Read njo ANITET 15 Bible Online

ANITET 15 - njo bible

ANITET 15

¹ Idangji Mosa aser Israel nungertemi KIBUBA dang ken tenlokja ashi: “Ni KIBUBA dang ken atentsü, kechiaser pai sentsüwangshia takok nguogo. Kor aser idakji asangertem pai tzüyim nung ajungoktsüogo.

²KIBUBAji kü tashi aser kü ken; pa kü tekümtet kümogo. Paji kü Tsüngrem lir aser ni pa tesünep asangtsü, kübu nunger Tsüngrem, aser ni pa ulutsütsü.

³KIBUBAji temeranger ka lir; pa tenüngji KIBUBA lir.

⁴Farao talungtsütem aser temerangertem telok pai tzüyim nung ajungoktsüogo; yimsüsürtem teshimtet arkotongtem Temerem Tzüyim nung araksetdaktsüogo.

⁵Tzü tarok jagi parnok mobang; lung ka ama parnok tzüyim telungi iogo.

⁶Oh KIBUBA, ne teka tajichi tashi ain nung sentsüwangshi lir. Oh, KIBUBA, ne teka tajichi agi tsükchir anüka ajasatsüogo.

⁷Ne tamarenba tashi tulu agi nai ne tsükchirtem atsüngdokogo; ne ain chiokba agi parnok monü ama rongtoktsüogo.

⁸Ne teni nungi apuoktsüba agi tzüyim telung tashi nungtenadok, tzümetsüngji jara ka ama noktakadok, tzüyim telung tzüji telung kümadok.

⁹Tsükchiri asüküma ashi, ‘Ni parnok aria aotsü, parnok ajatettsü, ni temakzükba osettem lemsa-a agitsü; parnok madak kü tejangraba tip atemtsü; ni kü nok atsütettsü, kü teka agi parnok samatsütsü.’

¹⁰Saka nai ne tangula mopung ondaktsü, aser tzüyimi parnok mobang; Yongmenyin ama tzüyim tulu tarok jagi parnok telungi alu.

¹¹Oh KIBUBA na mesük tsüngremtem rongnung shiba ali? Temeshiba nung sentsüwangshia, sentsüwangshi nung tetsübutsü ka, na mesüka tesüngmangtsü sayatenya mapa inyakba nung shiba ali?

¹²Nai ne teka tajichi songtok, aser ali-i parnok meyokadok.

¹³Nai alangzükba nüburtem ne temeim takang agi len ani; ne tashi ain agi parnok ne temeshidak limai ani.

¹⁴Kintemi aji angashidang tsübua atententsü, Filistia nunger dak tetsübutsü agi atong.

¹⁵Edom tongti purtemi aoksatsü; Moab nunger tulutem atententsü, Kanan nungertem tasü peletadoktsü.

¹⁶Tetsübutsü aser tajemtsü agi parnok atongtsü. Oh KIBUBA, ne nüburtem mesüitem tashi, alar tia nungi nai anitetba ne nüburtem mesüitem tashi, ne tashi tait teka agi parnok lung ka ama marakzüi kümdaktsü.

¹⁷Oh KIBUBA, na alitsü nai yangluba talidak; ne teka agi yangluba tekülemdaki, nai parnok anitet, aser pei tenem nung parnok yutsütsü.

¹⁸KIBUBAi teti tatem makai chubatsü.”

¹⁹Israel nunger tzüyim tiyong nung ali takong manung jajadaktsü. Saka kodang Farao kortem aser talungtsütem den par temerangertem tzüyim jagi ai, KIBUBAi parnok madak tzüji arudaktsü aser parnok mobang.

²⁰Idangji Aron teyi ainkarla Miriami la teka nung asüm aben aser tetsür ajaki la sülen asüm tema tsüngsanga ao.

²¹Miriami parnok dang ken yamai tenyu: “KIBUBA dang nenoki ken tenang, kechiaser pai sentsüwangshia takok nguogo; Kor aser iba nung asangba pai tzüyim telungi ajungoktsüogo.”

²²Kodang Mosai Israel purtem Temerem Tzüyim nungi aniteter külen Shur linüki aru, parnoki lisem lima nung anogo asemnü jaja-aka tzü mangu.

²³Aser kodang parnoki Marai aru, parnoki Mara tzüji mejemtet, kechiyong tzüji taku liasü; anungji iba tenüng Mara[5] ta aja.

²⁴Aser nisungtemi Mosa anema nemnema ashi, “Asenok kechi ajemtsü?”

²⁵Aser pai KIBUBA dang ayimten; aser KIBUBAi pa dang süngdong ka sayu, aser pai aji tzü nung enoktsü nung tzüji tanang aküm. Yangji KIBUBAi parnok asoshi yimsü-ozüng ka yanglu, aser yangji pai parnok tendang.

²⁶Pai ashi, “Nenoki KIBUBA Tsüngrem ola angadi süra, pa tsüngdang kechi shitak aji inyakdi süra, aser pai melabatem nung temulung agütsüdi süra, Ijip nunger dak ni tongdaktsüba tashitak kata ni nenok dak metongdaktsütsü; kechiaser na anebtsüba KIBUBAji ni lir.”

²⁷Idangji tzüpokdak terana aser asangdong neter alidak, Elim tonga parnok aru, aser yangji parnok tzü anasa anen.