Read njo NEHIMIA 4 Bible Online

NEHIMIA 4 - njo bible

NEHIMIA 4

¹Saka kodang onoki jaraji yanglushidaki ta Sanballati angashi, pa ain adoka jashi aser Yihuda nunger atala-a menütsü.

²Aser pai pa adianutem aser Samaria temeranger telok dang jembia ashi, “Item tashi mait Yihuda nunger kechi inyaker? Parnoki parnok sasa noktangtettsü no? Parnoki taküm tenlatetdi ma? Nangtena aliba terongsa nangtenba nungi lungtemji tasen küma parnoki yanglushitetdi ma?

³Tang pa anasa Ammon nunger Tobiai ashi, Parnoki koba yangluya ali, shirong ka tura, lung jaraji chirepa laotsü!

⁴Angangjo, Oh Tsüngrem, kechiyong onok sensatsüogo; parnok tatala oji meyipa par kolak nung enokjang, aser parnokji alar putendak linük nung rakzükraktem asütsü agüjang;

⁵parnok taiji nembanga teyu, aser parnok temenen ne jakdang taidokma; kechiaser parnoki kisür tsüngdang ain adoka na sensatsüogo.”

⁶Aji oda onoki jaraji yanglu aser jara ajakji ajurutepa azük tesadang shi tua yanglu; kechiyong nisungtemi inyaktsü mulungtet.

⁷Saka kodang Sanballat, Tobia, Arab nunger, Ammon nunger, aser Ashdod nungeri, Yirusalem jara yanglushiba mapaji maneni, aser raksa-a aliba yanglushidagi ta angashi, idangji parnok kanga ain adok;

⁸aser parnok ajak külemi miima kibok nung ayongteper Yirusalem anema raratsü aser idakji meputep adokdaktsütsü tasa yanglu.

⁹Saka onoki ozü Tsüngrem dang sarasadem, aser ammang sangwa maneni parnok anema miter ayu.

¹⁰Yihudai ashi, “Khu benloka alirtem tashi ajema kümdagi aser teraksa ano jenti anünga lir, anungji jaraji asenoki meyanglushimatsü.”

¹¹Ano onok tsükchiri yamai ashi, “Asenoki parnok alidak tiyong tonga mao tashi aser parnok tepseta mapaji manendaktsü tashi parnoki memetettsü aser mangutsü.”

¹²Idangji parnok anasa alir Yihuda nungertemi onok dangi atua terbena ashi, “Nenok kolenisa meyipdir, parnoki nenok amaktsü.”

¹³Anungji ni jara tezülen tarokdak, moapu nung, nisungtem parnok kibong dena aniten aser nisung shia nok-nü aser lijak amdaktsü.

¹⁴Ajiser ni reprang aser noktak aser tamarener, yimsüsür aser nütsüngtem dang ashi, “Nenoki parnok tsübua teli, KIBUBA shiba tulu aser tetsübutsü lir pa bilemtetang, aser nenok adianu, nenok jabaso-jalatem, nenok kinungtsür aser kibong asoshi rara-ang.”

¹⁵Kodang onoki ibaji metetogo ta tsükchiri angashi, aser Tsüngremi parnok tasa tazüngla kümdaktsü, onok ajak jara jagi meyipa aru aser nisung shia pei pei mapa nung sotak.

¹⁶Iba mapang nungi tenzüker kü nütsüng tesadang mapa inyakdaktsü aser parnok tesadang nü, jong, lijak, aser merang sobutsü peria sobu; aser yimsüsürtem Yihuda kin ajonga sülen noktakdaktsü.

¹⁷Shir jara yanglu, aser shir khu abener, nisung shia teka külen mapa nung sot aser külen nok o nü aben.

¹⁸Kisürtema nisung shia nok ka ka anasa ayu.

¹⁹Aser tamarener, yimsüsür, aser nütsüng dang ni ashi, “Mapa teinyaktsü tulu aser prokshia lir, aser jara tepiyong asenok ka o ka na tsüngda nung talanglang pilar lir.

²⁰Na kechi nung lidir liaka kodang jangzü ola angashidir, idangyongji onok alidak bushia nenok sentepang; asen Tsüngremi asen asoshi raratsü.”

²¹Anungji onok mapa nung sotak aser parnok rongnung tesadang ka anepdang anü adokli nungi petinu madok tashi nü amer ata-a ali.

²²Idangjisa ni nütsüng dang ashi, “Nisung shia Yirusalem süngkhüm kübok pei tenzüker ka den anenang; parnokji aonung asen madak miter asütsü aser anüngdang mapa inyaktsü.”

²³Anungji ni asüyonga, kü adianu aser tenzükertem mesüra kü sülen anidaker mitertem asüyonga, onok shingaia süoshi magizüki nisung shiai tzübui aodanga nok o nü bener dang ao.