Read njo 2 PUTIPUYANG 9 Bible Online

2 PUTIPUYANG 9 - njo bible

2 PUTIPUYANG 9

¹ Kodang Sheba chubatsüri Solomon nüngsang angashi, Yirusalem nung tasüngdangba tasak agi Solomon tendangtsü asoshi telok tulu anir, teronem menemba abenba uttem, aser hon jenti sentilung bener la aru; aser kodang la Solomon dangi aru, lai pa den la mulungjang nung aliba ajak jembitep.

²Aser Solomoni la tasüngdangba ajak la dang ashi; aser Solomoni la dang mashiba kecha miima mali asü.

³Kodang Sheba chubatsüri Solomon shisatsü, aser pai yanglua aliba ki,

⁴pa chiyungtsü langbang, par kilirtem amenba, par tenzükertem, aser parnok sobutsü; ano pa marok abenertem, aser parnok sobutsü; aser KIBUBA kidangi koda pa atur aji angudang joko lai kecha tashitsü makai liasü.

⁵Lai chuba dang ashi, “Ozü lima nung ne mapatem aser ne shisatsü indang ni angashiba osang atangji liasü:

⁶aji saka ni parnok oji ni maru tashi, aser kü tenük agi mangu tashi ni mamang; aser ajiang, ne shisatsü uluba tesadanga kü dang meshi-i liasü; kechiyong ni angashiba nüngsang nungi na alema lir.

⁷Ne nüburtem tepelatsü, aser item ne tenzüker tepelatsü, shirnoki ne madang maneni noktaker, aser ne shisatsü angashir.

⁸KIBUBA ne Tsüngrem temoatsü sang, shibai KIBUBA ne Tsüngrem asoshi chuba asütsü, pa chuba menden nung na mendaktsütsü ne dak pela-a liasü, parnok teti asoshi yutsütsü, aji asünung pai pa parnok madak o bendangtsü aser ochi inyaktsü chuba kümdaktsü.”

⁹Lai chuba nem hon seret semermer ozükba noklang ka ser metsü, aser teronem menemtsü jenti, aser senti lung agütsü: ano Sheba chubatsüri Solomon chuba nem teronem menemba agütsüba amaji kecha nunga maliasü.

¹⁰Ano Hiram tenzükertem aser Solomon tenzükertem, shirnoki Ofir nungi hon bener aru, algum süng aser senti lungtem bener aru.

¹¹Chubai algum süng agi KIBUBA ki aser chubar ki asoshi taren küma jenjang yanglu, aser kentenertem asoshi tzürang kongki aser tawaba kongkitem yanglu; aser Yihuda lima nung akhidang ibala kecha mungudang.

¹²Solomon chubai Sheba chubatsür nem lai aginüba ajak, lai kechisa asüngdang, lai chuba dangi bener aruba dak alema agütsü. Anungji la meyip aser la tenzükertem lar limai meyipa shilang.

¹³Tang küm ka nung Solomon dangi aruba hon seret semermer ozükba noklang trok ser roker-trok liasü;

¹⁴aji shishir aser shidi abenertemi bener aruba medeni liasü. Aser Arabia chuba ajaki, aser linük governortemi Solomon dangi hon aser taribi bener arutsü.

¹⁵Solomon chubai hon agi atsüngba jong tulu noklang ana yanglu; jong shia nung hon shekel noklang trok liasü.

¹⁶Pai hon agi atsüngba jong noklang asem yanglu; jong shia nung hon shekel noklang asem sem agi; aser chubai Lebanon arem ki nung itemji ayu.

¹⁷Chubai ano shidipu chuba menden tulu ka yanglu, aser aji hon temeja agi yangbang.

¹⁸Aji chuba menden nungji metenloka liasü, aser tip anatsülen teben atalokdak aser molusongzü anasa noktaka liasü.

¹⁹Aser jenjang trok manungji jenjang ka ka tatemlen shia nungji molusongzü terana noktaka liasü; aser kecha chuba yimli nung ibaji mesükabo maliasü.

²⁰Aser Solomon chuba tajemba marok ajak hon liasü, aser Lebanon arem ki marok-enrok ajak hon temeja liasü. Solomon tendakbo taribiji kecha züngshia maliasü.

²¹Kechiyong chubaji Hiram tenzükertem den Tarshisi aoba rongtem liasü; küm asem shia khen Tarshis rongtem hon, taribi, shidipu, shingo aser juju ozü bener aru.

²²Anungji rongsen aser shisatsü nung Solomon chuba alima chuba ajak dang temaba liasü.

²³Aser alima chuba ajak Solomon madangi pa mulung nung Tsüngremi enoktsüba shisatsü angadangtsü bushia aru,

²⁴aser parnok nisung shiai pei sempet, taribi marok, ausu, hon marok, süoshi, nok o nü, teronem menemtsü, kor, aser gado, küm shia paikaji angu.

²⁵ Aser kor aser talungtsütem asoshi Solomon ki meyi pezü liasü, aser kor, temeranger meyi terana, parnokji pai talungtsü yimtitem nung aser Yirusalem nung chuba den lidaktsü.

²⁶ Aser pai chuba ajak madak Eufrata nungi Filistia linük tashi, aser Ijip litsü tashi yimsü asü.

²⁷Aser chubai Yirusalem nung taribiji lung ama, aser cedar süngji Shefela mungudong süng ama talubosa kümdaktsü.

²⁸ Aser Solomon asoshi Ijip nungi aser linük ajak nungi kor bener aru.

²⁹Tang Solomon mapa tanüngba tetenzük nungi tatem tashi, ainkar Nathan otsü nung, aser Shilo nunger Ahijai shinba nung, aser Nebat chir Yeroboam mapang tangur Iddo mangdang nung zülua melika ma?

³⁰Solomoni Yirusalem nung Israel ajak madak küm lir chuba.

³¹Solomon tebu nunger den mejang, aser tebu Dawid yimti nung arem; aser par chir Rehoboami pa melen chuba.