Read njo ANITET 11 Bible Online

ANITET 11 - njo bible

ANITET 11

¹Idangji KIBUBAi Mosa dang ashi, “Farao aser Ijip madaki ni ano temerenshi ka arudaktsütsü. Iba sülenjibo pai nenok odaktsütsü, aser pai kodang aji inyakdir, pai nenok ajak khenyongi aridoktsü.

²Tang Israel nungertem dang shiang aser tetsür-tebur ajaki pei kiyonger dang hon, aser taribi meshitendakjang.”

³Ijip nunger tsüngdang Israel nunger yimlibilem angutsüsa KIBUBAi kümdaktsü. Aser Farao tenzükertem aser nüburtem madang Mosa kanga nüngtugu liasü.

⁴Mosai ashi, “KIBUBAi yamai ashir, ayatrem nung ni Ijip ajanga süitsü,

⁵Ijip lima nung mezüng asoba jabaso ajak oda chuba menden nung amentsüba Farao mezüng jabaso nungi tenzüka tsüen aliba alatsür jabaso tashi, aser kiset shirurutema mezüng mepuba ajak asütsü.

⁶Ijip lima ajaklen mangyimba tulu alitsü, oda ibaji mesüka kodanga mangashidang mesüra yasür-a mangashitsü.

⁷Saka Israel nunger anema, nisung mesüra shiruru anema azü katia masangtsü. Idangji ni KIBUBAi Ijip nunger o Israel na tsüngda koda balala ayu aji nenoki metettsü.”

⁸Tatem nung Mosai ashi, “ne yimsüsürtem ajak kü dangi arua parnok sasa kü madang apudaktsü, aser parnoki kü dang ne nüburtem ajakji anir oang ta ashitsü. Iba sülenjiang ni aotsü.” Aser Mosai ain adoka Farao tsüngdang nungi ao.

⁹Idangji KIBUBAi Mosa dang ashi, “Ijip lima nung kü sayatenyatem tali renloktsü asoshi Faraoi ne dang mangatsü.”

¹⁰Aser Mosa o Aron nati item sayatenyatem ajakji Farao tsüngdang inyak, saka KIBUBAi Farao temulung merangdaktsü aser pai Israel nungertem par lima nungi aotsü memela.