Read njo 2 PUTIPUYANG 8 Bible Online

2 PUTIPUYANG 8 - njo bible

2 PUTIPUYANG 8

¹Küm metsü tatembang nung, koba nung Solomoni KIBUBA ki aser par ki yanglu,

²Hirami pa nem agüja aliba yimtitem Solomoni yanglushi, aser Israel nübur item nungji lidaktsü.

³Solomon Hamath-zobai ao aser aji agi.

⁴Arem nung pai Tadmor yanglu aser Hamath nung terizüngdak yimtitem pai yanglu.

⁵Pai ano Beth-horon yimbang aser yimlang yanglu, jara, süngkhüm, aser tartangtsü agi yimtitem atsütanga ayu,

⁶aser Balath, aser Solomoni yangluba terizüngdak yimti ajak aser pa talungtsütem asoshi yimti ajak, kor temeranger asoshi yimtitem, aser Yirusalem nung, aser Lebanon nung, aser pa yimli ajak nung kechisa Solomoni aginü aji yanglu.

⁷Het nunger, Amor nunger, Periz nunger, Hiv nunger, aser Yebus nunger anünga alirtem, shirnok Israel nunger masü,

⁸parnok sülen linük nung tokja aliba parnok chirtem, shirnok Israel chirtemi mesamatsü, parnok nungi Solomoni putisü ka agi, aser yamaji tanü tashi lir.

⁹Saka Israel chirtem nungibo Solomoni pa mapa asoshi kilir mekümdaktsü; saka parnok raratem, aser par arkotong rongnung tongti, aser par talungtsü aser pa kor temeranger madak yimsüsürtem liasü.

¹⁰Aser itemi Solomon chubar sosang tongtipur liasü, noklang ana ser tenem, parnoki nisungtem madak yimsü asü.

¹¹Solomoni Farao jala Dawid yimti nungi pai la asoshi yangluba kidangi anir aru, kechiyong pai ashi, “Kübutsü Israel chuba Dawid kidang malitsü, kechiyong KIBUBA temeshi süngden arua alidakjibo temeshi lir.”

¹²Idangji Solomoni KIBUBA tenladak koba pai kilempok madang yanglu yangji tarongba tenla KIBUBA nem agütsü;

¹³ anogo shia inyaktsü tenüngdaktsü amato, Mosai melaba ama amungnü, ita tasen, aser küm shia benjong asem, piyazü meinokba amtsük benjong, hapta benjong, aser tekülemdak süki benjong.

¹⁴Tebu Dawid yimsü ozüng amato, parnok mapa asoshi putirtem telemsa pai shimtet, aser anogo shia teinyaktsü tenüngdaktsü aliba ama, Levi putirtem madang tasangtsü aser tenzüktsü mapa asoshi, aser süngkhüm asoshi süngkhüm anükertem parnok telemsa nung; kechiyong Tsüngrem nisung Dawidi yamaji mela.

¹⁵Aser kechisarena indang aser terizüngbatem indang chubai kechi putirtem aser Levitem dang mela, iba nungi parnoki atsünga mao.

¹⁶KIBUBA ki kimung yangerba anogo nungi aji merenem tashi Solomon mapa ajak yamai renem. Yamaji KIBUBA ki takok ngua renem.

¹⁷Idangji Edom linük nung, tzüyimküm nung Eziongeber aser Elothi Solomon ao.

¹⁸Aser Hirami pa dangi pa tenzükertem ajanga rongtem aser tzüyim indang metetba tenzükertem yok, aser Solomon tenzükertem den külemi parnok Ofiri ao, aser yang nungjagi hon seret semermer ozükba noklang pezü aser tenem bena aru aser Solomon chuba dangi aji bener aru.