Read njo ANITET 22 Bible Online

ANITET 22 - njo bible

ANITET 22

¹“Nisung kari nashi pungchi mesüra san ka auyar aji tepsetra mesüra yokra, pai nashi pungchi ka melen nashi pungu aser san ka melen san pezü agütsütsüla.

²Auür ka kidangi ia lia pura, aser tasütsüsa pa dak zükra, pa zü asoshi pa tai malitsü.

³Saka anü adoka alidang aji atalokra, pa azü tokshiba asoshi tai alitsü. Pai auyaba atema temenok agütsütsüla, saka pa kecha makara, pai auyaba temenok atema pa ayoktsü.

⁴Saka pai auyabaji taküm lia ngura, nashi, gado mesüra san pai anasü agütsütsü tim.

⁵“Nisung kari pei shiruru chioka tangar alu mesüra tsükmenatzü lu chidaktsüra,[10] pai par lu mesüra tsükmenatzü lu tajungtiba agi temenok agütsütsü tim.

⁶“Kari mi yoka iba jagi tangar lu nung tsük aser noktaka aliba tsük mesüra alu ajonga rongdoktsüra, shibai mi asen, pai temenok agütsütsü tim.

⁷“Nisung kari pei kiyonger ket nung taribi mesüra oset yutsüba auyar oadokra, aser auürji putetra, pai shilem anasü agütsütsü tim.

⁸Saka auürji meputetra, kibur shibai osetji pai yokdaktsü pai pei kinunger oset dakji teka ai asü mai, metettsü atema o bendangdaki anir aotsüla.

⁹“Oset samaba indang mangatettepba oda nashi, gado, san süoshi mesüra tesamaba ajak atema obendangdaki bener arutsü tim; Tsüngremi shiba aitsüdir pai tangarba nemji anasü agütsütsü tim.

¹⁰“Nisung kari pei kiyonger nem gado mesüra nashi, san, shiruru kar ayutsü agütsüra, aser shingaia mungui aji süadokra mesüra zübu ketra aser aridokadokra,

¹¹pai pei kiyonger oset nung amtak asü mamtak KIBUBA madang azüngashitsü tim; kibur jagi iba azüngashibaji agizüktsü tim, aser joko temenok magütsütsü.

¹²Saka aji pa nungi aua or lira, pai iba kibur nem temenok agütsütsü.

¹³Saka shiruruji arem shirurui tepseta lira, nisungba jagi tanüngbaji kuli atema bener arutsüla, aser arem shirurui tepsetba atema pai temenok magütsütsü.

¹⁴“Nisung kari pei kiyonger nungi shiruru ka apura aser shiruru kiburji malidang aji yirura mesüra süadokra, nisungba jagi temenok agütsütsü tim.

¹⁵Saka ibaji kibur lia atalokra nisungba jagi iba temenokji magütsütsü. Ibaji taa asoshi ayuba süra, taa asoshi agütsüba senji temenok agütsüba ama alitsü.

¹⁶ “Nisung kari tasüngtet aser ano ani masüngi aliba aiür mesüzüka la den nüktapangtara, pai la atema anisen agütsütsüla aser la agitsüla.

¹⁷Saka aiürla tebui pa dangi meyokra, pai aiürla asoshi anisen agütsütepba ama la tebu nem sen agütsütsü tim.

¹⁸ “Nai Arasentsür shinga taküm melidaktsütsüla.

¹⁹ ‘Shibaisa shiruru den medemdir, pa atangji südaktsütsüla.

²⁰ “Shibaisa KIBUBA dak alema tangar tsüngrem dang tenladir, pa meshimeshia samajang.

²¹ “Nai aener dang tamajung tebenshi, mesüra parnok tekangshi, nenok Ijip lima nung aenersa liasü ta bilemtetang.

²²“Amitsür mesüra lajar tekangshi.

²³Nenoki parnok kangshira, ni KIBUBAi parnoki teyari asoshi ayimtenba ola langzütsü,

²⁴aser ni mit adoka nenok tepsettsü. Nenok kinungtsürtem amitsür akümtsü, aser nenok chirtem tebu mali kümdaktsütsü.

²⁵ “Nenok den aliba kü nübur sensaker kar nem nai sen aputsüra, sen taputsür ka ama nai pa dang tebenshi aser pa nungi sentem magitsüla.

²⁶ Ne kiyonger kar den nai nangzükteper parnok süoshi agira pa nem anü maidangsa aji meyipa agütsütsüla,

²⁷kechiaser pa asoshi aji dang tabentsü sü lir. Pa kechi nung mejangtsü? Kodang pai teyari asoshi ayimtendir, ni pa dang langzütsü, kechiaser kü dak taochi lir.

²⁸ Nai Tsüngrem[11] sensamasa masütsüla mesüra ne nübur madak yimsüsür atakatem masütsüla.

²⁹“Ne tsük, yi aser oliv totzü nungi kü dang tenlatsü temenu. Ne mezüng asoba jabaso kü nem agütsütsüla.

³⁰Aser ne mezüng mepuba nashi, san kü nem agütsütsüla. Itemji anogo tenetnü tashi tetsü den alitsü, aser tinübuba nung kü nem agütsütsüla.

³¹ “Nenok kü temeshi nüburtem asütsü, anungji nenoki arem shirurui tepsetba shiruru shi kecha machitsüla; saka nenoki aji azü nem agüjang.