Read njo ESTHER 8 Bible Online

ESTHER 8 - njo bible

ESTHER 8

¹Iba anogo nung Ahasuerus chubai Yihuda nunger tsükchir Hamaner ki Esther chubatsür nem agütsü. Aser Mordekai chuba dangi aru, kechiyong Estheri chuba dang la aser pa koda sentaktep aji ashi.

²Chubai pa küri, koba pai Haman nungi agizük, aji sepzük, aser aji Mordekai nem agütsü. Aser Estheri Mordekai Haman ki madak yutsü.

³Ano Estheri chuba dang tanaben jembi, aser pa tsüngdang apudak, aser Agag nunger Haman tamajung mapa, aser Yihuda nunger anema pai tasa asa-a aliba endokjang ta nüktzü yima pa dang mepishi.

⁴Idangji chubai hon nüsongji Esther dangi mesang. Anungji Esther arameso, aser chuba madang noktak.

⁵Lai ashi, “Chubai mulungra, aser ni ne tsüngdang yimli ngura, aser chuba madang tim ta süra, aser ni pa nükdang saklokra, Agag nunger Hammedath jabaso Hamani atongtetba shititem koba pai chubar province ajak nung aliba Yihuda nunger samatsütsü zülu, aji melenshia züludakjangma.

⁶Kechiyong kü nübur madak tamajung arutsü aliba ni koda sür aremzüktettsü? Mesüra kü sosem samatsüba, ajia ni koda aremzüktettsü?”

⁷Idangji Ahasuerus chubai chubatsür Esther dang aser Yihuda nunger Mordekai dang ashi, “Ajiang, ni Esther nem Hamaner ki agütsüogo, aser pa süng nung soseta parnoki südaktsüogo, kechiaser pai Yihuda nunger madak teka ai.

⁸Nenoki ano Yihuda nunger indang nenoki mulungba ama züluang, chubar tenüng nung, aser chuba küri agi aji ajenang; kechiyong koba chuba tenüng nung zülua lir, aser chuba küri agi ajena lir, aji nisung shingaia meyipa magitettsü.”

⁹Iba mapang nung chubar tezülurtem, ita tasembuba, aji Sivan, anogo metsür asembuba nung jatep, aser Mordekai Yihuda nunger dang melaba ajak amaji, aser yimsüsüba governor aser province nung tongtipur, India nungi Ethiopia tashi, province noklang ka ser metsürtenet, province shia dangi pei pei zülu nung, aser nübur shia pei oshi nung, aser Yihuda nunger dangia parnok zülu nung, aser parnok oshi nung aji zülu.

¹⁰Aser pai Ahasuerus chuba tenüng nung zülu, aser aji chuba küri agi ajen, aser shitiji shiti abeneri kor nung mener, kor tekara chubar mapa nung amshia aliba, kor teshimtet nungi adokba nung mener yok;

¹¹kechi nung chubai yimti shia aliba Yihuda nunger dangi parnok sasa külemi senteptsü, aser parnok pei taküm asoshi noktaktsü, aser parnok dak amtakba ajak raksatsütsü, tepsettsü, aser samadaktsütsü, oda province-a dena, aser parnok chirnur aser tetsürtem aser parnoki makzükba oset terakzükba ama agitsü mela.

¹²Ahasuerus chuba province ajak nung kenü anogo nung, teranabuba ita, aji Adar ita anogo terasembuba anogo nung aji inyaktsü shimtet.

¹³Tezüluba kaket ka, oda province shia nung ozüngji agütsütsü, ta kin ajak dang metetdaktsü, aser Yihuda nungeri iba anogo nungji parnok tsükchir dak mang ayangtsü renema alitsüla ta metetdaktsü.

¹⁴Anungji kor tekara, chubar mapa nung amshiba nung mener, obelenertem chuba ozüng agi ilunga aser kara-a ao, aser ozüngji Susa yimtiba nunga metetdaktsü.

¹⁵Chuba madang nungi Mordekai chuba sobutsü tanen aser temesüng sobur, aser kümpa sü tajung aser nakrema meremba sobutsü sobur ao; aser Susa yimti nung washiba aser pelatepa liasü.

¹⁶Yihuda nunger atema ibai tepela aser longsotepba liasü, oda pelatepba aser tetushi mapang ka liasü.

¹⁷Aser province shia, aser yimti shia, kolenisa chubar temelaba aser pa ozüng aru, Yihuda nunger pelaba aser tepelatepba, benjong yanglua liasü. Aser linük nung nisung jenti Yihuda nunger aküm, kechiaser Yihuda nunger tsübuba parnok madak liasü.