Read njo ANITET 2 Bible Online

ANITET 2 - njo bible

ANITET 2

¹Iba mapang nungji Levi kidong nungi nisung kati Levitsür ka agi;

²Tetsürji mashisa aküm aser jabaso ka aso; aser lai pa jabaso tajung ka ta ngua, lai pa ita asem miima ayu.

³Aser kodang lai pa miimbangtsü makok ta ajitet, tzütok molok ka bena arua; temenateptsü aser süngtzü agi nübang; aser lai tanurji idakji ajungoker ayongküm rangbangnü nung yutsü.

⁴Tenu dakji kechi atalokdir ta teyi-i apiga nung noktaka ata-a liasü.

⁵Farao chubar jala ayong nung tzü chigutsü alu, aser lar kilitsürtem ayongküm nung senzüdang aoksa-a rangbangnü nung molokji lai angu, aser aji bena arutsü lai kilitsür ka yok.

⁶Aser lai aji lapok, aser tanurji angu; aser ajiang tanur jagi ajeb. Aser lai pa apayu, aser ashi “Ibai Ibri chir rongnung ka lir.”

⁷Idangji tanur teyi-i Farao jala dang asüngdang, “Na asoshi Ibritsür rongnungi nubentsür ka bushitsüdi ni?”

⁸Farao jalai langzü, “Hai Oang”. Anungji tetsürji oa tanurba tetsüji aja.

⁹Farao jalai ashi, “Iba tanur ya bener oa ni asoshi bentsüang aser ni ne nem taa agütsütsü.” Anungji lai tanurji bener oa bentsü.

¹⁰Kodang tanurji tain aküm, lai pa Farao jala dangi anir aru aser pa lar chir aküm. Lai pa tenüng Mosa ta aja kechiaser lai ashi, “Ni pa tzü nungi ajungtet.”

¹¹ Mosa tain kümer kenü pei nübur rishikangshiba reprangdangtsü ao. Pei adianu Ibri nunger ka dang Ijip nunger kati zükya angu.

¹²Mosai pa meketa reprang, aser kodang pai nisung shinga mangu, pai Ijip nungbaji tepset aser lisem agi yabanga yutsü.

¹³Tasüngji pa arudang Ibri nunger ana raratepa angu, aser tai inyaksang dang pai ashi, “Kechiba nai ne medemer dak azüker?”

¹⁴Nisungba jagi langzü, “Shibai na onok madak yimsüsür aser obendanger ka kümdaktsü? Ijip nungba tepsetba amato nai nia tepsetnür asü?” Idangji Mosai tsübua pei sasa ashi, “Ni inyakba mapato nisungtemi metetogo.”

¹⁵Kodang chubai ya angashi, pai Mosa tepsettsü bushi, saka Mosa Midian limai jena oa idakji ali, aser pai tzübu ka anasa amen.

¹⁶Midian nung putir ka jala tenet liasü, parnoki tebu san telok nem tzü jemdaktsütsü asoshi tzüpong sünga tzü ata.

¹⁷Saka sannükertem kar arua parnok aridok; saka Mosai noktaka parnokji kümzük aser pai yaria san telok nem tzüji jemdaktsü.

¹⁸Kodang parnok tebu Ruel dangi meyipa aru, pai asüngdang, “Kodaser tanübo nenok yamai kara-a aru?”

¹⁹Parnoki langzü, “Sannükertem ket nungi Ijip nunger kati onok kümzük. Pai onok atema tzüa tatsü, aser santem nema tzü jemdaktsü.”

²⁰Aser pai jalatem dang asüngdang, “Pa kong lir? Kechiba nenoki nisungbaji odang toktsü? Asenok den chiyungtsüsa pa jaang.”

²¹Mosai nisungba denji alitsü mulunga liasü, shibai pei jala Zippora Mosa nem kinungtsü asütsü agütsü.

²²Lai pa nem jabaso ka sotsü, aser Mosai Pa tenüng Gershom ta aja, kechiaser pai ashi, “Bendang lima nung ni aenersa ali.”

²³Küm ishika süir külen Ijip chubaji asü, saka Israel chirtem timtem tekangshi tali dang aküm, anungji parnoki teyari asoshi nünga ayimten. Parnok alar tia nungi tanüngba olaji Tsüngrem dangi atu.

²⁴ Tsüngremi parnok olaji angashi, aser Abraham, Isak aser Yakob den pai tezüngzüktepba ayuba bilemtet.

²⁵Pai Israel chirtem alar tia nung alibaji ngua parnok asoshi aria bilem.