Read njo EZRA 7 Bible Online

EZRA 7 - njo bible

EZRA 7

¹Tang item süleni, Persia chuba Artazerkzes chuba alidang, Seraia chir Ezra, Azaria chir, Hilkia chir.

²Shallum chir, Zadok chir, Ahitub chir,

³Amaria chir, Azaria chir, Maraiot chir,

⁴Zerahia chir, Uzzi chir, Bukki chir,

⁵Abishua chir, Finehas chir, Eleazar chir, Aron putir chir.

⁶Iba Ezra Babilon nungi atu; aser Mosa ozüng nung pa tetangshi tezülur ka liasü; koba KIBUBA Israel Tsüngremi agütsü; aser KIBUBA, pa Tsüngrem pa dak alinungji, pai asüngdangba ajak chubai mela.

⁷Artazerkzes chuba küm tenetbuba nung, Israel chirtem kar, putirtem, Levitem, kentenertem, kishinükertem, aser tenla ki tenzükertem Yirusalemi atu.

⁸Aser pa Yirusalemi ita pungububa nung aru, koba chuba küm tenetbuba nung liasü,

⁹Kechiyong ita mezüngbuba mezüngnü nung pai Babilon nungi atutsü tenzük, aser aji ita pungububa anogo mezüngnü liasü. Pa Tsüngrem taochi teka pa madak liasü.

¹⁰Kechiyong Ezrai KIBUBA ozüng bushitsü aser aji inyaktsü, aser Israel nung telatet ozüng aser o bendang sayutsü pai temulung toka liasü.

¹¹Tang putir Ezra, tezülur aser KIBUBA ozüng nung aser Israel nem agütsüba telatet ozüng nung tetangshi, pa nem Artazerkzes chubai agütsüba shitiji ya:

¹²“Artazerkzes chubatem madak chubai, Ezra putir, anüng Tsüngrem ozüngtem tezülur dangi:

¹³tang ni ozüng ka yanglur, oda Israel nübur kari, mesüra kü yimli nung parnok putirtem aser Levitem, shibai Yirusalemi aotsü mulunga lir, ne den aotsü akok.

¹⁴Kechiaser chubai aser par shisa agütsür teneti Yihuda aser Yirusalem indang ne ket nung aliba ne Tsüngrem ozüng amato bushiteptsü yoka lir,

¹⁵aser chuba aser pa shisa agütsürtemi Israel Tsüngrem, shiba Yirusalem nung alir, pa nem mulungsoa taribi aser hon agütsüba bener aotsü,

¹⁶aser nai Babilon province ajak nung anguba taribi aser hon, nübur aser putirtemi mulungben tenla, parnok Tsüngrem ki, koba Yirusalem nung lir, iba asoshi tenla dena bener aotsü;

¹⁷aji asünung nai kanga nentaka iba sen agi nashi pungchi, san tepungtem, san chanutem, parnok chiyungtsü tenla aser tajemtsü tenla alitsü, aser Yirusalem nung aliba ne Tsüngrem ki tenladak parnok tenlaang.

¹⁸Aser tanüngba taribi aser hon jagi ne madang aser ne adianutem madang kechisa inyaktsü junger ta bilemer, aji nenoki Tsüngremi mulungba ama inyakang.

¹⁹Aser chipoanpo ne Tsüngrem ki mapa asoshi ne nem agütsübaji nai Yirusalem Tsüngrem madang bendanga agüjang.

²⁰Aser ano ne Tsüngrem ki asoshi kechisa tenüngdaktsü lir, aji nai chubar senpung nungi agüjang.”

²¹“Aser ni oda Artazerkzesi ayong atener alir senyur ajak dangi ozüng ka yanglur, oda Ezra putir, anüng Tsüngrem ozüng züluri kechisa nenok nungi tenüngdaktsü kümdir, aji yakta inyakang,

²²taribi seret semermer ozükba noklang ka tashi, wheat tsük tatak noklang ka tashi, aser yi mori noklang ka tashi, aser totzü mori noklang ka tashi aser metsü kwika ta mezüngdangi agüjang.

²³Anüng Tsüngremi kechisa melar, shitak yamaji dang anüng Tsüngrem ki asoshi inyakdakjang; kechiyong kechiba chuba aser pa chirtem yimli madak kechiba Tsüngrem terasaba lidaktsütsü?

²⁴Ano ya onoki melar, putirtem, Levitem, kentenertem, kishinükertem tenla kidang alirtem, mesüra iba Tsüngrem kidang tenzüker kar dang danga ali melen, putisü, akhangtsü ozüng mali.”

²⁵“Talisa, Ezra, nai Tsüngrem shisatsü ne dak aliba yari inyakang, ayong atener alir nübur ajak o bendangtsü governor aser obendangertem shimtetang, oda ne Tsüngrem ozüng meteter ajak; aser item memeteter dang nai sayuang.

²⁶Aser shibaisa ne Tsüngrem ozüng aser chuba ozüng mebenshilir, pa madak o bendang shitak agüjang, tasütsü süshia, linük nungi aridoktsü süshia, osettsüset rakzükba süshia, mesüra tepuokdak ayutsü süshia.”

²⁷Ezrai ashi, “KIBUBA asen tsürabur Tsüngrem temoatsü sang, shibai iba amai chuba mulungjang nung, Yirusalem nung aliba KIBUBA ki tobur jungdaktsütsü asoshi enoktsü;

²⁸aser kü dang chuba aser par shisa agütsürtem madang, aser chubar tulur tanishirtem madang taochi sayu. Aser KIBUBA teka kü madak aliba yari nai tashi itdaktsü, aser ni Israel nungi tongtipur kü den atutsü külemi aniten.”