Read njo ESTHER 3 Bible Online

ESTHER 3 - njo bible

ESTHER 3

¹Iba sülen Ahasuerus chubai Agag nunger Hamedatha jabaso Haman temaba mendeni tudaktsü, aser pa den alir tongtipur ajak dang nungi pa mendenji temaba tetushi nung yutsü.

²Chubar kikümbang nung alir chuba tenzüker ajaki apudak aser Haman dang akhümtsübu sayu; kechiaser chubai pa asoshi yamaji mela. Saka Mordekai mapudak aser akhümtsübu mesayu.

³Idangji chubar kikümbang nung alir chuba tenzükertemi Mordekai dang ashi, “Kechiba nai chubar ozüng raksatsür?”

⁴Tang kodang parnoki anogo shia pa dang jembi, aser pai parnok dang manga, Mordekai oji agidisü magilir ta sür, parnoki Haman dang ashi; kechiyong pai parnok dang pa Yihuda nunger ta shir liasü.

⁵Aser kodang Mordekai mapudaker, mesüra pa dang akhüm metsübur ta Hamani angu, idangji Haman kanga rasa.

⁶Saka pai Mordekai dang teka yia sensatsütsü bilema liasü, kechiyong parnoki pa dang Mordekai nübur indang ashi. Anungji Ahasuerus chuba yimli ajonga nung Yihuda nunger ajak, oda Mordekai nübur ajak samatsütsü Hamani tasa asa.

⁷Mezüngbuba ita, koba Nisan ita lir, Ahasuerus chubaba küm teranabuba nung parnoki Haman tsüngdang Pur toktang, koba tetezü anogo aser ita asoshi an toktangba lir. Aser aji ita teranabuba, Adar ita nung kao.

⁸Aser Hamani Ahasuerus chuba dang ashi, “Ne chuba yimli province ajaklen prokshia kin ka lir, aser par ozüng tangar chuba ajak nungi balaka; mesüra parnoki chuba ozüng mebenshir, anungji parnok oda toktsütsü chuba asoshi aji tajangzük masü.

⁹Ya chubai mulungra, oda parnok samatsütsü ta züludakjang, aser chuba terizüngdaki bener arutsü asoshi shirnok chubar mapa ketdangsüa ali, parnok nem ni taribi seret semer ozükba meyi ter agütsütsü.”

¹⁰Aser chubai pa ket nungi küri sepzük, aser Yihuda nunger tsükchir, Agag nunger Hamedath chir Haman nem aji agütsü.

¹¹Chubai Haman dang ashi, “Nai ne tsüngdang kechi tajung ta bilemer yamaji parnok dang inyaktsü ni ne nem taribi aser ano nisungtemji agütsür.”

¹²Idangji mezüng ita anogo terasemnübuba nung chubar tezülurtemji aja, aser chubar yimli province ajak nung yimsüsürtem, governor aser tulur ajak dangi pei pei oshi nung ozüng ka kin shia dangi zülu. Itemji Ahasuerus chuba tenüng nung zülur pa küri agi ajen.

¹³Shiti abeneri Yihuda nunger ajak, tanura taina, tetsür-tanur anogo ka nung, oda ita teranabuba anogo terasembuba, aji Adar ita nung, raksatsütsü, tepsettsü, aser samadaktsütsü, aser agitsü asoshi aser parnok dak nungi makzüktsü osang province ajaki yok.

¹⁴Iba anogo asoshi parnoki renema alitsü atema, tezüluba kaket ka province shia nung ozüng agütsütsü tim ta, nisung ajak dang metetdaktsü.

¹⁵Chuba ozüng agi osang abenertem ilunga ao, aser ozüngji Susa yimtiba nung yanglu. Idangji chuba aser Haman yi ajemtsü amen, saka Susa yimtibo ratamatadaktsü.