Read njo ANITET 21 Bible Online

ANITET 21 - njo bible

ANITET 21

¹“Parnok madang item yimsüozüngtem lateta yujang,

² nai Ibri nunger alar ka alira, pai na küm trok tenzüktsü. Küm tenetbuba nung kecha talang magütsüi pa chioktsüla.

³Pa kibong mekümi kija arua lira, pa kija dang aotsü, saka pa kinungtsü den arua lira, pai pei kinungtsü den aotsü.

⁴Pa kiburi pa nem kinungtsü ka agüja lira aser pa nem jala-jabaso soja lira, kinungtsü aser lar chirtemji kibur meyong alitsü, aser pa kija dang aotsü.

⁵Saka alar jagi ni kü kibur, kübutsü aser kü chirtem meimer, aser nüji küma moner ta shira,

⁶idangji pa kiburi Tsüngrem tsüngdangi pa anir aotsü; aser kishi mesüra kikümbang nung pa noktaka yutsütsü aser pa kiburi merang shijok agi pa tenarong atutsü. Idangji pa teti asoshi par lar akümtsü.”

⁷“Nisung kati pei jala alar asütsü asoshi yokra, lar teburtem ama labo nüji küma meyoktsü.

⁸Lai pei kibur shibai pei asoshi la ayu, pa mepeladaktsüra, idangjibo pai la meyipa alangzüktsütsüla; kiburi la dang timi mebenshi nungji pai la bendanger dang ayoktsü pa dak tashi malitsüla.

⁹Pai pei jabaso nem la agidaktsüra, pai la dang jala ka ama benshitsüla.

¹⁰Nisung kati kinungtsü anabuba agira, pai mezüng agiba kinungtsü nem chiyungtsü, süoshi aser la kiyimba tim shilem ajema mekümdaktsütsüla.

¹¹Pai la dang item tim mapatem meinyakra, lai pa nem sen talang kecha magütsüi la aotsü akok.

¹² “Shibai nisung dak zükdir aser pa tepsetdir pa atangji südaktsütsüla.

¹³ Saka nisungba jagi ibaji inyaktsü mebilemi inyakadokra aser aji Tsüngremi ataloktsüba ka süra, paji ni shimtettsüba yimti kati jena aotsü, aser yangji pa jenoktsü.

¹⁴Saka nisung kati asa-a dang pei kiyonger tepsettsü tasa asara, kü tenla sabang nungi pai anir oa pa südaktsütsüla.

¹⁵“Shibai pei tebu mesüra tetsü dak zükdir, atangji südaktsütsüla.

¹⁶ “Tangar dang ayoktsü mesüra pei kidang alar ama ayutsü asoshi shibai nisung auyadir, pa atangji südaktsütsüla.

¹⁷ “Shibai pei tebu mesüra tetsü atakatemdir, pa atangji südaktsütsüla.

¹⁸“Nisung ana raratep dang kati ka dak lung agi onra, mesüra teka agi tsüngra, aser teyiruba nisungji tasütsü mesüi yipten nung ontaka alitsüsa kümra;

¹⁹aser pai saker pei mechi amer jajaa otetra, shibai azük paji memerenshitsü, saka nübutsük asoshi pai item taa agütsütsü, aser pa junga maküm tashi anebalutsüla.

²⁰“Nisung kari pei ajok agi par alar mesüra alatsür dak zükra, aser alarji süadokra, nisungbaji merenshitsüla.

²¹Saka alarji anogo ka ana nung jungadokra kiburji memerenshitsü. Kechiaser alarji pa rongsen ama lir.

²²“Teburtem raratepdang mashisa aliba tetsür ka dak zükshia tanurji ano jungi südaktsüra, saka la dak tamajung kecha matalokra; tetsürla kinungpui pa dang meshiba ama atangji pa dang senchi achitsüla, aji obendangeri lemtettsüba ama pai agütsütsü tim.

²³Saka tetsürlaji kanga mejungi yiruadokra pai taküm melen taküm agütsütsüla,

²⁴ tenük melen tenük, tepu melen tepu, teka melen teka, tetsüng melen tetsüng.

²⁵Tarongba melen tarongba, zübu melen zübu, tazükba melen tazükba.

²⁶“Nisung kari pei alar mesüra alatsür dak tenük nung zükra aser aji raksatsüra, pai tenük atema alarji chiokadoktsüla.

²⁷Aser alar mesüra alatsür dak pai tepu ka züktoktsüra, iba atema alarji chiokadoktsüla.

²⁸“Nashi pungchi kati tebur mesüra tetsür kar dak tasütsüsa tongra, aji lung agi onsettsüla, aser iba shiji machitsüla. Saka kiburjibo memerenshitsüla.

²⁹Saka nashi pungchi jagi akhidang nungi nisung dak tonga lira, aser iba indang kibur dang metetdaktsür liaka, pai aji meshibangi toktsüra aser iba jagi nisung kar tongsettsüra, aji lung agi onsettsüla aser kiburjia atangji südaktsütsüla.

³⁰Saka kibur dangji pa taküm alang senchi meshira, kechi talang lir pai aji agütsütsüla.

³¹Nashi pungchi jagi tebur chanu ka mesüra tetsür chanu ka dak tongra, kasa ozüng jagisa merenshitsüla.

³²Nashi pungchi jagi alar mesüra alartsür dak tongra, nashi kibur jagi alar kibur nem taribi sen semer agütsütsüla aser nashi pungchiji lung agi onsettsüla.

³³“Nisung kari kangla ka tura, mesüra kangla ka tur aji menembangi alidang nashi mesüra gado idakji asongdaktsüra,

³⁴pai iba temenok agütsütsüla. Shiruru kibur nem pai talangji sen agütsütsü aser shiruruji pa meyong alitsü.

³⁵Aser nisung kar meyong nashi pungchi-i tangar shiruru yirutsüra aser aji südaktsüra, idangji taküm alibaji yoker senji tena lemdangtsü, aser tasüba shiruru kasa lemdangtsü.

³⁶Saka akhidang nungi nashi pungchi jagi atongba meteta lir nung kiburi aji meshibangi lira, kibur jagi shiruru melen shiruru agütsütsüla, aser shiruru tasüji pa meyong alitsü.