Read njo NEHIMIA 9 Bible Online

NEHIMIA 9 - njo bible

NEHIMIA 9

¹Tang iba ita metsür pezünübuba nung Israel chirtem anemsü abener, aser parnok kolak nung aut mezür, lumia sentep.

²Aser Israel purtem metsü bendanger nungi parnok sasa sadanger noktak, aser parnok pei temenen aser tsürabur temenen mapa tai nangzük.

³Aser parnok pei talidak noktak aser panüji shilem pezü nung ka, par Tsüngrem KIBUBA ozüng kaket azüng, aser tanga pezü shilem nung ka parnoki KIBUBA Tsüngrem dang nangzüka külem.

⁴Idangji Levi kin taktang nung Yeshua, Bani, Kadmeil, Shebania, Bunni, Sherebia, Bani, aser Chenani noktak, aser KIBUBA Tsüngrem dang ola tulu agi ayimten.

⁵Aser Levi kin Yeshua, Kadmeil, Bani, Hashabnia, Sherebia, Hondia, Shebania, aser Pethahia, parnoki ashi, “Noktakang aser ne Tsüngrem KIBUBA tenüng teti tatem makai sangang, tang ne sentsüwangshi tenüng koba temoatsü aser tenüngsang ajak dang tematiba, aji moajang.”

⁶Aser Israel nüburtemi iba sarasadem ya sarasadem; “Na KIBUBA, na alema ano mali, nai anüng yanglu, anüngtem madak anüng, idakji alir telok ajak, alima aser idakji aliba oset ajak, tzüyim aser idakji aliba ajak yanglu, aser item ajak nai sota ayur; aser anüng nung alir teloki na külemer.

⁷ Na KIBUBA Tsüngrem, shibai Abram shimtet aser Kaldi nunger lima Ur nungi aniteter aru, pa nem Abraham tenüng agütsü;

⁸ aser ne dak tamang katetba mulungjang nai pa dak angu, aser Kanan, Het, Amor, Periz, Yebus, aser Girgas lima pa nem agütsütsü züngzüktep, aser ne o mapa küma inyak; kechiaser na temeshi lir.”

⁹ “Nai Ijip lima nung ozü tsürabur timtem angu aser Temerem Tzüyim nung parnoki ayimtenba ola nai angashi;

¹⁰ aser Farao anema aser pa nütsüng aser par linük nübur ajonga dang nai temaitsü aser sayatenya sayu; kechiyong nai metet parnoki asüküma item anema benshi aser tanü anogo ama, ne tenüng meteta kümdaktsü.

¹¹ Aser parnoki tzüyim tiyong ajanga ali takong nung ajangtsüsa nai tzüyimji sadang; aser parnok aria arur tsükchirji, tzü tulu telung nung lung ka ama, tarok nungji samadaktsü.

¹² Ano parnok kolenisa odir lenmang nung tesangwa agütsütsü atema nai anüngdang mepet tongshi aser aonung mi tongshi agi nai parnok len ani.

¹³Nai ano Sinai tenem madaki alu, aser parnok den kotak nungi jembi, aser parnok nem o bendangba shitak aser ochi ozüng, telatet ozüng aser temelaba tajung agütsü;

¹⁴nai parnok nem ne tenzüker Mosa ajanga, temeshi amungnü meteta kümdaktsü aser ne ozüngtemji parnok nem agütsü,

¹⁵ aser parnok ayadang kotak nungi amtsük agütsü, aser tzüradang tajemtsü tzü lung nungi adokdaktsü, aser nai agütsütsü nangzükba lima jagi oa liang ta mela.”

¹⁶ “Saka parnoki aser ozü tsüraburi asüküma tekong meranga ne ozüngtem mangai aküm;

¹⁷ aser parnoki ne o manga aser parnok tsüngdang ne sayatenya mapatem parnok mulung nung mayu, saka parnok tekong meranga, tashi manga sayua ano tanaben talenba süngra tiai meyipa aotsü parnoki walunir ka shimtet; saka na tai toktetba Tsüngrem, taochi aser temeim agi sünga aliba Tsüngrem, ain adoktsü meilungi, taochi talubosa aliba Tsüngrem, aser nai parnok metoktsü.

¹⁸ Hau, parnoki temuluba nashi pungchi ka parnok sasa yanglu aser ashi, ‘Ibai ne tsüngrem, shibai na Ijip nungi anir aru,’ yamaji parnoki mezüngmeshi mapa tulu inyak.

¹⁹ Saka ne taochi onsarabayong nai parnok arem nung sentoka metoktsü; anüngdang leniba mepet tongshi aser aonung mi tongshi agi tesangwa sayutsü, aser parnok aolen lenmang tuyutsü atema parnok metoktsü.

²⁰Parnok sayutsü Tanela tajung parnok nem agütsü, parnok tebang nungi mana nai magien, aser parnok tzüradang nai tzü agütsü.

²¹Hau, küm lir nai parnok arem nung mesü, parnok kecha agia anünga meyutsü; parnok süoshi tejen küma mao, aser parnok tetsüng waka maküm.

²² Ano nai parnok nem yimlitem aser kintem agütsü, koba shilem nai lemzüka agütsü; yamaji parnoki Heshbon chuba Sihon lima, aser Bashan chuba Og lima dena agi.

²³ Parnok chirnur anüng petinu ama nai züindaktsü aser par tetsü-tebou dang koba lima agütsüdi ta ashi, aji agi nai parnok anir arua toktsü.

²⁴ Anungji chirnuri oa iba limaji agi aser yangji alir Kanan nunger chubai anir nütsüng ajonga nai parnok küboki aitdaktsü, oda parnok dang par sünütsü asütsü asoshi.

²⁵ Atsü atsüa aliba yimtitem, aser temo aliba linükji parnoki agi, aser yangji oset tajung agi sünga aliba kitem, yangluteta aliba tzübutem, tsükmenatzü aser oliv tsükitem, aser süngjang dong talubosa parnok meyong aküm; anungji parnoki talubosa chia ajem aser yira-a aküm aser nai junga anebaluba yong parnok pelatep.”

²⁶ “Aji asüyonga parnoki tashi mangai na anema apuso, ne ozüng tesülen sendoka yutsü, ainkar shiri parnok ne dangi meyipa arudaktsütsü kuli asü, parnok tepset aser mezüngmeshi mapa tulu inyak.

²⁷Anungji nai parnok tsükchir ket nung agütsü, shirnoki parnok kangshi; aser timtem mapang nung parnoki ayimtenba ola kotak nungi nai angashi, aser ne taochi tulu agi parnok tsükchir ket nungi kümzüka ayutsü asoshi nai parnok nem tekümzüker agütsü.

²⁸Saka kenpiga dang anisüngzüka lirbo ano parnoki ne madang tamajung inyak; anungji nai parnok tsükchir ket nung senzüka toktsü, aser parnok madak parnoki yimsü asü. Saka kodang parnoki meyipa arua ne tsüngdang ayimten, nai kotak nungi angashi, aser ne taochi agi parnok aiben kümzük.

²⁹ Aser nai parnok ne ozüng küboki anir arutsü asoshi ajang ajanga kuli agütsü; saka parnoki mezümeküma benshi, ne ozüng manga, saka ne o bendangba anema tai mena shibai aji benshir pa taküm alitsü, parnoki tapubang metendak, tekong meranga sayu aser tashi manga.

³⁰ Aji asüyonga nai küm aika parnok dang aremzük aser ne Tanelai ainkar ajanga parnok anema kuli südaktsü; saka parnoki tenarong maten, anungji nai parnok iba linük nung alir nisung ket nung agütsü.

³¹Aji saka nai parnok kanga aochiba yong, parnok khenyongi mesamadaktsü mesüra sentoka metoktsü, kechiaser na temeim aser taochi akaba Tsüngrem lir.”

³² “Anungji tang, Oh Tsüngrem, tenangzükba aser taochi yutetba tulusang aser tetsübutsü Tsüngrem, Asiria chubatem tendak nungi tanü tashi onok dangi aser onok chubatem, ozü lenir, ozü putir, ozü ainkar, ozü tsürabur aser ne nübur ajak dangi aruba timtem tekangshi ya ne tsüngdang tila amai tekümdaktsü.

³³Kechi südir süaka, onok dak atalokba ajak nung nai timi dang inyakogo; kechiaser onoki tamajung mapa inyakaka, naibo ochishia dang inyaker.

³⁴Ozü chuba, ozü tamarener, ozü putir, mesüra tsüraburtemi shingaia ne ozüng mayu, mesüra ne temelaba aser ne kuli manga.

³⁵Nai kanga ajungba ajanga nai parnok nem agütsüba, parnoki yimli aser temo aliba lima tesadem angu, saka idakji parnoki na metenzük mesüra tamajung mapa nungi parnoki memeyip.

³⁶Ajiang, tanü onok alar lir; nai ozü tsürabur nem agütsüba linük nung aser idakji süngjanglijang aser oset tajung achitsü melena onok alar lir.

³⁷Iba li yagi tejang tali renloka tangtsü, saka chubatem shir onok menen ajanga onok madak nai chubadaktsü, parnok nem agütsü, parnok nem ano onok temang nung aser onok kiset shiruru madak parnok benshinütsü benshitsü tashi lir, aser onok timtem tulu nung lir.”

³⁸Ya ajak asoshi onoki tezüngzüktepba akanga aser zülua ayur, aser ozü tanishir, onok Levi kin, aser putirtem tenüng idakji ajena ayur.