Read njo EZRA 5 Bible Online

EZRA 5 - njo bible

EZRA 5

¹ Tang ainkartem, Hagai aser Iddo chir Zekariai, Israel Tsüngrem shiba parnok madak liasü pa tenüng nung Yihuda aser Yirusalem nung alir Yihuda nunger dang shina jembi.

² Idangji Shealtiel chir Zerubbabel aser Yozadak chir Yeshua arameso aser Yirusalem nung aliba Tsüngrem tenla ki yanglushitsü tenzük; aser parnok den yaria, Tsüngrem ainkartem liasü.

³Iba mapang nung ayong atener aliba province nung governor Tattenai aser Shethar-bozenai aser parnok medemertem parnok dangi aru aser yamai parnok dang ashi, “Shibai nenok dang iba ki yanglutsü aser renemtsü mela?”

⁴Parnoki ano asüngdang, “Iba ki yanglur tenüngtem shibasa?”

⁵Saka par Tsüngrem tenükji Yihuda nunger tamburtem madak liasü, aser Darius dangi iba indangji tonga maru tashi, ajiser iba indang shiti agi telangzüba memeyiptsü tashi, parnoki parnok manendaktsü.

⁶Ayong atener aliba governor Tattenai aser Shethar-borzenai, aser ayong atener aliba par medemer nungi Dairus chuba dangi yokba shitiji ibai liasü.

⁷Parnoki pa dangi shiti ka yok, kechi nung yamai zülua liasü; “Darius chuba dangi, ajak yimjung sangma.

⁸Ya chubai metetangma oda onok Yihuda province-i aser Tsüngrem tulusang tenla kidangi ao; lung tulutem agi ibai yangludagi, jara nung süngpak yokdagi, aser mapaji lema lema parnok ket nung azükarua odagi.

⁹Yangji tamburtem dang onoki asüngdang, shibai nübur nem iba ki yanglutsü, aser iba jara renemtsü ozüng agütsü?

¹⁰Onoki parnok dang parnok tenüng oda parnok tanishirtem tenüng onoki zülua ne nem metetdaktsütsü asoshi asüngdang.

¹¹Aser parnoki onok dang yamai langzüa ashi, ‘Onok anüng ali Tsüngrem tenzükertem lir, aser akhidang yangluba ki ka koba Israel chuba tulu kati yanglu aser renem, iba ki tanaben onoki yanglushidagi.’

¹² Saka ozü tsüraburi anüng Tsüngrem jashidakja ain adokdaktsü nung, pai Kaldi nunger Babilon chuba Nebukadnezzar ket nung agütsü, pai iba ki raksatsü, aser nisungtem Babiloni bener oadok.

¹³ Saka Babilon chuba Cyrus mezüngbuba küm nung, Cyrus chubai iba Tsüngrem ki yanglutsü ozüng agütsü.

¹⁴Ano pai Tsüngrem kidang hon aser taribi chipo-anpotem koba Nebukadnezzari Yirusalem nung aliba tenla ki nungi bener oa liasü, aser Babiloni tenla kidangi bener aru, item chipo-anpo Cyrus chubai Babilon tenla ki nungi agizük, aser itemji nisung ka tenüng agi Sheshbazar nem bendanga agütsü, shiba pai governor kümdakja liasü;

¹⁵aser pai pa dang ashi, Item chipoanpo bener oang, Yirusalem nung aliba tenla kidang yuang, aser Tsüngrem kiji iba talidak yangluang.

¹⁶Idangji Shesh-bazari aru, aser Yirusalem nung aliba Tsüngrem ki kimung yanger, aser iba mapang nungi tang tashi yangluyonga aru, aser ano aji merenem lir.

¹⁷Anungji chuba madang junger süra, Cyrus chubai Yirusalem nung iba Tsüngrem ki yanglutsü asoshi ozüng yanglu asü meyanglu, aji chubar terizüngdak bushidakjang, aser iba indang chubai aginüba onok dang metetdakjangma.”