Read njo ANITET 17 Bible Online

ANITET 17 - njo bible

ANITET 17

¹Israel nunger telok ajak Sin lisem lima nungi apusoa KIBUBAi melaba ama alinük balala nung anen anena ao. Parnoki Refidim nung anen, saka idakji parnok asoshi tajemtsü tzü maliasü.

²Anungji parnoki Mosa den bangsentepa ashi, “Onok nem tajemtsü tzü kua?” Mosai langzü, “Kechiba nenoki kü den bangsenteper aser nemnemer? kechiba nenoki KIBUBA atitanger?

³Saka nüburtemji kanga tzüra nung parnoki Mosa anema nemnem. Parnoki ashi, Onok, onok chirtem aser onok kiset shirurutem tzüra agi südaktsütsüsa kechiba nai onok Ijip lima nungi aniteter aru?”

⁴Idangji Mosai KIBUBA dang ayimtena ashi, “Item nüburtem dang ni kechi inyaktsü? Parnoki kü dak lung agi aontsü renema lir.”

⁵KIBUBAi Mosa dang ashi, “Ne den Israel tambur kar anir parnok tejakleni oang. Aser Nile ayong dak azükba mechi to ne teka nung amang.

⁶Horeb nung ne jakdang lung manung ni noktaktsü. Aser nai lung dakji zükang aser nüburtem asoshi tajemtsü tzü idak nungjagi adoktsü.” Mosai Israel tamburtem jakdang yamaji inyak.

⁷Mosai iba meta dangji Massa aser Meriba[8] ta aja, kechiaser Israel nungertemi KIBUBA anema nemnem aser pa atitanga ashi, “KIBUBAji asenok rongnung ali asü mali?”

⁸Idangji Amalek nunger arua Refidim nung Israel purtem den rara.

⁹Mosai Yihusua dang ashi, “Amalek nunger den asenoki raratsü asoshi nüburtem rongnung shimang. Ni asüng Tsüngrem mechi kü ket nung amer tenem kolak nung noktaktsü.”

¹⁰Mosai pa dang melaba ama Yihusuai inyak aser Amalek nunger den rara. Mosa, Aron, aser Hur tenem kolak jagi atu.

¹¹Kodangsa Mosai pei teka mekanga liasü idangji Israel nungeri akok, aser kodangsa pa teka aludir, Amalek nungeri akok.

¹²Kodang Mosa teka mekangba ania aküm, Aron aser Hur nati lung ka bena arua ayu aser iba manung Mosa amen, aser tena pa anasa kati külen, kati külen ta pa teka ajungketa amer anü malu tashi mainshi-i liasü.

¹³Yamaji Yihusuai Amalek nunger ajak nok agi laodaktsü.

¹⁴ Idangji KIBUBAi Mosa dang ashi, “Tebilemtettsü atema ibai kaket ka nung züluang. Yihusua narong agi angashia ibaji züngang. Ni anüng kübok Amalek nunger indang mebilemtettsüsa ni parnok samatsütsü.”

¹⁵Mosai tenladak ka yanglu aser iba dang “Yihova-nissi” ta aja.

¹⁶Pai ashi, “KIBUBA nisan talang kati ajungketang! KIBUBAi Amalek nunger anema putusa putu raratsü.”