Read njo ANITET 1 Bible Online

ANITET 1 - njo bible

ANITET 1

¹Israel chirtem Ijipi Yakob den arurtem parnok pei pei kibong itemi:

²Reuben, Simeon, Levi, Yihuda,

³Issakar, Zebulun, Benjamin,

⁴Dan, Naftali, Gad, aser Asher.

⁵Yakob dak jakzükba parnok ajak agi nisung neter.[1] Saka Yosefbo Ijip nung liasü.

⁶Joko Yosef aser pa tedi nunger iba putu nisung ajak asü.

⁷Saka Israel chirtemji azükarua aser jenti rena tashi ita aküm aser parnok jagi alinükji asüng.

⁸Iba tensaji Ijip nung Yosef memetetba chuba tasen ka adok.

⁹Pai pei nüburtem dang ashi, “Reprangang, Israel purtem asenok dang nungi teimba aser tashi taitba kümogo.

¹⁰Tang parnok nütsüng renlokba anema asenoki lenmang kar bushitsüla. Kechiaser rara adokra parnoki asen tsükchir den dener asenok den raratsü; aser asen lima toktsür aotsü.”

¹¹Anungji Ijip nungeri alartem tanüker tokja parnok rishikangshia mapa inyakdaktsü, aser parnoki Farao tsük rizüngdak Pithom aser Ramses yimtitem yanglu.

¹²Saka parnokji kodaka rishikangshi, patakaji züin, aser linük ajak asüng nung Ijip nungeri Israel nungerji tsübu.

¹³Anungji Ijip nungeri Israel chirtem dak taochi makai rishikangshitsü tenzük.

¹⁴Aser parnok taliba jenjang kanga saka kümdaktsü. Saka parnok dang maochi-i alu mapa tapu tapu inyakdakja, ajongli agi lungru yangludaktsü, aser parnok nem mapa tasak rishikangshia inyakdaktsü.

¹⁵Idangji Ijip chubai Ijiptsür nuso yarir Shifra aser Pua dang ashi,

¹⁶“Kodang nenoki Ibritsürtem nu amungdang yaridir, tanurji jabaso süra tepsetang, saka jala süra laji taküm lidakjang.”

¹⁷Saka nuso yarirtem jagi Tsüngrem tsübu nung Ijip chubai ashibaji manga, aser parnoki jabasotem metepset.

¹⁸Anungji nuso yarirtemji Ijip chubai jar asüngdang, “Kechiba nenoki yamai inyak aser jabasotemji taküm lidaktsü?”

¹⁹Nuso yarirtemi Farao dang langzü, “Ibritsürji Ijiptsür ama masü, parnok kanga tekümdang, aser jeretperar, onok metongjongi parnok sasa bentetadoker alir.”

²⁰Yamaji nuso yarirtem dang Tsüngremi meima benshi, aser nisungtemji tali renloka tashi ita aküm.

²¹Nuso yarirtemi Tsüngrem tsübu nungji pai parnok kibongtem rendaktsü.

²² Idangji Faraoi nisung ajak nem ozüng ka yamai agütsü, “Ibri nunger jabaso ajak Nile ayong nung ajongokjang, saka jalatembo taküm lidakjang.”