Read njo ANITET 14 Bible Online

ANITET 14 - njo bible

ANITET 14

¹Idangji KIBUBAi Mosa dang ashi,

²“Israel nungertem dang meyipa or Pihahirot jakdang Migdol aser Temerem Tzüyim tsüngda anenang ta shiang. Temerem Tzüyim anasa Baalzefon jakdang anendakjang.

³Israel nunger lisem lima nungji taolen maka nemzüya alitsü ta Faraoi bilemtsü.

⁴Ni Farao temulung merangdaktsütsü aser pai nenok aria arutsü. Saka Farao aser pa temerangertem ajak madak sentsüwangshi ni angutsü, aser Ijip nungeri ni KIBUBA ta metettsü.” Anungji Israel nungertemi parnok dang ashiba amaji inyak.

⁵Kodang nüburtem jena ogo ta Ijip chuba dang ashi, pa aser pa yimsüsürtemi nisungtem anema temulung meyipadok aser ashi, “Israel nunger asenok metenzüki parnok oadoktsüsa asenoki kechi inyak!”.

⁶Anungji pai pei kor talungtsü renemer pei temerangertem anir ao.

⁷Pai kor talungtsü tajungtiba noklang trok shimtet aser Ijip talungtsü ajak item madak tanishirtem dena anir ao.

⁸KIBUBAi Farao temulung merangdaktsü aser Israel nunger tasü ita aser KIBUBA tekümzükba nung takok ngua[4] oya aliba anema aria ao.

⁹Ijip nunger temerangertem, kor, talungtsü aser tanishirtemi Israel nungerji aria ao aser parnok Baalzefon jakdang Pihahirot anasa Temerem Tzüyimküm nung anena lia menep.

¹⁰Kodang Farao anasa aru, Israel nungeri parnok aria aruba Ijip nungerji angu, parnoki tsübuadok aser KIBUBA dang teyari asoshi ayimten.

¹¹Idangji parnoki Mosa dang ashi, “Ijip lima nung leper maliba yong onok lisem lima nung südaktsütsü nai anir aru asü? Ajiang! Ijip lima nungi anir adoka nai onok dak yamai kechiba benshir?

¹²Ijip nunger tenzüka lidi onok odang tokjang ta onoki Ijip nung ne dang meshika ma? Kechiaser lisem lima nung asü dangbo Ijip nunger tenzüka alitsü onok asoshi tajungba süla.”

¹³Aser Mosai nisungtem dang ashi, “Nenok tetsübu, marakzüi noktaka liang, aser KIBUBA tekümtet koba nenok asoshi pai tanü inyaktsü, aji reprangang; kechiaser tanü nenoki anguba Ijip nungerji nenoki tanaben kodanga mangutsü.

¹⁴KIBUBAi nenok asoshi raratsü, nenokbo ajemajema dang liang.”

¹⁵Idangji KIBUBAi Mosa dang ashi, “Kechiba nai teyari asoshi kü dang yamai ayimtener? Israel nunger dang tejakleni oang ta shiang.

¹⁶Ne mechiji mekanga tzüyim manung ne teka songtoka tzüji sadangang aser Israel nunger tzüyim tiyong nung ali takong manung jajatsü.

¹⁷Aser Ni Ijip nunger temulung kanga merangdaktsütsü, aser parnoki Israel nungertem aria aotsü, idangji Farao temerangertem, talungtsü aser item tanishirtem ajak madak kü sentsüwangshi angutsü.

¹⁸Kodang Farao talungtsütem aser par kor anishirtem madak ni takok ngudir, Ijip nungeri ni KIBUBA ta metettsü.”

¹⁹Idangji Tsüngrem tenyar shiba Israel nüburtem jakdang oya liasü, pai meyiper parnok süleni alu. Aser mepet tongshijia tejaklen nungi meyipa parnok süleni alu,

²⁰aser aji Ijip nunger tanendak aser Israel nübur tanendak tsüngda liasü. Ammang tepiyong mepet tongshi jagi Ijip nunger alidak tammang kümdaktsü, saka Israel nunger alidakbo tesangwa agütsü, anungji telok katia ka anasa maru.

²¹Idangji Mosai pei teka Temerem Tzüyim manung songtok, aser KIBUBAi aonung piyong anüdoklen mopung tesashi ka ondaktsü aser tzüyimji ali takong kümdakja sadang,

²² aser Israel nunger Temerem Tzüyim jagi ali takong manung ai. Parnok tajichilen aser tabelen ajaklen tzüji jara ama liasü.

²³Idangji Ijip nungeria parnok aria arua tzü jagi parnok kortem aser talungtsütem anir ai.

²⁴Sangwa mapang KIBUBAi mepet tongshi aser mi tongshi ajanga Ijip temerangertem madak reprangzüka yok, aser parnok mangmangdaktsü.

²⁵Pai parnok talungtsütem tetsüng sot nung parnoki kanga timtema anishi, anungji Ijip nungeri ashi, “Asenok Israel nunger madang nungi jena odi, kechiaser KIBUBAi parnok asoshi asenok anema rarar.”

²⁶Idangji KIBUBAi Mosa dang ashi, “Ijip nunger talungtsü kortem aser parnok temerangertem madak tzü agi atsüngbanga odaktsütsü asoshi ne teka Temerem Tzüyim madak songtokang.”

²⁷Mosai pei teka Temerem Tzüyim madak songtok, aser anepdangbo tzüji mezüng ama atsüngbanga aküm. Aser Ijip nungeri tzü nungi ajentsü merang, saka KIBUBAi parnok Tzüyim nungji araksetdaktsü.

²⁸Aser tzüji meyipa arua parnok talungtsütem, kortem aser temerangertem oda Israel nunger aria aruba Farao temerangertem kwika tzü jagi ai, parnok kata mejenbuteti samatsü.

²⁹Saka Israel nungerbo tzüyim nungji ali takong manung jaja, aser parnok asoshi tzüji jara ama parnok tajichi aser tabelen anatsülen liasü.

³⁰Iba anogo nung KIBUBAi Israel nunger Ijip nunger ket nungi kümzük aser Israel nungeri Ijip nungerji tzüyimküm nung tasü aliba angu.

³¹Kodang Ijip nunger anema KIBUBAi mapa tulu inyakbaji Israel nungeri angu, parnoki KIBUBA tsübu, aser parnoki KIBUBA aser pa tenzüker Mosa dak amang.