Read njo NEHIMIA 8 Bible Online

NEHIMIA 8 - njo bible

NEHIMIA 8

¹Kodang ita tenetbuba atong aser Israel nüburtem pei pei talidak mesemteter liasü, nübur ajonga nisung ka ama Tzü Süngkhüm jakdang tesadem moapu nungji senten. Parnoki tezülur Ezra dang Mosa ozüng kaket, koba KIBUBAi Israel nem agütsü, aji bener arutsü ashi.

²Aser ita tenetbuba mezüng anogo nung, angateta angashitsü akoker tetsür tebur sentena aliba mungdang jagi putir Ezrai ozüng kaketji bener aru.

³Aser Tzü Süngkhüm jakdang tesadem moapu nung adenshia aliba tangatetba pur tsüngdang anepdang nungi anjong tenari dang tashi pai ozüngji azüng aser iba ozüng kaket azüngdang nisung ajaki tenarong tena anga.

⁴Tezülur Ezra süng sabang ka manung noktak aser pa tajichilen Mattithia, Shema, Anaia, Uria Hilkia, aser Maaseia noktak; pa tabelen nung Pedaia, Mishael, Malkija, Hashum, Hashbaddana, Zekaria, aser Meshullum noktak.

⁵Aser Ezrai kaketji nisung ajaki ngua lapok kechiyong pa ajak madak temaba nung noktaka liasü aser kodang pai aji lapok, nisung ajak noktak.

⁶Aser Ezrai tulusang KIBUBA Tsüngrem moatsü aser nisung ajaki teka mekanga “Amen, Amen” ta langzük; aser parnok tejak alilen shir apudaka KIBUBA külem.

⁷Ano Yeshua, Bani, Sherebia, Yamin, Akkub, Shabbethai, Hodia, Maaseia, Kelita, Azaria, Yezabad, Hanan, Pelaia aser Levitemi nübur dang ozüngji angajemdaktsü, aser nüburtem pei talidak noktak.

⁸Aser Tsüngrem ozüng kaket nungi jangja janga-a azüng; aser parnoki tetezü ratettsü,[2] anungji tazüngbaji nisungtemi angatet.

⁹Idangji governor Nehemia, tezülur aser putir Ezra, aser Levi nunger shirnoki nüburtem sayu, parnoki nübur ajak dang ashi, “Nenok Tsüngrem KIBUBA tsüngdang tanü temeshi anogo lir, anungji nenoki tejeb mesüra mang teyim.” Kechiaser ozüng o angashi dang nisung ajaki ajeb.

¹⁰Idangji pai parnok dang ashi, “Nenok oang, temo chiang aser yi tanangji jemang, aser renema malir asoshi shilem kar tenla bendakjang, kechiaser KIBUBA tsüngdang tanü temeshi anogo lir; nenok jashia telima, kechiaser KIBUBA tepelaji nenok tashi lir.”

¹¹Anungji Levi nungeri nübur ajak süngjema kümdakja ashi, “Nenok ajem ajema liang, kechiaser tanü temeshi anogo lir; nenok jashia telima.”

¹²Aser nisung ajak chia ajemtsü parnok ao, kechiaser parnok dang sangoktsüba oji parnoki angatet.

¹³Tananübuba nung kin ajak nungi tongtipur, putir aser Levi nunger, parnok ajak tezülur Ezra dangi ozüng oji bushitsü senten.

¹⁴ Aser KIBUBAi Mosa dang melaba ozüng nung parnoki yamai zülua angu; Israel chirtem tenetbuba ita benjong nungji semtu nung alitsüla

¹⁵Aser yimti ajak nung aser Yirusalem nung parnoki yamai sangdongtsüla, “Tenem jagi tuang aser zülua aliba ama semtu yanglutsü atema oliv kongsang, aser arem oliv kongsang, asang aser myrtel kongsang aser süngo melema aketba süngdong kongsang zülua aliba ama semtu yanglutsü bendenang.”

¹⁶Anungji nüburi or item osetji bener aruagi nisung shia pei kilem manung, kima nung, aser Tsüngrem tenla ki kima nung, Tzü Süngkhüm tesadang moapu nung aser Efraim süngkhüm tesadang moapu nung pei sasa semtu yanglu.

¹⁷Aser shir pur aoba nungi adoker sentepa ali, parnok ajaki semtuji yanglu aser yangji ali, kechiaser Nun jabaso Yihusua anogo nungi tenzüker iba anogo tashi Israel chirtemi yamaji meinyaki aru. Aser parnok lungsoa pelatepbaji tulu liasü.

¹⁸Aser anogo shia, mezüng anogo nungi tatembangba anogo tashi, pai Tsüngrem ozüng kaket nungi azüng. Aser parnoki anogo tenet tashi benjongji ali aser tinübuba nung tatembang benjong sentep ka yimsü amato parnoki ali.