Read njo NEHIMIA 2 Bible Online

NEHIMIA 2 - njo bible

NEHIMIA 2

¹Artazerkzes chuba küm metsübuba, Nisan ita nung, kodang yi pa jakdang yua liasü, aji ni bena aru aser chuba nem agütsü. Iba tejaklen chuba tsüngdang ni kodanga jashia mesayudang.

²Aser chubai kü dang ashi, “Na shiranger masü nung kodaser ne tejak mesangwa? Ya tanga kecha masü, saka temulung nung tejashi aliba yong.” Idangji ni kanga tsübua liasü.

³ Aser ni chuba dang ashi, “Chuba arishia liangma. Kodang kübu aremdak yimti lokshia or teraksa tia nung ali aser yimti jara aser süngkhüm ajak rongsar ali, idangji ni tejashi tejak meteni koda litet?”

⁴Idangji chubai kü dang ashi, “Nai kechi asüngdangner? Anungji ni kotaker Tsüngrem dang sarasadem,”

⁵aser ni chuba dang ashi, “Chubai mulungra aser ne tenzükeri mepishibaji tim ta bilemra, kübou nunger aremdak yimti Yihuda lima jagi, teraksa yanglushitsü ni yoktsü mela-angma.”

⁶Aser chubai kü dang langzüa ashi, (chuba tebutsüa anasa mena liasü) “Ne lenmangji kopiga aotsü aser na kodang meyipa shilangtsü?” Chubai ni yoktsü mulung nung ni mapangji lemtet.

⁷Ano ni chuba dang asüngdang, “Chubai mulungra ayong külen alir governortem dangi temelaba shiti, ni Yihuda lima matong tashi ajanga süitsü mela-ang ta zülutsütsü mepishir.

⁸Ano chubar min repranger Asaf dangi, tenlaki mitsa süngkhüm, yimti jara, aser ni alitsü ki item ajonga yanglushidang agitsü tongnü, aser tenüngdaktsü süng ajak kü dang melatsü asoshi shiti ka chubai zülutsütsü mepishir.” Aser Tsüngremer taochi kü teka madak lia kü tenüngdaktsü ajak chubai melatet.

⁹Idangji ni ayong külen alir governortem dangi ao aser chuba shiti parnok dang sayu. Chubai ni miena temeranger aser kor tanishirtem yok.

¹⁰Saka kodang Horon nunger Sanballat aser Ammon nunger Tobia tenati Israel nunger anebalutsü nisung ka arudagi ta angashia kanga dang jashi.

¹¹Idangji ni Yirusalem tonga aru aser idakji asemnü ali.

¹²Aser ni ammang nung apuso aser nisung kar kü sülen anitak. Yirusalem asoshi kechisa inyaktsü Tsüngremi kü mulung nung apuoktsü, aji ni shinga danga mashi aser ni amenba shiruru alema tanga shiruru kü den maliasü.

¹³Ni ammang nung lenten süngkhüm, shirong tzübu alidak aser jana süngkhüm tsütsü leni ao aser teraksa Yirusalem jaratem aser idakji terongsa süngkhümtemji benzüa reprang.

¹⁴Iba sülen ni tzüpokdak süngkhüm aser chuba awatsüng tonga ao; saka idakji ni amenba shiruru süitsü lenmang mali asü.

¹⁵Idangji ni ammang nung ayong kati alu aser jaraji benzü, aser ni tanaben lenten süngkhüm leni meyipa shilang.

¹⁶Aser ni kolenisa ao, kechi mapasa inyak tanishirtemi memetet; kechiaser iba indangji ni ano Yihuda nunger, putir, tamarener, yimsüsür, aser tangar nisung shinga danga ano mashi.

¹⁷Idangji ni parnok dang ashi, “Nenoki asenok temenen tia nung aliba angur, koda Yirusalem raksa-a aser iba süngkhüm rongsa-a lir; arung, Yirusalem yimti jaratemji asenoki yanglushidi, aji süra asenok maksü nung malitsü.”

¹⁸Aser kü Tsüngremi kü dang ajungba aser chubai kü dang ashiba o ajak ni parnok dang ashi. Idangji parnoki ashi, “Arung, asenok apusodi aser kiji yanglushidi.” Idangji mapa tajung asoshi parnok tashi ita aküm.

¹⁹Saka kodang Horon nunger Sanballat, aser Ammon nunger Tobia aser Arab nunger Geshem, parnoki ya angashi, idangji onok menüja atala aser ashi, “Nenoki inyakba ya kechi? Nenok chuba anemer asü?”

²⁰Idangji ni parnok dang langzüa ashi, “Kotaker Tsüngremi onok yaritsü; anungji onok pa tenzükertem aka-asoa kiji yanglutsü, saka Yirusalem nung nenok shilem nenok khonang, aser tenüngsang kecha malitsü.”