Read njo ESTHER 2 Bible Online

ESTHER 2 - njo bible

ESTHER 2

¹Iba sülen kodang Ahasuerus chuba ain adokba süngjem, pai Vasti, aser lai kechi inyak aser la anema kechi ozüng agütsü aji bilemtet.

²Pa dang tenzükba chuba tenzükertemi pa dang ashi, “Chuba asoshi tobur tajung aiürtem bushidakjang;

³aser oda Susa yimtibai tetsürtem kidangi, chubar teyangluba nisung Hegai, tetsür anükba ket nung, parnoki tobur tajung tasüngtet aiür ajak külemi chubar yimli nung province ajak nung ketdangpur shima parnoki anitentsüsa; aser parnok merüktettsü asoshi parnok nem oset agütsüdakjang;

⁴aser aiür shibai chuba peladaktsüdir Vasti melen la chubatsür kümdakjang.” Aser aji agi chuba peladaktsü, aser pai yamaji inyak.

⁵Susa yimtiba nung Yihuda nunger ka, Benjamin kidong, Kis jabaso Shimei chir Jair jabaso tenüng agi Mordekai liasü;

⁶ shiba Babilon chuba Nebukadnezzari, Yihuda chuba Yehoiakin bener aoba den Yirusalem nungi tepuoker den pur ao.

⁷Aser pai tebu tanubur jala Hadasa, aji Esther mesütet, kechiyong la tebu aser tetsü maliasü, aser aiür chanuji tajinütsü aser tobur tajung liasü; aser kodang la tebu aser tetsü asü, Mordikai la pei jala ama mesütet.

⁸Anungji kodang chubai melaba aser pa ozüng angashi, aser kodang aiür aika Susa yimtiba Hegai ket nung külemi sentepa liasü, oda Esthera chubar kidangi tetsür anüksang Hegai keti anir ai.

⁹Aiür jagi pa peladaktsü aser pa maongka ngudaktsü. Anungji pai kara-a la nem la temang anebalutsü aser tobur junga kümdaktsütsü asoshi temezütsü mozü balala aser chiyungtsü tajung agüja la yaritsü asoshi chubar ki nungi tetsür tenet agütsü aser aiürtem anendak tajungtibai la anir odaktsü.

¹⁰Estheri la kechi nübur mesüra la kechi kin aji mashi, kechiyong Mordekai aji mashitsü la dang shir liasü.

¹¹Aser Esther koma lir aser la kechi akümtsü aji metettsü Mordekai anogo shia tetsür ki kima jakdang jaja.

¹²Tetsür shia Ahasuerus chuba dangi aitsü asoshi ita terana ozüng agi terenemba mapang liasü. Ita trok teronem menemtsü totzü agi aser ita trok teronem tanang agi pei temang tobur junga akümtsü anebalua liasü.

¹³Iba amaji aiürji chuba dangi aru, aser lai kechisa aginü tetsür kidang nungi chubar kidangi aotsü la nem agüja liasü.

¹⁴Nikongdang la ao aser anepdang chubar teyangluba nisung Shaashgaz, shibai chubar tezüngatsütem anük, pa ket bushia tetsürtem tanabuba ki bushia meyipa aru; la dak chubai sakloka aser tenüng teta mejara, lai chuba dangi tanaben mai.

¹⁵Tang Mordekai shibai tebu tanubu Abihail jala Esther pei jala ama mesütet, kodang chuba dangi aitsü mapang atong, tetsür anükba Hegai teyangluba nisungi ashiba dak alema lai kecha masüngdang. Aser Esther dak repranger ajaki la dak saklok.

¹⁶Anungji ita terbuba nung, aji Tebet ita nung, pa chubaba küm tenetbuba nung, Ahasuerus chuba dangi par chuba kidangi Esther anir ai.

¹⁷Aser tetsür ajak dang nungi tali pai Esther meim, aser aiür ajak dang tali pa nungi la yimlibilem aser maongka angu; anungji pai la kolak nung chuba korang semoktsü, aser Vasti melen la chubatsür kümdaktsü.

¹⁸Idangji chubai par tongtipur aser tenzüker ajak asoshi benjong tulu ka agütsü, oda Esther benjong yanglu. Pai ano par province ajak nung anisüngzük agütsü, aser chubar jenti akaba nungi mulungben sempettem agütsü.

¹⁹Kodang aiürtem tanaben külemi sentep, idangji chubar kiküm nung Mordikai mena liasü.

²⁰Mordekai la dang melaba ama Estheri ano pei sosem aser pei nübur kechi aji memetetdaktsü; kechiyong Estheri pai mesüa alidang amato Mordikai melabaji lai inyak.

²¹Item anogo nungji, Mordekai chubar kiküm nung mena alidang chuba teyangluba nisung ana, Bigthan aser Teres, shirnoki kikümbang nüka liasü, tena ain adok, aser Ahasuerus chuba dak teka aitsü bushi.

²²Aji Mordekai meteta liasü, aser pai Esther chubatsür dang metetdaktsü; aser Estheri aji Mordekai tenüng nung chuba dang ashi,

²³aser iba indang bushitep, aser shitak ta putet nung tenaprong süngdong ka nung soseta südaktsü; aser aji putipuyang kaket nung chuba madang zülua ayu.