Read njo ESTHER 9 Bible Online

ESTHER 9 - njo bible

ESTHER 9

¹Tang ita teranabuba, koba Adar ita lir, iba ita terasemnü buba nung, kodang chuba temelaba aser ozüng inyaktsü anasa atong, Yihuda nunger tsükchirtemi parnok madak kibur akümtsü imlaba anogo nung; aji saka meyiper, oda parnok madak parnoki sempaba Yihuda nungeri ang kibur küma liasü.

²Yihuda nunger parnok sasa külemi parnok yimti nung Ahasuerus chuba province ajak nung, parnok dak amtaktsü bushirtem dak teka aitsü sentep, aser shingaia parnok anema menoktaktet; kechiyong nisung ajak madak tetsübuba liasü.

³Aser province nung tongtipur ajak, yimsüsür aser governor ajak, aser chubar mapa inyakertemi Yihuda nunger yari, kechiaser Mordekai tsübuba parnok madak liasü.

⁴Kechiyong chubar kidang Mordekai tulu liasü, aser pa nüngsang province ajak leni ao; kechiyong iba nisung Mordekai tuluba tuluba aküm.

⁵Yihuda nungeri parnok tsükchirtem nok agi, aser tetepsetba aser teraksatsüba agi akok, aser parnoki kechi sünü, parnok sempar dang yamaji inyak.

⁶Aser Susa yimtiba nung Yihuda nungeri nisung noklang pungu tepset aser samatsü.

⁷Aser Parshandatha, Dalfon, Aspatha,

⁸Poratha, Adalia, Ariadatha,

⁹Parmasta, Arisai, Aridai, Vaizatha.

¹⁰Hammedatha chir Haman jabaso ter, Yihuda nunger tsükchir parnoki tepset; saka temakzükba oset nung parnoki teka mai.

¹¹Iba anogo nung Susa yimtiba nung tepseta alirtem yongsükji chuba dang metetdaktsü.

¹²Aser chubai Esther chubatsür dang ashi, “Yihuda nungeri Susa yimtiba nung nisung noklang pungu tepsetogo aser samatsüogo, aser Haman jabaso ter; ajangla province tanga nung parnok kechi inyak. Tang ne tasüngdangba kechi? Aji melatsü mesüra ne taginüba kechi? Aji inyaktsü.”

¹³Idangji Estheri ashi, “Chubai mulungra, Susa nung alir Yihuda nunger dang tanü ozüng ama asünga inyaktsü mela-angma, aser Hamaner jabaso ter süngdong nung metadakjangma.”

¹⁴Aser chubai yamaji inyaktsü mela, aser Susa nung ozüng ka agütsü, aser parnoki Hamaner jabaso ter meta.

¹⁵Susa nung aliba Yihuda nunger Adar ita anogo terpezü buba nung parnok külemi sentep aser Susa nung nisung noklang asem tepset; saka temakzükba oset nung parnoki teka mai.

¹⁶Yihuda nunger province tanga nung alirtem külemi sentep, aser parnok taküm asoshi noktak, aser parnok tsükchir nungi anisüngzük angu, aser parnok sempartem meyi neterpungu tepset; saka temakzükba oset nung parnoki teka mai.

¹⁷Ibai Adar ita anogo terasem buba nung inyak, aser terpezünü buba nung parnoki anisüngzük, aser aji benjong akaba aser pelatepba anogo ka yanglu.

¹⁸Saka Susa nung alir Yihuda nunger terasemnü buba aser terpezünü buba nung sentep, aser terpungunü buba nung anisüngzük, aser aji benjong akaba aser pelatepba anogo ka yanglu.

¹⁹Anungji Yihuda nunger shirnok yimtsüng nung lir, shirnok yimtsüki makadak alir. Adar ita anogo terpezübubaji tepelaba aser benjong aser anisüngzük anogo, aser katia katia sempet agütsütepba anogo yanglu.

²⁰Idangji Mordekai itemi zülu, aser Ahasuerus chuba province nung Yihuda nunger ajak dangi, anai aser talangi,

²¹Adar ita terpezübuba aser kasa ita terpungububa küm shia,

²²Yihuda nunger parnok tsükchir nungi anisüngzük anguba, aser parnok asoshi tejashi nungi tepela, aser tajepba nungi anisüngzük anogo melentepba ita, oda parnoki itemji benjong aser tepela, aser kati ka dangi sempet yoktepba aser sensaker nem sempet agütsüba anogo ama parnoki amungtsü shiti yok.

²³Yihuda nungeri parnoki tenzüka aliba amaji inyaktsü, aser Mordekai parnok dang züluba ama tenteta inyak.

²⁴Kechiaser Yihuda nunger tsükchir Agag nunger Hammedatha jabaso Hamani Yihuda nunger anema parnok samatsütsü tasa asa, aser Pur toktang, aji tetezü parnok samatsütsü aser raksatsütsü an toktangba.

²⁵Saka kodang mapaji chuba dangi aru, oda pa tamajung tasa koba pai Yihuda nunger anema tasa asa, pa kolaki meyiptsü, aser pa aser par jabasotem süng nung soseta südaktsütsü pai shiti agi mela.

²⁶Angji parnoki Pur nungi jakzüka item anogo dang Purim ta aja. Anungji iba shiti o ajak ama, aser iba mapa indang parnoki anguba aser parnok madak atalokba asoshi,

²⁷aser parnok nungi jakzükertem atema, aser parnok yimya arua alir ajak asoshi aji meindoktsü, oda küm shia item anogo ana zülua aliba ama benjong amungtsü ozüng küma tentet;

²⁸aser item anogo tebilemtettsü aser putu shia ayutsü, kibong shia, province shia, aser yimti shia; aser Purim anogo itemi Yihuda nunger rongnung mezütoktsüla, mesüra parnok chirnur nungi item bilemtetba tatem mekümdaktsütsüla ta ozüng tentet.

²⁹Idangji Abihail jala Esther chubatsüri, aser Yihuda nunger Mordekai, iba tanabuba Purim shiti akangshidaktsütsü tashi ajak agi zülu.

³⁰Aser Yihuda nunger ajak dangi, Ahasuerus chuba yimli province noklang ka ser metsür tenet dangi, yimjung aser ochi o agi,

³¹Purim anogotemji teshimtet mapang nung amungtsüla, oda Yihuda nunger Mordekai aser Esther chubatsüri parnok dang aser par chirnur dang metetdakja melaba ama, lumiba aser temenungraba ken indang shiti yok.

³²Esther ozüng agi Purim indang item mapang akangshidaktsü aser aji kaket nung zülu.