Read njo NEHIMIA 13 Bible Online

NEHIMIA 13 - njo bible

NEHIMIA 13

¹ Iba anogo nungji parnoki telok tsüngdang Mosa ozüng kaket nungi azüng aser idakji Ammon aser Moab nunger kodanga Tsüngrem tenla kidang sentepdaki arutsü makok ta zülua liasü.

² Kechiyong parnoki Israel chirtem den am aser tzü bener arua majurutep; saka parnok anema atakatem o ashitsü atema parnoki Balaam nem taa agütsü; aji saka ozü Tsüngremi atakatemji temoatsü kümdaktsü.

³Kodang parnoki ozüngji angashi, idangji meyoktepa aliba telok ajakji Israel nunger nungi lemdang.

⁴Iba tejaklen, putir Elisahib, shiba Tsüngrem ki taktang ajak madak kibur shimtet, shiba Tobia den adianu kümer liasü,

⁵taktang tulu ka, kong akhidang chiyungtsü tenla, liangmesen, marok aser su, ter shilem tenla tsük, yi, aser totzü ayudak, Levi nunger nem, kentener o kiküm anüker nem ozüng agi bendenba aser temeranger tenla putir asoshi bendenba, item ajak yua liasü.

⁶Iba mapang ajak nung ni Yirusalem nung maliasü; kechiaser Artazerkzes Babilon chuba küm semer anabuba nungi ni chuba dangi ao aser anogo ishika lir külen ni chuba dang soti asüngdang,

⁷aser ni Yirusalemi arur külen Eliashib-i Tsüngrem kidang taktang ka agütsüba ajanga Tobia asoshi kechi tai inyak aji ni angatet.

⁸Iba jagi ni kanga jashi, anungji ni Tobia osettsüset ajak taktang nungjagi endok.

⁹Idangji ni ozüng agütsü aser parnoki taktangji merüktet; aser Tsüngrem kidang ayuba marok o su, ano chiyungtsü tenla o liangmesen ajak tanaben iba taktang jagi ni bener aru.

¹⁰ Levi nunger nem parnok shilem magütsü ta ni angu, anungji Levi nunger aser kentenertem parnok mapa toktsür nisung shia pei lui meyipa liasü.

¹¹Idangji ni yimsüsürtem arüja ashi, “Kechiba nenoki Tsüngrem ki sentoka toktsür?” Aser ni parnok ajak tanaben aniten aser nisung shia pei mapa nung toktsü.

¹² Idangji Yihuda nunger ajaki ter shilem tenla tsük, yi, aser totzü terizüngdaki bener aru.

¹³Aser ni putir Shelemia, tezülur Zadok, aser Levi rongnung Pedaia ta terizüngdak ketdangpur südaktsü, aser parnok kübok teyarir asütsü Mattania jabaso Zakur chir Hanan shimtet; kechiyong parnok dak tamang kateta liasü, aser adianutem nem lemsa-a agütsütsübaji parnok mapa liasü.

¹⁴Oh kü Tsüngrem, iba mapa asoshi ni bilemtetangma, aser kü Tsüngrem ki asoshi ni inyakba mapa tajung aser ni anebalubaji nai taidoktsüma.

¹⁵ Item anogo nung Yihuda lima nung kari amungnü tsükmenatzü menüngba, tsükpong abenba aser gado nem khu oshitsüba ni angu; ano yi, tsükmenatzü, mungozünu aser tanga khu jenti amungnü nung Yirusalemi bener aruba ni angu; aser ni iba anogo nung chiyungtsü ayokba noktang.

¹⁶Ano idakji Tair nunger shir liasü, parnokia amungnü ango aser tanga oset tapu jenti bener arua Yihuda nunger dang aser Yirusalem nung yokli ta asü.

¹⁷Idangji ni Yihuda nunger tongtipur arüja ashi, “Nenoki amungnü menendakja kechiba temenen mapa ya amshir?

¹⁸Nenok tsüraburia yamai tamajung meinyak no? Aser ibayongji asen dangi aser iba yimti dangi item timtem tia Tsüngremi bener marutsü no? Aji saka ano nenoki amungnü raksaba ajanga timtem tali Israel dangi bena arutsüogo.”

¹⁹Kodang Yirusalem süngkhüm amungnü tejaklen nikongdangji mangsema kümdir, süngkhüm kishi ajak shibangtsü aser amungnü anogo mesüi tashi melapoktsü ni ozüng mela, aser kü tenzüker kar süngkhüm kishi anüker südaktsü aser kechi khu südir saka amungnü mebenokdaktsü.

²⁰Idangji shiti bener aser oset ajak shishilembartemji Yirusalem jara temalen nung khen anaben ka tashi atadaktsü.

²¹Idangji ni parnok dang ashi, “Kechiba nenoki jara anasa mena kazür? Nenoki tanaben yamaisa anenra ni nenok dak teka sangshitsü.” Iba sülenbo parnoki amungnü maru.

²²Aser ni Levi nunger dang, parnok pei sasa meshitettsüla ta aser amungnü meshiteta ayutsü asoshi parnoki süngkhümji anüktsüla ta ozüng mela. Oh kü Tsüngrem, ya asoshia nai ni bilemtetangma aser ne temeim tulu agi ni kümzükangma.

²³ Ano iba mapang nungsa Yihuda nungeri Ashdod, Ammon aser Moabtsür den kibalembuba ni angu,

²⁴aser parnok chirnur tesadangi Ashdod oshi jembi, aser Yihuda nunger oshi mejembitet, saka kin shiai pei oshi jembi.

²⁵Aser ni parnok den atitep aser atakatem aser kar dakbo tazüka azük, aser ku a pidoktsü; aser Tsüngrem tenüng nung yamai shia nangzükdaktsü, “Nenoki nenok jala parnok jabasotem asoshi magütsütsüla, mesüra parnok jala nenok jabasotem asoshi, aser nenok pei asoshi magitsüla.

²⁶ Israel chuba Solomoni iba ama mapa inyakba ajanga tai bena maru no? Aji saka kin jenti rongnung pa mesük shinga chuba mali asü, aser Tsüngremi pa dang meim aser pa Israel ajonga madak chuba kümdaktsü aji saka pa-a bendangtsür ajanga temenen menadaktsü.

²⁷Ajangla onoki nenok dang bendangtsür ajanga asen Tsüngrem dang tai menatsü aser iba ama tamajung mapa inyaktsü shidi ma?”

²⁸ Yehoiada semchir rongnung ka, putir tazüng Eliashiber jabaso, Horon nunger Sanballat tanük liasü; anungji ni pa kü tsüngdang nungi aridok.

²⁹Oh Tsüngrem, parnok bilemtetangma, kechiyong parnoki putir menden, Levi nunger aser putir tezüngzüktepba menena kümdaktsüogo.

³⁰Yamaji ni parnok ajak bendanger nungi bendanga aser meshiteta kümdaktsü, aser putir o Levi nunger pei mapa nung amtakdaktsü.

³¹Aser süng tenla aser mezüng süngjang tenla asoshi mapangji lemtet. Oh kü Tsüngrem, teti asoshi nai ni bilemtetangma