Read njo ESTHER 4 Bible Online

ESTHER 4 - njo bible

ESTHER 4

¹Kodang Mordekai tatalokba ajakji meteta aküm, pai tejashi agi pei süoshi shisa, aser aut mezüa anemsü abener yimti jara tashi oa tashi agi aser kanga kua mang ayim.

²Pai chuba kikümi ailen tashi ao, kechiaser shingaia anemsü abener chuba kikümi maitsüla.

³Province shia nung kongsa chubar ozüng aser temelabaji aru, Yihuda nunger rongnung mangyimba tulu, telumiba aser tajepba tulu liasü, aser aikati aut mezüa anemsü abener ontaka liasü.

⁴Esther-er aiürtem aser lar teyangluba nisungtem aru aser aji la dang ashi, aser chubatsürji kanga dang jashia liasü. Aser Mordekai abendaktsütsü, aser pa nungi anemsü endoktsütsü lai sü yok, saka pai aji magizük.

⁵Idangji Estheri Hathak, chubar teyangluba nisung rongnung ka shiba pai Esther reprangtsü shimtet, pa aja, aser ibai kechi aser kechiba aji metettsü Mordekai dangi aotsü mela.

⁶Anungji yimti moapu alidak, koba chubar süngkhüm jakdang liasü ajagi Mordekai dangi Hathak ao.

⁷Aser Yihuda nunger samatsütsü asoshi Hamani chubar sen rizüngdak sen ajak agi kwi agütsütsü nangzük, aser Mordekai pa dak atalokba ajak pa dang ashi.

⁸Aser parnok samatsütsü Susa nung yangluba ozüng zülubaji Esther dang sayutsü asoshi, aser aji la dang metetdaktsütsü, aser la dang chuba dangi la iang ta ashitsü, pa dang mepishitsü, aser pa madang pei nübur atema mepishitsü pai pa nem kaketji agütsü.

⁹Hathak arua Esther dang Mordekai otemji ashi.

¹⁰Idangji Estheri Hathak dang jembi, aser Mordekai dangi osang ka ya oda agütsü.

¹¹“Chubar kilirtem aser chubar province nung nisung ajaki metet, oda shibasa, tebur süshia tetsür süshia, chubai majadang yongi taktang telungbai idir, pa asoshi ozüng ka dang, oda shiba dangi pa taküm lidaktsütsü hon nüsong chubai mesangdir pa dak alema ajak südaktsütsü; saka item anogo semer chuba dangi aitsü ni mejai lir.”

¹²Parnoki Esther otemji Mordekai dang ashi.

¹³Idangji Esther dangi telangzüba meyipa bener aotsü parnok dang ashi, “Yihuda nunger ajak yutsür nabo chuba kidang jenbutsü ta ne sasa tebilem.

¹⁴Kechiyong iba mapang nung na khenyongi ola madoki lira, idangji tanga tesem ka nungi Yihuda nunger dangi teyari aser tekümzüktsü adoktsü, saka na aser nebur kidongbo samatsü; aser ibala mapang asoshi na chuba yimli jagi arua alitsüa shibai metet?”

¹⁵Idangji Estheri Mordekai dangi telangzüba meyipa bener parnok yoka ashi,

¹⁶“Oang, Susa nung alir Yihuda nunger ajak külemi sentepang, aser ni asoshi lumiang, anogo asem aonung aser anüngdang techiyunga techiyung aser tajema tejem, ano ni aser kü kilitsürtema yamaji lumitsü; ajiser ni ozüng nung meliaka chuba dangi aitsü samara ni samatsü.”

¹⁷Angji Mordekai-i pei lenmangi ao aser Estheri pa dang melaba ajak inyak.