakok ngura, kodang parnoki tanaben meyipdir, aser ne tenüng agizükdir, aser kodang sarasademdir aser mepishidir;

²⁵idangji nai kotak nungi angashiang, aser ne nübur Israel temenen tokangma, aser nai parnok nem aser parnok tsürabur nem agütsüba limai parnok anir arungma.”

²⁶“Kodang parnoki na anema temenen menaba yong anüng shibanga tzünglu marulir, parnoki iba talidak tsütsü sarasademra aser ne tenüng agizükra, aser parnok temenen nungi meyipra, nai parnok kodang timtem agi kangshidir;

²⁷kodang ne lenmang tajung koba nung parnok jajatsü tim, aji parnok dang nai sayudir, idangji nai kotak nungi angashiangma, aser ne tenzükertem, ne nübur Israel temenen tokangma.”

²⁸“Linük nung ayawara lira, tashitak wara, mopungra, tsünütsü tashitak, süngkusen, mesüra mesen lira; parnok yimti kar nung parnok tsükchirtemi makbangra; kechisa temerenshi mesüra kechisa shirangshiji lidir;

²⁹nisung shia pei timtem tekangshi, aser pei tejashi meteta iba ki tsütsü pei teka mekanga, kechi sarasadem aser temepishiba nisung kari mesüra ne nübur Israel ajaki yokdir;

³⁰idangji nai kotak ne talidak nungi angashiang aser tai tokang, aser nisung shia, shiba mulungjang nai meteta lir, pa pei lenmang yari agüjangma, kechiyong nai, oda nai dang, meimchir mulungjang metet;

³¹angji parnoki nai ozü tsürabur nem agütsüba lima nung kopiga lidir, parnoki ne lenmang nung jaja-a na tsübutsü.”

³²“Yamaji kodang aener ka, shiba ne nübur Israel masü, kodang pai alima talang nungi, ne tenüng tulu aser ne teka tashi tulu, aser ne tepen songtoka aliba atema arudir; kodang parnok arudir aser iba ki tsütsü sarasademdir;

³³idangji nai kotak ne talidak nungi angashiang, aser aener jagi kechi atema na jadir iba yari inyakang; angji alima nübur ajaki ne tenüng metettsü, aser na tsübutsü aser ne nübur Israeli metetba ama, ni yangluba iba ki ne tenüng agi ajar ta parnoki metettsü.”

³⁴“Ne nübur parnok tsükchirtem anema tongbangi ora, koba lenmangi nai parnok yokdir, aser iba yimti koba nai shimtet, aser ki koba ne tenüng asoshi ni yanglu, parnoki ne dangi iba tsütsü sarasademra;

³⁵idangji parnok sarasademba aser parnok temepishiba nai angang aser parnok asoshi inyakangma.”

³⁶“Parnoki na anema temenen menara, kechiyong temenen memenaba nisung shinga mali aser nai parnok dang ain adoka aser tsükchir nem bendanga agüja, iba yongji alinük talangkati mesüra ana nung pur oa lira;

³⁷aji saka koba li nung parnok pua ali, parnok sasa bilemtetra aser meyipra, aser parnok puoka aliba lima nung ne dangi temepishiba yoka, ‘Onoki temenen menaogo, onoki mashileni ao aser tamajung inyakogo’ ta shira;

³⁸parnok tepuokdak linük koba nung parnok pua oa ali idakji temulungjang ajak agi aser parnok tanela ajak ne dangi meyipra, aser par linük koba nung parnok pur oa ali idakji temulungjang ajak agi aser parnok tanela ajak ne dangi meyipra, aser par linük tsütsü sarasademra, koba nai par tsürabur nem agütsü, aser yimti koba nai shimtet, aser ne tenüng asoshi ni yangluba ki tsütsülen sarasademra;

³⁹idangji parnok sarasademba aser parnok temepishiba, nai kotak nungi, oda ne talidak nungi angashiangma, aser parnok asoshi tim mapa sota aser na anema temenen menaba ne nübur dang tai tokangma.

⁴⁰Tang, Oh kü Tsüngrem, ni ne dang mepishir, idaki sarasademba dangi ne tenük lapokang, aser ne narong tenjang.

⁴¹Aser tang aramesoang, Oh KIBUBA Tsüngrem, aser ne anisüngzükdaki oang, na aser ne tashi tulu Temeshi Süngden ne putirtem, Oh KIBUBA Tsüngrem, tekümtet agi sobudakjang, aser ne temeshi puri na ajungba nung pelashishidakjang.

⁴²Oh KIBUBA Tsüngrem, nai mezütsüba tejak meyipa tuodaktsü! Ne tenzüker Dawid asoshi ne mechiokba temeim bilemtetangma.”