Read njo ANITET 19 Bible Online

ANITET 19 - njo bible

ANITET 19

¹Israel nunger Ijip lima nungi adoker külen ita asembuba anogo mezüngnü parnok Sinai lisem limai aru.

²Parnok Refidim nungi apusoa Sinai lisem limai aru, aser Sinai tenem jakdang anen.

³Aser Mosa Tsüngrem dangi atu. KIBUBAi tenem nungi Mosa aja aser ashi, nai yamai Yakob kidong aser Israel nungertem dang shiang,

⁴ “Ni KIBUBAi Ijip nunger dak kechi inyak, aser koda mungzü tashikang manung nenok kümzüka kü dangi anir aru, aji nenoki nguogo.

⁵ Tang nenoki kü dang angadi süra, aser kü tezüngzüktepba benshidi süra, idangji kin ajak madak nenokji kü senti nübur asütsü, kechiaser ali ajak kü meyong lir,

⁶ni asoshi nenok putir yimli ka aser temeshi kin ka alitsü. Nai Israel nunger dang item o ashitsüla.”

⁷Anungji Mosai lua nüburtem rongnung tamburtem ajak jar KIBUBAi pa dang melaba ajak ashi.

⁸Idangji nüburtem ajak külemi langzü, “KIBUBAi ashiba ajakji onoki inyaktsü.” Aser Mosai nübur otemji KIBUBA dang ashi.

⁹KIBUBAi Mosa dang ashi, “Angang, ni ne den jembidang nüburtemi angashitsü, aser ano ne dang teti amangtsüsa, ni ne dangi mepet temelem nung arur.”

¹⁰KIBUBAi Mosa dang ashi, “Nüburtem dangi oang, aser tanü o asüng na nai parnokji meshiteta yuang aser parnok süoshi shitokdakjang,

¹¹aser tasemnübuba asoshi renema liang: kechiaser tasemnübuba nung nisung ajak tsüngdang Sinai tenem manung KIBUBA alutsü.

¹²Nai nüburtem asoshi arrtsü meketa yuang aser shiang, nenoki tenem jagi matutsü, aser arrtsü nungji mekongshitsü atema kümdangang; shibaisa tenem nungji kongshidir atangji paji südaktsütsü.

¹³Shingaia pa dak mekongshidang pa lung agi mesüra lijak agi kaseta endoktsüla. Shiruru saka nisung saka taküm malitsü. Saka kodang jangzü mapang talangka apudir, idangjibo parnok tenem jagi atutsüla.”

¹⁴Idangji Mosai tenem nungi nüburtem dangi alua parnok meshiteta yutsü, aser parnoki pei süoshi shitok.

¹⁵Mosai parnok dang ashi, “Tasemnübuba asoshi renema liang. Tetsür tebur medemba nungia pila liang.”

¹⁶ Tasemnübuba anepdang tenem manung tsüngmok aser tsüngpret den mepet temelem, aser jangzü ola kanga tulu liasü, anungji tanendak aliba nüburtem ajaki atenten.

¹⁷Tsüngrem den ajuruteptsü Mosai nüburtemji tanendak nungi anir adok; aser parnok tenem tsüng nung noktak.

¹⁸Sinai tenem ajak mokozü agi asüng; kechiaser iba madak KIBUBA mi nung alu. Mokozüji misem mokozü amai atu aser tenem ajak kanga anokshi.

¹⁹Jangzü olaji tali tesashiba aküm, Mosai Tsüngrem den jembi aser Pai tsüngmok nungi pa dang langzü.

²⁰KIBUBA Sinai tenem kolaki alua pai Mosa tenem kolak jagi aja, aser Mosa atu.

²¹KIBUBAi pa dang ashi, “Nüburtemi nungtepa KIBUBA reprangdang parnok aika sama-a lir, luang aser parnok dang tekümdangtsü o shiang.

²²Putirtema shirnok ni anasa arudir, parnok sasa meshitetdakjang, aji oda mesüra ni parnoka merenshitsü.”

²³Mosai KIBUBA dang ashi, “Nüburtemi tenem jagi matutsü, kechiaser nai onok nem tekümdangtsü o agütsüogo; kechiaser onok dang tenem meketa arrtsü ayutsü nai mela, aser aji meshitettsü ashi.”

²⁴KIBUBAi langzü, “Luang aser ne den Aron anir atung. Saka putirtem aser nüburtemi arrtsü atena kü dangi matutsüla, aji oda mesüra ni mit adoka parnok merenshitsü.”

²⁵Anungji Mosai nüburtem dangi lua KIBUBAi pa dang ashiba o ajak ashi.