Read njo ANITET 10 Bible Online

ANITET 10 - njo bible

ANITET 10

¹Idangji KIBUBAi Mosa dang ashi, “Farao dangi oang, kechiaser parnok rongnung kü sayatenya temaitsütem sayutsü asoshi pa aser pa yimsüsürtem temulung ni merangdaktsüogo.

²Ano ni Ijip nunger den sashia inyakba aser koba temaitsütemsa parnok rongnung inyak, item indang nenok chirtem aser semchirtem dang ashitsü aser nenok ajaki ni KIBUBA ta metettsü asoshi lir.”

³Anungji Mosa o Aron na Farao dangi oa ashi, “KIBUBA, Ibri nunger Tsüngremi ashir, ‘Kü madang mapang kopiga nai mazüzüki alitsü? Kü dang külemtsü asoshi kü nüburtem odakjang.

⁴Nai parnok modaktsüra, ni asüng ner limai süngko arudaktsütsü.

⁵Parnok onsara nung majitettsüsa metembangtsü. Rürlungi aliji meraksatsübatem aser moapu nung meiba süngdonglidong ajak item jagi chimatsü.

⁶Ner ki, yimsüsürtem ki aser ne nüburtem ki ajak item jagi asüngtsü. Nebu mesüra nebou nunger iba lima nung lir tanü tashi yamaji kodanga mungudang.’ ” Iba sülen Mosai Farao nungi pila.

⁷Farao yimsüsürtemi pa dang ashi, “Iba nisung yagi kopiga asenok nem timtem agütsütsü? KIBUBA parnok Tsüngrem dang külemtsü asoshi Israel nungertemji odakjang. Ijip raksatsüogo ta nai ano mebilemteter no?”

⁸Anungji Mosa o Aron na Farao dangi anir arua pai parnok dang ashi, “KIBUBA, nenok Tsüngrem külemtsü nenok oang, saka shirnoksa aotsü?”

⁹Mosai langzü, “Onok den tanurtain ajak aotsü. Onok jala-jabasotem, onok san, nabong aser nashi telok ajak; kechiaser KIBUBA dang onoki benjong ka akatsüla.”

¹⁰Faraoi parnok dang ashi, “Ni nenok tetsür tanur ajak odaktsütetra KIBUBA nenok den liangma, saka nenok tebilembaji tajungbo masü.

¹¹Yamaji masü! Nenok teburtem oang aser KIBUBAji külemang kechiaser aji nenok taginüba lir.” Yamaji shia Mosa o Aron na Farao tsüngdang nungi aridok.

¹²Idangji KIBUBAi Mosa dang ashi, “Ijip limai süngku arua alinük nung aliba süngo-lio ajak aser rürlung agi meraksai anünga toktsübaji achitsü asoshi Ijip madak ne teka mekangang.”

¹³Anungji Mosai pei mechi Ijip lima madak mekang, aser panü aser paonungji süngku KIBUBAi anüdoklen mopung ka pai alinük madak sashia ondaktsü. Anepdang akümdang mopung jagi süngko oner arua liasü.

¹⁴ Aser süngko jagi Ijip lima ajak metembang, kechiaser parnok telok tulu liasü. Yamaji akhidang kodanga maru, mesüra yasür-a marutsü.

¹⁵Parnoki alimaji naknaka maküm tashi metembang. Linük nung süngo-lio ajak rürlung agi meraksai anünga toktsüba süngdong aser süngjanglijang ajak parnoki chima. Ijip lima ajaklen süngdong nung süngo-lio mesüra süngjanglijang kecha anünga meyutsü.

¹⁶Idangji Faraoi ilungseta Mosa o Aron na jar ashi, “KIBUBA nenok Tsüngrem aser nenok anema ni temenen menaogo.

¹⁷Anungji tang kü temenen tokang ta ni nenok dang mepishir aser iba tasütsüsa merenshiba timtem ya kü dang nungi agientsü KIBUBA nenok Tsüngrem dang mepishijang.”

¹⁸Aser pai Farao nungi adoka KIBUBA dang mepishi.

¹⁹Mosai Farao nungi pila aser KIBUBAi anüdoklen mopungji anüolen mopung tesashi ka agi meyipdakja süngkuji Temerem Tzüyim nung aridoktsü. Aser alima ajak nung joko süngku ka danga maliasü.

²⁰Saka KIBUBAi Farao mulung merangdaktsü aser pai Israel nunger modaktsü.

²¹Idangji KIBUBAi Mosa dang ashi, “Ijip lima madaki nüburtemi metettsüsa tammang tulu ka arua nembangtsü asoshi ne teka mekangang.”

²² Mosai anünglen pa teka mekang aser anogo asemnü Ijip lima ajak nung ammang tulu liasü.

²³Aser Ijip nunger parnok kati ka mungutepi aküm aser anogo asem shinga pei ki toktsür motet. Saka Israel nunger alidakbo ajaklen tesangwa liasü.

²⁴Idangji Faraoi Mosa jar ashi, “Ne den tetsür tanur ajak anir oa KIBUBA külemang. Saka nenok san, nabong aser nashi telok dang idaki anünga tokjang.”

²⁵Saka Mosai langzü, “KIBUBA, ozü Tsüngrem dang tenlatsü aser tarongba tenla agütsütsü asoshi nai onok nem shirurutem agütsütsüla.

²⁶Onok kiset shirurutem onok den ajak aotsüla, parnok ka danga anünga metoktsütsüla. KIBUBA, ozü Tsüngrem dang tenlatsü asoshi onoki shiruruji shimtettsüla. Aser koba shiruru agi pa dang tenlatsü, iba tesemji matong tashi onoki kecha metettsü makok.”

²⁷KIBUBAi Farao temulung merangdaktsü aser pai parnok odaktsütsü memulung.

²⁸Idangji Faraoi Mosa dang ain adoka ashi, “Kü dang nungi oadokang! Na kümdangang kü dang ne jak yasürbo tengudaktsü, kechiaser nai küjak anguba anogo nungjisa na asütsü!”

²⁹Mosai langzü, “Nai ashiba amaji sang! Joko nia ne jak kodanga mangutsü.”