Read njo EZRA 3 Bible Online

EZRA 3 - njo bible

EZRA 3

¹Kodang ita tenetbuba aru, aser Israel nunger yimtitem nung liasü, nisungtemi parnok sasa nisung ka amai Yirusalemi sentep.

² Idangji Yozadak chir Yeshua, aser pa adianu putirtem, Shealtiel chir Zerubbabel, aser pa adianutem noktak, aser Tsüngrem nisung Mosa ozüng nung zülua aliba ama, parnoki Israel Tsüngrem tenladak, iba manung tarongba tenla tenlatsü asoshi yanglu.

³ Parnok meketa aliba nisungtemji parnoki tsübua liakasa, parnoki tenladak kimungji yanglu, aser iba manung parnoki KIBUBA nem anepdang aser aonung shia tarongba tenla agütsü.

⁴ Aser zülua aliba amato. Parnoki semtu benjong amung, aser yimsü ozüng amato yongsük agi anogo shia tarongba tenla, tenüngdaktsü yari tenla.

⁵ Iba sülenji maneni tarongba tenla, ita tasen tenla, lemteta aliba KIBUBA nem bendanga agütsüba benjongtem, aser nisung shia shirnoki temulunger tenla tenlaba parnoki amshi.

⁶Ita tenetbuba mezüng anogo nungi parnoki KIBUBA nem tarongba tenla tenlatsü tenzük; saka KIBUBA tenla ki kimungbo ano meyangeri liasü.

⁷Parnoki ano lung mistri nem, aser süng mistri nem sen agütsü, aser chiyungtsü, tajemtsü aser totzü, Sidon nunger aser Tair nunger nem, Lebanon nung cedar süng tzüyimi, Yoppa leni, Persia chuba Cyrus nungi parnoki temelaba anguba ama, bener arutsü asoshi agütsü.

⁸Tang Yirusalem nung Tsüngrem ki dangi parnok aruba tanabuba küm nung ita tanabuba nung, Shealtiel chir Zerubbabel, Yozadak chir Yeshua aser tanüngba parnok adianu putirtem aser Levitem, aser tepuokdak nungi Yirusalemi adoker ajaki mapaji tenzük; aser KIBUBA ki mapa reprangtsü atema, Levitem küm metsü nungi temalen parnoki shimtet.

⁹Idangji Tsüngrem kidang mapa inyakertem reprangtsü, Yeshua aser par chirtem aser adianutem, Kadmiel aser par chirtem, Yihuda chirtem den külemi noktak’ aser Henadak chirtem, parnok chirtem aser parnok adianu Levitem dena noktak.

¹⁰ Kodang kisürtemi KIBUBA ki kimungji yanger, putirtem pei sobutsü sobur jangzü amdaktsü, aser Asaf chir Levitem, Israel chuba Dawidi melaba ama KIBUBA asangtsü laya amdaktsü.

¹¹ Aser parnoki kati ka dang KIBUBA tenüng sanga aser tepela sayua ashi, “Kechiyong pa tajung lir, kechiyong Israel tsütsü pa yimlibilem teti alir.” Aser kodang parnoki KIBUBA tenüng asang, nisung ajaki ola tulu agi ayimten, kechiaser KIBUBA ki kimungji yangera liasü.

¹²Saka putirtem aser Levitem aser kidong tongtipur aser tamburtem mezüng yangluba ki angurtemi parnok nükdang iba ki kimung yangerba ngua ola tulu adoka ajeb; aser aikati tepela agi ayimten.

¹³Anungji nisungtemi tepela agi ayimtenba ola o tajepba ola naji mebendangteti liasü, kechiaser nisungtemi ola tulu agi ayimten, saka olaji talang nungia angashia liasü.