Read njo ESTHER 7 Bible Online

ESTHER 7 - njo bible

ESTHER 7

¹Anungji chuba aser Haman Esther den benjong achitsü aru.

²Chubai tanaben yi benjong tananübuba nung Esther dang ashi, “Chubatsür Esther, ne temepishiba kechi? Aji ne nem agütsütsü, aser ne taginüba kechi? Chuba yimli tesadang tashi saka aji inyaktsü.”

³Idangji Estheri chuba dang langzü, “Oh chuba ni ne tsüngdang yimli ngura, aser ya chubai mulungra, kü taküm kü nem meyipa agüjang, aji kü tasüngdangba, aser kü nübur taküm mela-ang, aji kü temepishiba.

⁴Kechiyong ni aser kü nübur raksatsütsüba, aser tepsettsüba, aser samatsütsü onok yokogo. Saka onok oda tebur aser tetsür alar asütsü ayok asübo, ni ajemajema lila, kechiyong touashi jagi chuba timtemdaktsüba malang.”

⁵Idangji Ahasuerus chubai jembia Esther chubatsür dang ashi, “Pei mulungjang nung yamaji inyaktsü bilema tasü ita bilemba, pa shiba aser kong lir?”

⁶Estheri ashi, “Anemer ka aser tsükchir ka, iba tamajung Haman.” Idangji chuba aser chubatsür madang Haman tsübua liasü.

⁷Aser ain adoka chuba yi benjong nungi arameso aser chuba tsüki jagi ai. Aser Esther chubatsür dang pa taküm asoshi mepishitsü Hamani noktak; kechiyong chubai pa anema tamajung shisatetba pai angu.

⁸Idangji chubai chubar tsüki nungi meyipa yi benjongi ai, aser Esther menden manung Haman apudaka liasü. Idangji chubai ashi, “Pai kü madang chubatsüra mezüngmeshitsü.” Chuba o pa bang nungi adokli-i teyangluba nisungtemi Haman tejak nembangtsü.

⁹Idangji chuba madang aliba teyangluba nisung rongnung ka, Harbonai ashi, “Ajiang, ano Mordekai shibai chuba asoshi o tajung jembi, pa asoshi Hamani soseta südaktsütsü süng süklep tenem talang yangluba Haman kidang lir.” Aser chubai ashi, “Iba manung pa soseta südakjang.”

¹⁰Anungji parnoki Mordekai asoshi yangluba süng manungji Haman soseta südaktsü. Idangji chuba ain adokba sünem.