Read njo ANITET 16 Bible Online

ANITET 16 - njo bible

ANITET 16

¹Idangji Israel nunger Ijip nungi adoker külen ita tanabuba anogo terpungububa nung Elim nungi apusoa Sinai aser Elim tsüngda nung aliba Sin lisem limai aru.

²Aser Israel nungeri lisem lima nungji Mosa aser Aron na anema nemnem,

³aser tena dang ashi, “Kodang onoki Ijip nung shi aonpo anasa mener onoki chinüba chiyungtsütem tiptema chia liasü, idangto KIBUBAi onok tepsetogo ta lilasang koda jungla. Saka iba nüburtem ajonga taya agi lisem lima nung südaktsütsü nenoki anir aru.”

⁴ Idangji KIBUBAi Mosa dang ashi, “Ni nenok asoshi anüng nungi chiyungtsü tsükdaktsütsü. Anogo ka peri chiyungtsü dang parnoki oa anogo shia bendentsüla. Yamaji iba nüburi ozüng nung jajadisü mejajalir ni tendangtsü.

⁵Troknübuba nungbo parnoki bener arubaji anogoshia bendenba dang nungi anasü asütsüla.”

⁶Anungji Mosa o Aron nati Israel nunger dang ashi “Ijip lima nungi nenok anitetbaji KIBUBA ta nikongtsütsü nenoki metettsü.

⁷Anepdang nenoki KIBUBA sentsüwangshiji angutsü, kechiaser nenoki pa anema nemnemba pai angashiogo. Nenoki onok anema nemnemtsüsa onoka shir?”

⁸Ano Mosai ashi, “Nenok nem nikongdang shi aser anepdang nenoki chinüba ama amtsük agütsübaji KIBUBA lir, kechiaser nenoki pa anema nemnemba pai angashiogo, aser onoka shir aka! Kodang nenoki onok anema nemnemer, nenoki atangji KIBUBA anema nemnemer.”

⁹Mosai Aron dang ashi, “Israel nunger ajak KIBUBA tsüngdangi arung ta shiang, kechiaser parnoki nemnemba pai angashiogo.”

¹⁰Aroni Israel nunger telok den jembidang parnoki, lisem lima len reprang, aser KIBUBA sentsüwangshi mepet nung adok.

¹¹KIBUBAi Mosa dang ashi,

¹²“Israel nungeri nemnemba ni angashiogo, parnok dang ya shiang, nikongdang nenoki shi achitsü, aser anepdang nenoki chinüba ama amtsük chia tip atemtsü, aser nenoki Niji nenok KIBUBA Tsüngrem ta metettsü.”

¹³Anungji nikongdang opiya ozütem atua tanendak zükbanga atem aser anepdang tanendak meketa azüngtsü tanang aika tsük.

¹⁴Kodang azüngtsüji akong, telong atenba azüngtsü jagi jang ama telonglong lisem nungji liasü.

¹⁵ Kodang Israel nungeri aji angu, parnok kati ka den jembitepa ashi, “Ya Kechi?” kechiaser parnoki aji kechiar memetet liasü. Mosai parnok dang ashi, “Ya nenok KIBUBAi agütsüba chiyungtsü lir,

¹⁶KIBUBAi melabaji ya lir; nenok nisung shia pei chishi shitenang. Nenok pei süki nung aliba nisung shia asoshi jangku ka ka shitenang.”

¹⁷Anungji Israel nungertemi yamai inyak, kari tali, kari matoksai ta shiten,

¹⁸ Kodang jangku jagi aji atakdang, shibai tali shiten pa anünga maka, aser shibai tera dang shiten pa meperi-i maküm; oda nisung shia pei peri dang shiten.

¹⁹Aser Mosai parnok dang ashi, “Nisung shingaia anepdang tashi aji mayutsüla.”

²⁰Saka kari Mosai ashiba mangai anepdang tashi ayu, aji mesen yia teshinem menem, anungji Mosai parnok anema ain adok.

²¹Anepdang shia nisung shiai pei chishi shiten; aser anü tsüka akümdang aji yimsa-a oadok.

²²Troknübuba nungbo parnoki anasü agi tali chiyungtsüji shitena ayu, nisung shia jangku anana. Kodang telok tanishir ajaki arua Mosa dang iba indang ashi,

²³ pai parnok dang langzü, “KIBUBAi melaba ozüngji ya lir: Asüng meshimeshia anisüngzükba anogo. KIBUBA atema temeshi amungnü. Nenoki kechi amtsük awangtsü ali, aji wangang, aser kechi temolutsü ali aji moluang. Tanüngbaji anepdang tashi nenok asoshi yuang.”

²⁴Mosai ashiba ama parnoki aji anepdang tashi ayu, aser aji meraksai mesüra mesen meyi-i liasü.

²⁵Mosai ashi, “Aji tanü chiang, kechiaser tanü KIBUBA asoshi Amungnü lir, tanübo nenoki aji moapu nung mangutsü.

²⁶Nenoki anogo troknü chiyungtsü bendentsü, saka tenetnübubaji amungnü lir, panüji kecha malitsü.”

²⁷Tenetnübuba nunga nisung kari chiyungtsü bendeni ao, saka kecha mangu.

²⁸Idangji KIBUBAi Mosa dang ashi, “Nenoki ni melaba aser kü ozüngtem kopiga mebenshi-i alitsü?

²⁹Ajiang, Ni KIBUBAi nenok nem amungnü agütsü anungji nenok nem troknübuba nungbo ananü atema amtsük agütsüogo. Nenok nisung shia pei talidak dang liang, nisung shinga tenetnübuba nungbo pei talidak nungi metugutsüla.”

³⁰Anungji tenetnübuba nung nüburtemi anisüngzük.

³¹Israel kini iba chiyungtsü dangji “Mana”[6] ta aja, aser aji koriander süngjang ama tereprangtsü temesüng aser tachitsü ninang mochitzü den yangluba amtsük ama liasü.

³²Aser Mosai ashi, “Ya KIBUBAi melaba ozüng lir, ni nenok Ijip lima nungi aniteter lisem lima ajanga anir arudang kechi agi nenok mesüa liasü, aji nenok semchirtemi angutsü atema putu ajak asoshi jangku ka sünga aji rizünga yuang.”

³³ Mosai Aron dang ashi, “Mori ka bena arua jangku ka sünga manaji enokang aser nenok semchirtem putu ajak asoshi KIBUBA tsüngdang aji rizünga yuang.”

³⁴KIBUBAi Mosa dang melaba ama Aroni aji Ozüng Süngden jakdang rizünga ayutsü ataloka yutsü.

³⁵ Nisung aliba linük kati parnok maru tashi küm lir tashi mana agi mesü. Yamaji Kanan linük litsü matong tashi parnoki mana chia liasü.

³⁶(Jangku[7] kaji yimchi ka metsürti shilem nung ka lir.)