Read njo NEHIMIA 1 Bible Online

NEHIMIA 1 - njo bible

NEHIMIA 1

¹Hakalia jabaso Nehimia o. Tang Shushan nung ni chuba kidang küm metsübuba alidang, Kisliv ita nung atalokba,

²kü adianu rongnung Hanani aser pa medemer kar Yihuda lima nungi kü dangi aru; aser ni parnok dang Yihuda nunger tanüngba, shirnok pua anir aoba nungi jentet, parnok aser Yirusalem indang asüngdang.

³Parnoki kü dang ashi, “Pua bener or anünga aliba purtem iba linük nung timtem tulu aser maksü tia nung lir: Yirusalem yimti jara lokshia ogo aser iba süngkhüm mi agi rongtokogo.”

⁴Kodang item o ni angashi, ni amen aser ajeb aser anogo ishika mang ayim; aser ni lumi aser kotaker Tsüngrem tsüngdang sarasadem aser ashi,

⁵“Oh, KIBUBA, kotaker Tsüngrem, tulusang aser tetsübutsü Tsüngrem, shibai pa meimer dang aser pa ozüng benshir dang tezüngzüktepba aser taochi sayur;

⁶ne tenzükeri sarasademba angashitsüsa yimlibilema ne tenarong tenangma aser ne tenük lapokangma; tang sarasadem ya ammang sangwa shia ni ne dangi yoker, ibaji ne tenzüker Israel chirtem asoshi, Israel chirtemi inyakba tai koba onoki na anema inyakogo. Ya ni ne tsüngdang nangzüker; hau, ni aser kübou kidongi tai menaogo.

⁷Onoki na anema teraksa jenti inyakogo, aser ne tenzüker Mosa dang koba ozüngtem, telatet ozüngtem, aser obendangba kechi nai mela, itemji onoki timi mebenshi.

⁸ Ni mepishir, nai ne tenzüker Mosa dang, nenoki tai menara ni nenok nübur rongnung ayimsünga perokshidaktsütsü, ta mela-a ashiba o bilemtetangma.”

⁹ “Saka nenoki kü dangi meyipa arura aser kü ozüngtem yura aser benshira sentoka yutsüba nüburji talangtiba linük nung oa liaka, ni parnok yang nungjagi anitentsü aser ni kü tenüng ayutsü shimtetba linük bushia parnok anitentsü.

¹⁰Itemi ne tenzüker aser nübur lir, shirnok nai ne tashi tulu aser ne tashi tait teka agi alangzüka ayu.

¹¹Oh KIBUBA, ni ne dang mepishir, tang ne tenzükeri sarasademba aser ne tenüng tsübutsü jangrar ne tenzükertem sarasadem nai angangma. Ni ne dang sarasademer, iba anogo nung nai ne tenzüker azükarua lidakjang aser iba nisung tsüngdang pa taochi ngudakjangma.” Tang ni chubar marok amsang liasü.