Read njo ANITET 12 Bible Online

ANITET 12 - njo bible

ANITET 12

¹ Ijip lima nung Mosa o Aron na dang KIBUBAi ashi,

²“Iba ita ya nenok asoshi küm nung mezüngbuba ita alitsü.

³Israel pur ajak dang nenoki ya shiang: Iba ita anogo ternübuba nung nisung shiai san chanu ka ka pei pei kibong shia asoshi agitsüla.

⁴Kibong kati dangbo san kaji magimatsüsa kibongji kanga ilara, par anasa aliba kiyonger den nisung yongsük yari san chanu ka agitsü akok. Ano san chanuji nisung kati kodaka achir iba yari nenoki apir inyakang.

⁵Shiruruji nai san rongnungi mesüra nabong nungi agitsü akok, saka aji tepung tarak maket aser küm ka chanu asütsüla.

⁶Iba ita anogo terpezünübuba nikongdang matong tashi nenoki ibaji yua atatsüla, aser iba nikongdang Israel nunger telok ajaki shiruruji tepsettsüla.

⁷Shir kibong nungsa aji chidir, parnoki azüji agizüka kikümdong anatsülen aser kiküp nung mezüloka yutsütsüla.

⁸Paonungjisa parnoki shiji mi nung tsüker, süngo-lio taku aser piyazü meinokba amtsük den achitsüla.

⁹Shiji tazü mesüra sor machitsüla, saka mi nung ronger, oda tekolak, tetsüng aser poknüng dena achitsüla.

¹⁰Anepdang tashi nenoki aji anünga mayutsüla; kar anüngzükra aji nenoki mi agi rongdoktsüla.

¹¹Nenoki yamai achitsüla: nenoki nangri kanger, tsüngsem semer, nenok mechi teka nung amer aji ilunga achitsüla. Ibai KIBUBA Süia Aoba Benjong lir.

¹²“Paonungjisa ni Ijip lima ajanga süitsü aser Ijip nung mezüng asoba jabaso aser mezüng mepuba shiruru ajak ni tepsettsü, aser Ijip nunger tsüngremtem anema ni o bendangtsü. Ni KIBUBA lir.

¹³Kechiaser kikümdong nung azüji nenok asoshi temaitsü alitsü; kodang nenok kikümdong nung azüji ngudir, ni nenok süia aotsü aser Ijip nunger dak atongba wara jagi nenok dak mekongshitsü.

¹⁴ “Nenoki iba anogo ya tebilemtetba amung ka, putu ajak nung ya metsüngareta amungtsüla. KIBUBAi inyakba mapatem bilemteta pa dang nenoki iba Benjongji yimsü ka ama KIBUBA dang amungtsüla.”

¹⁵KIBUBAi ashi, “Anogo tenet tashi piyazü meinokba am nenoki achitsü. Anogo mezüngnübuba nenoki ki nungi piyazü ajak endoktsüla, kechiaser shibaisa mezüngnü nungi tenetnü tashi piyazü enokba am chidir, iba nisung Israel nungi leptoktsü.

¹⁶Anogo mezüngnü aser tenetnübuba nung nenoki temeshi sentep ka akatsüla. Item anogotem nungjibo mapa kecha meinyaktsüla, saka nisung shiai kodaka achitsü tim aji dang renemtsü akok.

¹⁷“Piyazü meinokba Am Benjongji nenoki amungtsüla, kechiaser iba anogo nung ni nenok Ijip lima nungi anitet. Anungji ibai putu ajak nung teti asoshi nenok yimsü Benjong ka ama amungtsüla.

¹⁸Mezüngbuba ita nung anogo terpezünübuba nikongdang nungi metsür-kabuba nikongdang tashi nenoki piyazü enokba am kecha machitsüla.

¹⁹Anogo tenetnü nenok kidang piyazü kecha mungudaktsütsüla. Shibaisa piyazü enokba chidir iba nisungji aener saka sensopur saka Israel telok nungi leptoktsü.

²⁰Piyazü enoka yangluba kecha machitsüla, nenok kongsa lidir; nenoki piyazü menokba am dang achitsüla.”

²¹Idangji Mosai Israel tambur ajak jatener parnok dang ashi, “Nenoki oang aser kibong yari san chanuji shimteta süia aoba tenla tepsetang.

²²Aser nenoki esop tejeb ka bener arua su nung aliba azü nung metenang, aser su nung azüji kiküp aser kikümdang anatsülen mezülokang, aser nenok shinga anepdang tashi pei ki kikümbang nungi tetugu.

²³Kodang Ijip nunger tepsettsü KIBUBAi aji ajanga süidir, nenok kikümdang anatsülen aser kiküp nung azüji ngudir, pai nenok kiji ajanga süitsü, aser tesamatsüba tenyari nenok kidangi aita nenok tepsettsü pai memelatsü.

²⁴“Iba yimsü temelaba ya nenok aser nenok semchirtemi teti benshitsüla.

²⁵Kodang KIBUBAi nenok nem agütsütsü nangzükba amato nenok linük jagi arudir, nenoki ibai inyaktsüla.

²⁶Iba amung tetezü kechi? ta nenok chirtemi asüngdangra,

²⁷nenoki yamai langzütsü; ‘ibai KIBUBA nem tetushi agütsüba Süia Aoba Benjong lir. Kechiaser Ijip nung pai Israel kibongtem süia or Ijip nunger tepset, saka pai asenokbo kümzük.’ ” Idangji nüburtem apudak aser külem.

²⁸Aser Mosa o Aron na dang KIBUBAi melaba ama parnoki oa yamaji inyak.

²⁹Tang ayatrem nung Ijip lima nung aliba chuba menden nung amenba Farao mezüng jabaso nungi tepuokdak alirtem mezüng jabaso tashi aser mezüng mepuba shiruru ajak KIBUBAi tepset.

³⁰Paonungji Farao, pa tenzükertem aser Ijip nunger ajak shishi; aser Ijip ajonga nung mangyimba tulu liasü; kechiaser ki ka nungdanga masübaji maliasü.

³¹Aser paonungjisa Faraoi Mosa o Aron na jar ashi, “Na aser Israel nunger ajak apusoa oadokang! KIBUBAi ashiba ama pa külemtsü nenok kü nübur rongnungi oadokang.

³²Nenok san, nabong aser nashi ajak anir oang, aser nia moajangma.”

³³Ijip nungeri Israel nunger apusoa aotsü ajungshi kechiaser parnoki ashi, “Nenok idakisa lira onok ajak asütsü.”

³⁴Anungji amzü aser am ajepsaba susa parnok sü agi aleper tapubang nung apulok.

³⁵ Aser Mosai ashiba ama Israel nungertemi inyak, aser Ijip nunger dang nungi hon, taribi, aser süoshi meshizük.

³⁶KIBUBAi Ijip nungeri Israel nunger nem yimlibilem sayutsü mulungsentsü agütsü. Yamaji Israel nungertemi Ijip nunger akoksaja par rongsen bener ao.

³⁷Israel chirtem tetsür-tanur medeni tebur parnok meyi noklang trok shi Ramses nungi Sukkot tashi tetsüng agi jaja.

³⁸Tangar nisungtema telok tuluka, san, nabong nashi aser kiset shiruru ajak anir parnok den külemi ao.

³⁹Parnoki Ijip nungi amzü bener aruba jagi parnoki piyazü meinokba am yanglu, kechiyong ibaji piyazü meinoki liasü, kechiaser parnok Ijip nungi ilunga apusoa yok nung parnok asoshia chiyungtsü kecha merenemtet.

⁴⁰ Israel nungertem Ijip lima nung aliba mapangji küm noklang pezü ser semer liasü.

⁴¹Küm noklang pezü ser semer tatem buba küm nungji K IBUBA nüburtemi Ijip toktsür apuso.

⁴²Aser parnok Ijip nungi anitetba aonung K IBUBA i mita ata nung; iba kasa aonungji parnoki KIBUBA nem tetushi agütsütsü putu ajak nung mita ata.

⁴³Mosa o Aron na dang KIBUBAi ashi, “Süia Aoba Benjong ozüng itemi lir. Bendanger shinga nema ibai mechidaktsütsüla,

⁴⁴saka nai sen agi alizükba alar kar lira paji mejeptoktsür külen pai ibaji achitsü akok.

⁴⁵Khen atema semloka alir aser ayangi arur shingaia ibai machitsüla.

⁴⁶Koba kidangsa ibaji renemdir idakji dang aji achitsüla, iba shiji kimaia bener metugutsüla, aser shiruru teretji ka danga nenoki meraksatsüla.

⁴⁷Israel nungertem ajaki ibai benshitsüla.”

⁴⁸Ne den amunger aener kari KIBUBA Süia Aoba Benjong nung dennüra, tamasa par kidang alir tebur ajak mejeptokjang; aser pa yimsopur ka ama iba benjong nungji dendakjang. Saka memejeptokba tebur shingaia ibaji machitsüla.

⁴⁹Yimsopur aser nenok rongnung munga alir aener ajak asoshi ozüng ya kasa alitsü.

⁵⁰Mosa o Aron na dang KIBUBAi melaba ajak Israel nungertemi tashi anga inyak.

⁵¹Iba anogo nungjisa KIBUBAi Israel nungertem telok telokji Ijip nungi anitet.