Read njo EZRA 4 Bible Online

EZRA 4 - njo bible

EZRA 4

¹Kodang Yihuda aser Benjamin anemertemi KIBUBA, Israel Tsüngrem nem tenla ki ka, meyipa aruba tepuokba chirtemi yangludaki ta angashi,

² idangji parnoki Zerubbabel dangi aser kidong rongnung tongtipur dangi aru aser parnok dang ashi, “Nenok den onoki külemi yangludi; kechiyong nenok amaji onoki ner Tsüngrem külemer; aser onokia Asiria chuba Esarhaddon, shibai onok yagi anir atu, iba anogo nungi pa nem tetepsetba tenla agütsür.”

³Saka Zerubbabel, Yeshua aser tanüngba Israel kidong rongnung tongtipuri parnok dang ashi, “Ozü Tsüngrem nem ki ka yanglutsü onok den nenok kecha tenüngdaktsü maka; saka Persia chuba Cyrusi onok dang melaba ama, onok sasa dang KIBUBA, Israel Tsüngrem nem yanglutsütsü.”

⁴Idangji linük alirtemi Yihuda purtem tasü meiti kümdaktsü, aser ki yanglutsü tsübua parnoki kümdaktsü,

⁵aser parnok sentong meyipsatsütsü parnok anema ozüng shitetertem ao, aser Persia chuba Cyrus anogo tepiyong, oda Persia chuba Dairus chubaba tashi minprung.

⁶ Ahasuerus chuba dang, pa chubaba tetenzük nungi parnoki Yihuda aser Yirusalem alirtem anema tai agüja zülu.

⁷Artazerkzes tendak Bishlam, Mithredat, Tabeel aser tanüngba parnok medemertemi Persia chuba Artazerkzes dangi zülu; shitiji Aramaic o nung zülu aser meyipzük.

⁸Temeranger walunir Rehum aser tezülur Shimshai-i Yirusalem anema Artazerkzes chuba dangi yamai zülu;

⁹idangji temeranger walunir Rehum aser Shimshai tezülur, aser parnok medemertemi zülu; “Dinai nunger, aser Afarsat nunger, Tarpel nunger, Afarsi nunger, Arkhevi nunger, Babilon nunger, Shushan nunger, Debhai nunger aser Elam nunger,

¹⁰aser tanüngba kintem shirnok tulusang aser tamarener Ashurbanipali anir aru, aser Samaria yimti nung toktsü, aser Eufrata ayong atener aliba tanüngba linük nung, aser yamaji.”

¹¹Aser iba shiti ya parnoki Artazerkzes chuba dangi yok; “Eufrata ayong atener aliba lima nung alir ne tenzükertemi ne dangi salem yoker.

¹²Na nungi atuba Yihuda nunger onok dangi Yirusalemi arua lir ta chubai metetangma; parnoki teküptep aser tamajung yimti yangludagi aser jara renemdagi, aser kimung yanglushidagi.

¹³Chubai ya metetangma, oda iba yimti ya yanglura aser jaratem renemra, parnoki ali melen sen mesüra apu sen magütsütsü, aser tatem nungbo iba yagi chubatem meyong ali melen lendong kümdaktsütsü.

¹⁴Tang onoki chubar metsü achibayong, chuba maksü repranga alitsü onok asoshi tim masü nung, aji onoki yokogo aser chuba dang kuli agütsür;

¹⁵oda nebu nunger kaket nung züluba bushiteptsü asoshi; zülua ayuba kaket nungji nai iba yimti ya teküptep yimti, chubatem aser province asoshi majung, aser akhidang nungi iba yimti nung parnoki linük anema adok ta metettsü; iba yongji iba yimti raksatsü.

¹⁶Iba yimti yanglura aser jaratem renemra, iba tetezü ayong atenerbo na shilem makatsü, ta chuba dang onoki kuli agütsür.”

¹⁷Idangji chubai langzü, “Temeranger walunir Rehum aser tezülur Shimshai dangi aser tanüngba parnok medemer Samaria nung alir dangi, aser ayong atena aliba tanüngba linük dangi salem,

¹⁸koba shiti nenoki onok dangi yok, kü madang jangja-a züngogo.

¹⁹Ni ozüng ka agütsü, aser bushitepogo aser iba yimti akhidang nungi chubatem anema adok, aser teküptep aser linük anema iba nung adok ta nguogo,

²⁰Ayong atener aliba linük ajak madak ano yimsü süa Yirusalem madak chuba tulutem liasü; aser parnok nem ali melen, aser sen saru balala agüja liasü.

²¹Ni ozüng ka meyanglu tashi iba yimti meyanglutsü nenoki item nisung anentsü ozüng agüjang.

²²Aser iba nung nenok anüanüa teli; aser kechiba chuba akoksatsüsa teraksa adokdaktsütsü?”

²³Kodang Artazerkzes chubai zülubaji Rehum aser Shimshai madang aser parnok medemertem dang azüng, parnoki ilunga Yirusalemi Yihuda nunger dangi ao, aser parnoki tashiyim agi mapaji anendaktsü.

²⁴Idangji Tsüngrem ki mapa Yirusalem nung alibaji anenadok; aser aji Persia chuba Darius chubaba küm tanabuba tashi anena ali.