Read njo NEHIMIA 6 Bible Online

NEHIMIA 6 - njo bible

NEHIMIA 6

¹Kodang jaraji renemogo, joko teraksa anünga mali ta Sanballat, Tobia, Arab nunger Geshem aser tanüngba tsükchirtemi angazük, iba mapang nungji ano süngkhüm nung kishi meinoki liasü,

²Sanballat aser Geshem nati kü dangi osang yoka ashi, “Arung asenoki Ono lenten nung yim ka nung külemi ajurutepdi.” Saka parnoki kü dak majung inyaktsü bilem.

³Anungji parnok dang osang bener yoka ashi, “Ni mapa tulu ka inyakdagi anungji ni alutsü makok, ni nenok dangi alutsü atema koda mapaji titema ayutsü?”

⁴Pezüben tashi yamajisa parnoki kü dangi yok, saka ni telangzüba kasa agütsü.

⁵Ano punguben buba Sanballati tenzüker ka shiti lapoka[1] bener kü dangi yok, koba nung ya zülua liasü:

⁶“Kintem dangi iba osang ya aru aser Geshemi aji oda ashi, oda nai aser Yihuda nungeri anemtsü bilemer, ibayongji nai jaraji yangludaki, aser iba osang angashiba agi na parnok chuba asütsü.

⁷Ano Yihuda lima nung chuba ka lir ta Yirusalem nung ne indang sangdongtsü asoshi nai ainkar shimtet; aser iba osangji tang chuba dangi abentsüla. Anungji arung asenoki külemi lemtepdi.”

⁸Idangji ni pa dangi yoka ashi, “Nai ashiba ama inyakba mapa kecha mali, saka ne sasa purateta ashir dang.”

⁹Kechiyong parnok ajaki onok tsübudaktsüdi sür yamai ashi, “Parnok tekaji mapa nung tashi meiti akümtsü, aser aji mekümtettsü.” Saka Oh, Tsüngrem, nai kü teka tashi itshia kümdakjang.

¹⁰Ni Mehetabel chir Delaia jabaso Shemaia, shiba ki shibanger ali, par kidangi ao. Pai ashi, “Asenoki Tsüngrem kidang külemi ajurutepdi aser kishiji shibangdi; kechiaser parnok arua na tepsettsü; hau, parnoki aonung arua na tepsettsü.”

¹¹Idangji ni ashi, “Ni ama nisung kati yamaji ajentsü no? Aser ni amala nisung shibai pei taküm kümzüktsü asoshi tenla kidang jenoktsü? Ni aji agi maitsü.”

¹²Ajiang, ni metet, Tsüngremi pa meyok, saka pai ni anema jembitsü Tobia o Sanballat nati pa nem süpokrem agütsü.

¹³Yamaji ni tsübudaktsütsü aser tetsübu nung tai menadaktsütsü aser ni anema tamajung osang kar parnoki ngutettsü aser ni atalatsü asoshi tasa agi pa mesüzük.

¹⁴Oh Tsüngrem, Tobia o Sanballat nati inyakba mapa, aser ainkarlai Noadia den tanüngba ainkartem ni tsübudaktsütsü kechisa inyakogo, ya nai bilemtetangma.

¹⁵Yamaji jaraji anogo tenem ser ana nung, Elul ita metsür pungunü buba nung renem.

¹⁶Kodang tsükchiri ya angashi, meketa alir kin ajaki onok tsübu aser mereprangnüi aküm, kechiaser ya Tsüngrem mapa ta parnoki angatet.

¹⁷Iba mapang nungji Yihuda nunger tamarener nungi Tobia dangi shiti aika yok aser Tobia nungia yamaji parnoki angu.

¹⁸Kechiaser pa Ara jabaso Shekania tanük liasü, aser pa jabaso Yehohanani Berekia jabaso Meshullam jala agiba yong, Yihuda nung pa tsüngdang azüngashia nangzüker jenti liasü.

¹⁹Parnoki pa mapa tajung indang kü dang ashi, aser kü indanga parnok dang oa ashi. Aser Tobiai ni tsübudakja shiti züluli asü.