Read njo ANITET 13 Bible Online

ANITET 13 - njo bible

ANITET 13

¹KIBUBAi Mosa dang ashi,

² “Mezüngbuba asoba tebur ajak kü nem bendanga agüjang. Nu menden lapokba mezüng asoba Israel nunger, aser shiruru mezüng mepuba saka kü meyong lir.”

³Mosai nüburtem dang ashi, “Ijip nunger alar tia nungi KIBUBA tashi tulu agi nenok anitetba iba anogo nung bilemtetang aser piyazü enokba am kecha machitsüla.

⁴Tanü iba Abib ita nung nenok apusor.

⁵Nenok tsürabur dang nangzükba lima: Kanan nunger, Hit nunger, Amor nunger, Hiv nunger aser Yebus nunger aliba lima mamatzü aser ninang mojitzü yima aliba lima jagi kodang KIBUBAi nenok anir arudir; nenoki iba benjong ya mezüngbuba ita nung amungtsüla.

⁶Anogo tenetnü tashi piyazü meinokba am achitsü aser tenetnübuba nung KIBUBA atema benjong ka alitsü.

⁷Item anogo tenetji songtema piyazü meinokba am achitsü aser piyazü enokba kecha nenok rongnung mesüra nenok litsü nung mungudaktsütsüla.

⁸Iba anogo nung nenok chir dang yamai shiang, ‘Ni Ijip nungi adokdang KIBUBAi ni asoshi kechi inyak iba yong ni ya inyaker.’

⁹KIBUBA ozüngji nenok bang nung alitsü asoshi ya nenok teka nung temaitsü ka aser nenok tenütsü nung tebilemtetba ka amai alitsü. Kechiaser KIBUBA tashi tait teka agi pai nenok Ijip nungi anitet.

¹⁰Nenoki iba yimsü benjongji küm shia mapang shitak nung amungtsüla.”

¹¹Kodang KIBUBAi nenok aser nenok tsürabur dang nangzükba Kanan limai nenokji anir arudir,

¹² nenoki nu menden lapokba mezüngbuba jabaso ajak aser nenok akaba shiruru tamasa mepuba shia nenoki KIBUBA asoshi bendanga yuang. Itemji KIBUBA meyong lir.

¹³Tamasa mepuba gado shiaji nenoki san chanu ka agi alangzükang, aji nenoki malangzükrabang nenoki gado tekongji mesener yujang. Nenok jabaso rongnung mezüng asoba jabaso ajak nenoki alangzüktsüla.

¹⁴Ne jabasoi tarutsü nung “Ya kechi tetezü?” ta asüngdangra, idangji nenoki pa dang shiang, “KIBUBA tashi tait teka agi pai Ijip nunger alar tia nungi asenok anitet.”

¹⁵“Kodang Faraoi matsüshi-i temulung meranga alar tia nungi asenok modaktsü, idangji KIBUBAi Ijip nung mezüng asoba jabaso aser, mezüng mepuba shiruru ajak tepset. Anungji nu menden mezüng lapoka mepuba kiset shiruru tepung ajak KIBUBA nem ni tenla agütsür, aser Ijip mezüng asoba jabaso ajak ni alangzüker.

¹⁶Ibai nenok teka aser tenütsü nung temaitsü ka ama alitsü, kechiaser KIBUBA teka tashi tait agi pai Ijip lima nungi asenok anitet.”

¹⁷Kodang Faraoi nüburtem odaktsü, Filistia lima ajanga aoba lenmangji tatsüba saka, Tsüngremi parnok iba lenmanglen jagi anir mao. Tsüngremi ashi, “Ashiko parnoki rara ajurudang parnok temulung melenshia kümer Ijip limai tanaben meyipa aotsü.”

¹⁸Saka pai lisem lima lenmang talangba, Temerem Tzüyim leni ani. Israel nungerji rara asoshi renemer Ijip nungi apuso.

¹⁹ Mosai Yosef teret aben, kechiaser Yosefi Yakob chirtem dang ajang ajanga azüngashidakja ashi, “Tsüngremi atangji nenok semdangtsü, aser idangji nenoki kü teret iba lima nungi bener aotsüla.”

²⁰Parnoki Sukkot toktsür arua Etham lisem lima atongtsü anasa arua anen.

²¹Aser KIBUBAi parnok jakdang lenmang anitsü asoshi anüngdang mepet tongshi ka aser aonung parnok nem tesangwa agütsütsü asoshi mi tongshi ka ta parnok jakdang ao, anungji parnoki aonung aser anüngdang jaja.

²²Anüngdang mepet tongshi aser aonung mi tongshi ta parnok jakdang liasü.