Read njo ANITET 18 Bible Online

ANITET 18 - njo bible

ANITET 18

¹Tang Median putir Mosa toko, Yethroi Tsüngremi Mosa aser Israel nübur Ijip lima nungi koda anitet, item ajak indang angashi.

² Mosai pei kinungtsü Zippora Yethro dangi yokba pai angazük,

³ aser lar jabaso anata dena yok, jabaso ka tenüngji Gershom ta aja, kechiaser pai ashi, “Ni bendang lima nung aenersa liogo.”

⁴Aser tangar tenüngji Eliezer[9] ta aja, kechiaser pai ashi, “Kübu nunger Tsüngrem kü teyari liasü, aser pai ni Farao nok nungi kümzük.”

⁵Aser Tsüngrem tenem nung Mosa anena liasü, ajagi Yethroi Mosa tebutsü aser lar jabaso anir atu,

⁶aser kati Mosa dang ashi, “Ajiang, neko Yethro, ne dangi, nebutsü aser lar jabaso ana den arudar.”

⁷Anungji Mosai pa toko den ajuruteptsü ao aser pa madang apudak aser kanga pelatep, aser parnok junga ali mali asüngdangtepa Mosa süki telungi ai.

⁸Israel pur kümzüktsü asoshi KIBUBAi Farao aser pa nüburtem dak kechisa inyak; item ajak indang Mosai toko dang ashi. Ano lenmang nung timtem tuokrong ajuruba nungi KIBUBAi parnok koda kümzük item indang ashi.

⁹Kodang Israel pur kümzüktsü asoshi KIBUBAi Ijip nunger dak inyakba osang Yethroi angashi, pa kanga pela-a liasü,

¹⁰aser Yethroi ashi, “Ijip nunger ket aser Farao ket nungi kümzüksang KIBUBA sangang! KIBUBA shibai pei nüburtem alar tia nungi anitet, pa sangang!

¹¹KIBUBAji tsüngremtem ajak dang nungi tuluba ta ni tang meteter, kechiyong Ijip nungeri Israel pur dak kanga mezüngmeshia benshi nung pai ibaji inyak.”

¹²Idangji Mosa toko Yethroi Tsüngrem asoshi tarongba tenla aser tetepsetba tenlatem bena arua agütsü aser Aron aser Israel tamburtem ajak Tsüngrem tsüngdangi arua Mosa toko den amtsük achi.

¹³Tasüngji Mosai nüburtem rongnung ken-o mangatettep bendangtsü amen, aser nüburtemi anepdang nungi nikongdang tashi Mosa meketa noktaka ali.

¹⁴Kodang pai nüburtem dang inyakba ajakji tokoi angu, pai ashi, “nüburtem asoshi nai yamai inyakba ya kechi? kechiba ne kija dang amener aser nüburtem anepdang nungi nikongdang tashi noktakdaktsür?”

¹⁵Mosai toko dang langzü, “Kechiaser nüburtemi Tsüngrem nungi asüngdangtsü kü dangi arur.

¹⁶Kodang nisung ana tsüngda nung mangatettep ken-o ka arudir parnok kü dangi arur, aser koba shitak aji ni bendanger; aser parnok dang Tsüngremer telatet ozüng ni metetdaktsür.”

¹⁷Idangji Mosa tokoi ashi, “Nai inyakba mapaji tajung masü.

¹⁸Na aser ne dangi aruba nübur ajak anisetadoktsü; kechiaser mapaji na asoshi onsara taret lir, ne kijai dangbo ibai inyaktsü makoktsü.

¹⁹Nai kü dang angang, ni ne nem tasa kar agütsüdi, aser ne den Tsüngrem dena liang. Nüburtem atema Tsüngrem tsütsü na sang, aser parnok kenotemji Tsüngrem dangi bener arung.

²⁰Nai parnok dang ozüng, aser telemtetba sayuang, aser parnoki kechi nung jajatsü aser kechi mapa inyaktsü aji nai parnok dang sayutsüla.

²¹Iba dak alaka nüburtem nungi Tsüngrem tsübuba, süpokrem sempaba, ochishir nisungtem aser mapa akoktsüba pur rongnungi meyirijang, noklang, tenem aser ter madak yimsüsütsü shima yuang.

²²Nüburtem madak mapang ajak nung parnok nem o bendangdakjang. Ken-o tulu tasaktemji ne dangi bener aruba dak alema, tila ajak parnok sasa bendangdakjang. Anungji parnoki yamaji ne khu lemsateptsü, aser na asoshi aji tepungbaba aser temelaba alitsü.

²³Nai yamaji inyakra, aser Tsüngremi ne dang yamaji anisüngzük agütsütsü, aser nüburtema pei talidaki tesünep nung aotsü.”

²⁴Anungji tokoi ashiba ama Mosai anga, aser yamaji inyak.

²⁵Pai Israel nunger ajak rongnungi mapa akokertem shim aser parnokji meyirijang, noklang tenem aser ter madak tanishir kümdaktsü.

²⁶Mapang ajak nung parnoki nüburtem tsüngda ken-o bendang, aser ken-o tasak Mosa dangi abenba dak alaka ken-o tila ajak parnoki pei sasa bendang.

²⁷Mosai toko dang tepila o ashi, aser Yethroi pei kidangi meyipa ao.