Read njo NEHIMIA 5 Bible Online

NEHIMIA 5 - njo bible

NEHIMIA 5

¹Tang nübur rongnung, kinungtsür dena, parnok adianu Yihuda nunger anema ola tulu ka adok.

²Parnoki yamai shia liasü, “Asenok aser asen jabaso jala jenti kümogo; asenok chiyunga taküm alitsü atema tsük bendendi.”

³Ano kari yamai ashi, “Asen lu, tsükmenatzü lu, aser ki dena temelen agütsüdagi; anungji ayawara asoshi aseni tsük bendendi.”

⁴Ano kari yamai ashi, “Tsüklu aser tsükmenatzü lu atema chuba nem alimelen agütsütsü onoki sen apu.

⁵Saka tangbo onok shi onok adianu shi ama, onok chirnur parnok chirnur den saku liaka, aji saka ajiang, onok jabaso-jala alar akümtsüsa onoki anir arur; jala karbo talenba tiai bener aruadokogo; parnok alangzüktsü onok dak tashi mali; kechiyong onok ai aser tsükmenatzü lu tangar ket nung lir.’

⁶Kodang ni parnoki anema asatepa olaji angashi ni ain kanga adok.

⁷ Idangji ni kü sasa bilemdanger tamarener aser yimsüsürtem arüja ashi, “Nenoki tashi tali amshia nenok adianu shia nungi sentem tali agi.” Aser ni parnok anema mungdang tulu ka jazük.

⁸Aser ni parnok dang ashi, “Onok tashi yari onoki pei adianu Yihuda nunger tangar kin dang yokadoker aliba alangzükogo. Ajangla nenoki onok dang yokdi ma?” Idangji parnok süngjema aküm aser ola kata madok.

⁹Ano ni ashi, “Nenoki inyakba mapaji tajung masü; tsükchiri asen mesensatsütsüsa nenoki Tsüngrem tsübuba nung jajatsü tim masü no?

¹⁰Ano ni, kü adianu aser tenzükertemi parnok nem sen aser tsük aputsür. Yimlibilema sentemtsütem asenoki agiendi.

¹¹Ni mepishir, nenoki agia aliba parnok tsüklu, tsükmenatzü lu, oliv lu, aser ki, ano noklang shilem nung sen, ano tsük, yi aser totzü, nenoki agia aliba ajakji tanüsa meyipa shilangjang.”

¹²Idangji parnoki ashi, “Onoki aji meyipa agütsüdi, aser nai ashiba ama onoki parnok nungi kecha tali magitsü.” Ni putirtem jaok aser tanishirtemi nangzükba amaji azüngashidaktsü.

¹³Ano ni kü sü temdoka ashi, “Shibai tenangzükba mebenshilir, nisung shia yamai pei ki aser mapa nungi Tsüngremi temdoktsü aser tazüngla kümdaktsütsü.” Aser sentepa alir ajaki ashi, “Amen”, aser KIBUBA tenüng asang. Aser nüburtemi nangzükba amaji inyak.

¹⁴Ano Yihuda lima nung ni governor shimtetba mapang nungi Artazerkzes chuba küm metsü buba nungi semer ana buba, aji küm terana, ni aser kü adianutemi governor chiyungtsü mechiyungdang.

¹⁵Saka kü jakdang governor shir liasü, parnoki nübur nungi jenjang tali agi, oda alimelen taribi sen lir agir-ang ano amtsük aser yi parnok nungi akang; hau, oda parnok kübok tenzükertemia nübur madak tashi tali amshi; saka nibo yamaji mebenshi, kechiaser ni Tsüngrem tsübu.

¹⁶Hau, ano ni iba jara yanglushiba mapa nung maneni sotak; onoki ali terakata alizüka mayu, saka kü tenzüker ajak külemi senteper mapa inyak.

¹⁷Ano kü chiyungba langbang nung, anasa alir bendanger shir onok dangi aru, parnok alema, Yihuda nunger aser yimsüsür nisung noklang ka ser tenem liasü.

¹⁸Anogo ka atema chiyungtsü renemdang, nashi pungchi ka aser teshimtet san trok; ano an-a ishika dena ni asoshi renemli asü, aser anogo ter shia yi tapu ajak rizünga yutsüli ta asü. Saka ni governor chiyungtsü kodanga makang, kechiyong iba nübur madak talenba süngra reta benloka liasü.

¹⁹Oh, kü Tsüngrem, nübur asoshi ni kechi inyak, ya asoshi ni bilemtetangma.