Read njo EZRA 8 Bible Online

EZRA 8 - njo bible

EZRA 8

¹Tang Artazerkzes chuba tendak kidong tongtipur kü den Babilon nungi atur parnok jakzükbatem itemi lir.

²Finehas kidong nungi Gershom; Ithamar kidong nungi Daniel; Dawid kidong nungi Hattush.

³Shekania kidong nungi; Parosh kidong nungi Zekaria, aser pa den parnok tebur noklang ka ser tenem yongsük nung dena liasü.

⁴Pahath-moab kidong nungi Zerahia chir Elihoemai, aser pa den tebur noklang ana.

⁵Shekania kidong nungi Yahaziel chir aser pa den tebur noklang asem.

⁶Adin kidong nungi Yonathan chir Ebed, aser pa den tebur tenem.

⁷Elam kidong nungi Athalia chir Yeshaia aser pa den tebur neter.

⁸Shefatia kidong nungi Mikal chir Zabadia, aser pa den tebur tir.

⁹Yoab kidong nungi Yehiel chir Obadia, aser pa den tebur noklang ana ser terti.

¹⁰Shelomit kidong nungi Yosifia chir, aser pa den tebur noklang ka ser roker.

¹¹Bebai kidong nungi Bebai chir Zekaria, aser pa den tebur metsür ti.

¹²Azgad kidong nungi Hakkatan chir Yohanan, aser pa den tebur noklang ka ser ter.

¹³Adonikam kidong nungi, tesüsa arurtem, itemi parnok tenüng lir: Elifelet, Yeuel, Shemaia, aser parnok den tebur roker;

¹⁴aser Bigvai kidong nungi Uthai aser Zabbud aser parnok den tebur neter.

¹⁵Ni parnok Ahava leni yima aoba ayong nung sentepdaktsü, aser yangji onok anogo asem liasü; aser ni nisungtem aser putirtem reprangdang nung Levi nungi jakzükbatembo mali asü.

¹⁶Idangji ni Eliazar, Ariel, Shemia, Elnathan, Yarib, Elnathan, Nathan, Zakaria aser Meshullam tongtipur tajai yok; ano Yoiarib aser Elnathan shirnok tangatetertem liasü,

¹⁷ni parnok Iddo, shiba Kasifia nung tongtiba liasü, pa dangi yok; aser Iddo aser par adianutem tenla kidang tenzükertem Kasifia nung alir dang kechi parnoki ashitsü aji shiok, oda parnoki ozü Tsüngrem ki asoshi tenzükertem anir arutsüla.

¹⁸Aser ozü Tsüngrem teka tajung ozü den dena alibayong parnoki onok dangi Mahli nungi jakzükba atong ala akaba nisung ka anir aru, Levi chir Israel chir; aser Sherebia, par chir aser adianu terti,

¹⁹aser Hashabia, aser pa den Yeshaia Merari nungi jakzükba aser pa adianu metsü

²⁰aser tenla ki tenzükertem shirnok Dawid aser tongtipuri Levi nunger mapa asoshi agütsü, noklang ana ser metsü parnok ajak tenüng teta aja.

²¹Idangji Ahava ayong nung, oda ozü Tsüngrem madang onok sasa ajemalutsü, aser pa nungi onok asoshi aser onok chirnur asoshi aser ozü oset ajak asoshi lenmang tindang ka bushitsü ni telumiba ka ayongzük.

²²Kechiyong lenmang nung tsükchirtem anema onok yaritsü chuba nungi temeranger telok aser kor temerangertem meshitsü ni akseta liasü; kechiyong onoki chuba dang ashi, “Tajung asoshi shirnoki pa bushir ajak den ozü Tsüngrem teka dena lir; saka pa ain aser pa terasaba pa sentoker ajak madak lir.”

²³Anungji onoki lumi aser iba asoshi ozü Tsüngrem bushi aser onoki mepishiba pai anga.

²⁴Putir tongtipur terana ni bendanga ayu, oda Sherebia, Hashabia, aser parnok den par adianu ter,

²⁵aser parnok nem taribi, hon, aser chipo-anpo, oda ozü Tsüngrem ki asoshi tenla koba chuba, aser par shisa agütsürtem aser par tongtipur aser yangji dena alir Israel ajaki tenla-a liasü, aji ozüka agütsü.

²⁶Ni parnok ket nung taribi seret semermer ozükba noklang trok ser tenem, taribi chipo-anpo seret semermer ozükba noklang ka; aser hon seret semermer ozükba noklang ka;

²⁷hon susa metsü, hon sen meyi ka jenjang; aser hon ama senti, yongmenyin tajung sentsüprang marok ana agütsü.

²⁸Ni parnok dang ashi. “KIBUBA dang nenok temeshi lir aser marok-enroktem temeshi lir: aser taribi aser honji KIBUBA nenok tsürabur Tsüngrem dang temulunger tenla lir.

²⁹Nenoki puti-ungertem, Levitem aser KIBUBA tenla ki taktangtem nung Israel kidong tekolaktem madang itemji seret ozüka magütsü tashi itemji nenoki reprangang aser nükang.”

³⁰Anungji putir aser Levitemi Yirusalem ozü Tsüngrem kidangi itemji bener arutsü taribi aser hon aser chipo-anpotem touzükji agizük.

³¹Idangji onoki Yirusalemi aotsü, ita mezüngbuba anogo teranabuba nung Ahava ayong nungi aenshia ao; aser ozü Tsüngrem teka onok madak liasü, aser tsükchir aser lenmang nung mita alir ket nungi pai onok kümzük.

³²Onok Yirusalemi aru, aser yangji anogo asem amung.

³³Pezünübuba nung taribi hon aser chipo-anpotemji Uria putir jabaso Meremot ket nungi ozük; aser pa den Finehas chir Eleazer liasü; aser parnok den Yeshua chir Yozabad, aser Binnui chir Naodia, Levi nunger liasü;

³⁴ajongaji züngdanga aser ozüka agizük; aser touzükba ajakji iba mapang nung zülua ayu.

³⁵Tepuokba chirtem, shirnok bendanglen tepuokdak nungi aru, parnoki Israel Tsüngrem nem tarongba tenla agütsü. Israel ajak asoshi nashi pungchi terana, san tepung tukur trok san chanu neter tenet, temenen tenla asoshi nabong tepung terana; item ajak KIBUBA nem tarongba tenla agütsü.

³⁶Parnoki ano chubar temelabaji chubar yimsüsür nem, aser ayong külen aliba governortem nem agütsü; aser parnoki nisungtem aser Tsüngrem ki nung teyari agütsü.