Read njo EZRA 6 Bible Online

EZRA 6 - njo bible

EZRA 6

¹Idangji Darius chubai ozüng ka yanglu, aser kaket terizüngdak Babilon nung yua alidak bushitep.

²Aser Ekbatana nung, Media province nung chuba kidang shikeplong ka angu, aser yangji yamaji zülua ayuba angu,

³“Cyrus chuba mezüng küm nung Cyrus chubai ozüng ka yanglu; Yirusalem nung Tsüngrem ki indang, kiji yangludakjang, aji parnoki tetepsetba tenla tenladak, aser iba kimung tashi ita azüngdakjang, iba touchi nung süklep roker, aser iba lenten süklep roker;

⁴lung tulu taren asem, aser süngpak taren ka, aser teindokba senji chubar kidang nungi agütsüdakjang;

⁵Ano Yirusalem nung aliba tenla ki nungi Nebukadnezzari agizüka Babiloni bener aruba Tsüngrem kidang aliba hon aser taribi chipo-anpotemji, tanaben shia agüjang aser Yirusalem nung aliba tenla kidangi bener oang aser pei talidak yujang; aser itemji Tsüngrem kidang ayutsüla.”

⁶“Anungji tang ayong atener aliba governor Tattenai, Shethar-bozenai, aser ne medemertem shirnok ayong atena oa lir, nenok idak nungjagi pila-a liang.

⁷Iba Tsüngrem ki mapa oda tokjang, aser Yihuda nunger governor aser Yihuda nunger tamburtemi iba Tsüngrem ki pa talidak yangludakjang.

⁸Ano iba Israel Tsüngrem ki yanglutsü asoshi item Yihuda nunger tambur dang nenoki kechi inyaktsü ni ozüng ka yanglur; chubar osettem nungi, aser oda ayong atena oa aliba putisü bendenba nungi, oda parnok metitemtsü asoshi item nisung nem mapang shitak nung teindokba sen agüjang.

⁹Aser kechisa parnok tenüngdaktsü lir, nashi pongtu, san tepung aser san anüng Tsüngrem nem tetepsetba tenla nung arongtsü asoshi, wheat tsük, metsü, yi aser totzü Yirusalem nung putirtemi meshiba ama metitemi anogo shia agüjang;

¹⁰angji parnoki anüng Tsüngrem nem teronem tanang tetepsetba tenla agütsütsü asoshi, aser chuba taküm aser par jabasotem asoshi sarasademtsü.

¹¹Ano ni ozüng ka yangluogo, oda shibaisa iba ozüng melenshidir, par kidang nungi bembi ka atsütetdakjang, pa ajongmesor angji alenlokang; aser iba asoshi par ki rüjalung kümdakjang.

¹²Tsüngrem shibai pei tenüng yangji yua lir, nübur mesüra kin kobai iba ozüng melenshidir mesüra iba Tsüngrem ki Yirusalem raksatsütsü merangdir Tsüngremi endokadokangma. Ni Dariusi ozüng ka yangluogo; aji shitak dang inyakdakjang.”

¹³Idangji ayong atena oa aliba Tattenai governori, Shethar-bozenai aser parnok medemertemi, Darius chubai ozüng yokba ama yamaji ajak kümdanga inyak.

¹⁴ Aser ainkar Haggai aser Iddo chir Zekariai shinba ajanga Yihuda nunger tamburtemi yanglu aser azükarua aküm. Aser Israel Tsüngremi melaba ama, aser Cyrus, Darius aser Persia chuba Artazerkzes ozüng amato, parnoki yanglu aser aji renem.

¹⁵Aser iba ki Adar ita tasemnü nung renem, koba Darius chubai chubaba küm trokbuba nung liasü.

¹⁶Israel chirtem, putirtem, Levitem, aser pur aoba chirtem tanüngba puri, iba Tsüngrem ki meshitetba tepela agi amung.

¹⁷Aser iba Tsüngrem ki meshitetba nung parnoki nashi pungchi noklang ka, san tepung noklang ana, san chanu noklang pezü agi tenla; aser Israel ajak asoshi temenen tenla atema, nabong tepung terana, Israel kidong terana asoshi tenla.

¹⁸Aser Mosa kaket nung zülua aliba ama parnoki putirtem parnok telemsa, aser Levitem pei mapa ama, Yirusalem nung Tsüngrem mapa asoshi toktsü.

¹⁹ Ita mezüngbuba anogo terpezünübuba nung pur aoba chirtemi Süia Aoba Benjong amung.

²⁰Kechiyong putirtem aser Levitemi parnok sasa külemi merükteter liasü; parnoki pur aoba chir ajak asoshi aser parnok adianu putirtem asoshi, aser parnok pei asoshi Süia Aoba Benjong san chanu tepset.

²¹Aser Israel chirtem tepuokdak nungi tanaben adokertem, aser linük nung mamangba pur memerükba nungi shirnoki Israel Tsüngrem KIBUBA bushitsü asoshi pila-a ali parnok ajaki achi,

²²aser piyazü meinokba am benjong tepela agi anogo tenet amung; kechiyong KIBUBAi parnok peladaktsü, aser parnok ket nung Israel Tsüngrem tenlaki mapa nung tashi itdaktsütsü parnok dangi Asiria chuba mulung meyipdaktsü.