Read njo ESTHER 5 Bible Online

ESTHER 5 - njo bible

ESTHER 5

¹Tang tasemnübuba nung Estheri chubatsür sobutsü sobu, aser chuba ki tejaklen chubar ki taktang telungba nung noktak; aser chubai pei chuba menden nung chuba kidang ki lenjanglen shia mena liasü.

²Kodang chubai Esther kimalen noktaka angu, pa tsüngdang Estheri yimli angu; aser chubai hon nüsong pa ket nung aliba Esther dangi mesang. Anungji Esther anasa aru, aser chuba nüsong talak nung kongshi,

³Idangji chubai la dang ashi, “Nai kechi sünür, chubatsür Esther? Aser ne temepishiba kechi? Chuba yimli tesadanga ni ne nem agütsütsü.”

⁴Estheri ashi, “Chubai junger ta bilemra, chuba aser Haman ni pa asoshi renemba benjong jagi tanü arudakjang.”

⁵Idangji chubai ashi, “Estheri ashiba ama inyaktsü Haman ilunga arudakjang.” Anungji chuba aser Haman Estheri renemba benjong jagi aru.

⁶Chubai benjong nungji Esther dang ashi, “Ne taginüba kechi? Aser aji ne dang melatsü; aser ne temepishiba kechi? Chuba yimli tesadang tashi saka aji inyaktsü.”

⁷Idangji Estheri langzü, “Ya kü tasüngdangba aser temepishiba lir;

⁸Chubai kü dang yimli sayudi süra, aser chubai kü tasüngdangba melatsü mulungra, aser kü temepishiba inyakdi süra, chuba aser Haman ni parnok nem renemtsüba benjong jagi asünga arudakjangma, aser chubai ashiba amaji ni langzütsü.”

⁹Idangji Haman iba anogo pelaseta temulung pela-a ao; saka kodang Hamani chubar süngkhüm nung Mordekai pa madang menoktaki mesüra pa asoshi marakzüi angu, Mordekai anema kanga rasa-a liasü.

¹⁰Aji saka Hamani pei sasa aremzük, aser kidangi ao aser pai yoka pa tembartem aser tebutsü Zeres anir aru.

¹¹Aser Hamani parnok rongnung pa sentsüwangshi, aser par chirnur jenti aser mapa ajak kechi nung chubai pa temabai tudaktsü, aser koda pa tongtipur aser chubar tenzüker madak pa uludaktsü, atonga ashi.

¹²Ano Hamani ashi, “Oda chubatsür Estheri lai renemba benjongi kü dak alema nisung shinga chuba den arutsü memelar, aser ano asüng lai chuba den külemi nia jaoka lir.

¹³Aji saka Yihuda nunger Mordekai chubar süngkhüm nung mena ali tashi ya ajak ni asoshi kecha nunga.”

¹⁴Idangji tebutsü Zeres aser la tembar ajaki pa dang ashi, “Pa süng sabang ka nung soseta südaktsütsü süklep tenem talang yangluang, aser anepdang iba manung Mordekai soseta südaktsütsüsa chuba dang jembiang, ajiser benjong jagi pelatepa chuba den iang.” Aser aji agi Haman peladaktsü aser pai soseta südaktsütsü süng sabangji yanglu.