Read njo ESTHER 6 Bible Online

ESTHER 6 - njo bible

ESTHER 6

¹Paonungji chuba amua moutet, aser pai Putipuyang kaketji bener arutsü mela, aser itemji chuba madang azüng.

²Aser Bigthana aser Teres, chuba teyangluba nisung ana, kikümbang anüker, shirnoki chuba Ahasuerus dak teka aitsü bushi, parnok indang Mordekai ashi ta zülua angu.

³Aser chubai ashi, “Iba asoshi Mordekai dang kechi akhümtsübu aser tetushi inyak?” Idangji chuba tenzükertemi pa dang ashi, “Pa asoshi kecha meinyak.”

⁴Chubai ashi, “Chuba kima shiba lir?” Tang Mordekai asoshi renemba süng sabang nung pa soseta südaktsütsü chuba den jembiteptsü chubar temaba kima nung Haman aita liasü.

⁵Aser chuba tenzükertemi pa dang ashi, “Ajiang, Haman chuba kima noktaka lir.” Aser chubai ashi, “Pa aitdakjang.”

⁶Anungji Haman ait. Aser chubai pa dang ashi, “Chubai shiba dang tetushi sayutsü pelar iba nisung dang kechi inyaktsü?” Tang Hamani pei mulung nung ashi, “Chubai kü dak alema shiba dang tetushi sayunütsü?

⁷Aser Hamani chuba dang ashi, ‘Chubai tepela sayunüba nisung asoshi,

⁸Chubai sobuba chuba sobutsü, aser chuba amenba kor, aser tekolak nung chuba korang semtsür, anir arudakjang.

⁹Aser nisung shiba dang chubai pela-a tushinür pa dak parnoki abendaktsütsü aser yimti yimtong ajanga kor rongdong nung mendaktsütettsü asoshi sobutsü aser korji chubar tamarener tongtipur ka nem bendanga agüjang, aser pa jakdang, Nisung shiba dang chubai pela-a tushinür pa dang yamai inyaktsü, ta ayimdakjang.’ ”

¹⁰Idangji chubai Haman dang ashi, “Yakta sang, nai ashiba amaji sobutsü aser kor bena arung, aser yamaji chuba süngkhüm nung amenba Yihuda nungba Mordekai dak inyakang. Nai jembiba ajak kecha meinyaki teli.”

¹¹Idangji Hamani kor aser sobutsü agi, aser Mordekai nem sobutsü, aser yimti yimtong ajanga sanger odaktsü, aser pa jakdang, ‘Chubai pela-a tushinüba nisung dang yamai inyaktsü ta ayimten.’

¹²Mordekai tanaben chubar süngkhümi aru. Saka Hamanbo pa süko meir jeba par kidangi ilunga ao.

¹³Aser Hamani tebutsü Zeres aser la tembar ajak dang pa dak atalokba ajak ashi. Idangji par tashi temetetertem aser tebutsü Zeresi pa dang ashi, “Mordekai shiba tsüngdang na laotsü tenzüka lir, Yihuda nunger süngjang süra, nai pa anema makoktsü, saka atangji pa tsüngdang na laotsü.”

¹⁴Pa den ano parnoki tejembidak nung chubar teyangluba nisung aru, aser ilunga Estheri renema aliba benjongi Haman anir ao.