Read njo ANITET 23 Bible Online

ANITET 23 - njo bible

ANITET 23

¹“Nai tiyazü osang teprokshi, aser tamajunger ka asoshi tiyazü kuli ajanga teyari.

²Tamajung inyaktsü asoshi telok tuluba sülen nai tanitak, mesüra obendangdak ochi meyipsatsütsü merangba telok tsütsü na teten.

³ Obendangdak sensaker anema nai tejak tereprang.

⁴ Nai ne tsükchir nashi mesüra gado lenmang aia oya ajurura, pa dangi aji anir arujang.

⁵Ne dang sempaba nisung ka meyong gadoji khu agi neneter mepitaka ngura, nai ibaji ajanga odangbo maotsüla, saka aji yaritsüla.

⁶Nai obendangdak sensaker anema ochiji temeyipsatsü

⁷Tiyazü kuli agi shinga aija temerenshi, aser tai makaba aser ochishir nisung nai tetepset, kechiaser shibaisa temenen mapa inyakdir, ni parnokji aitsütsü.

⁸Nai süpokrem tagizük, kechiaser süpokrem ajanga shitak inyaktsüba lenmang nungi nisung tenük pokdakja tai makaba nisungtem timtemdaktsür.

⁹ “Nenoki aener tekangshi, kechiaser nenok Ijip lima nung aenersa liasü, anungji aener mulungjang nenoki meteta lir.

¹⁰ Küm trok tashi nai alu nung metsü proka iba nungi tejang bendenang.

¹¹Saka ne nübur sensakertem achitsü asoshi küm tenetbuba nungbo ali nungji nai metsü meproki tokjang; aser parnoki kechi anüngzükdir aji moapu nung aliba shirurui achitsü. Iba amaji nai ne tsükmenatzü lu aser oliv tsüki asoshia inyakang.

¹² “Anogo trok nai ne mapa inyakang, aser ne nashi aser ne gado anisüngzüktsü aser ne alartsür jabaso aser aener anisüngzüktsü asoshi tenetnübuba nung na anisüngzüktsü.

¹³“Ni nenok dang ashiba ajak angang: tangar tsüngremtem tenüng tetetshi, mesüra ne tebang nungi shinga nema tangashidaktsü.”

¹⁴Küm nung asemben nenoki ni asoshi benjong amungtsüla.

¹⁵ Ni nenok dang melaba ama: Piyazü meinokba am Benjong nenoki amungtsüla. Anogo tenet tashi piyazü meinokba amtsük chiang. Ibaji Ahib ita anogo shitak nung amungtsüla, kechiaser iba ita nung nenok Ijip lima nungi adok. Anungji shinga kü tsüngdangi teka tazüng marutsüla.

¹⁶ “Kodang alu nung nai prokba nungi mezüngbuba süngjang bendentsü mapang tongdir, aluruba Benjong mungang. Aser küm tatem nung kodang ne metsütem alu nungi bendendir, Terizüngba Benjong mungang.

¹⁷Küm nung item Benjong asem amungdangji nenok tebur shiai ni KIBUBA ne Tsüngrem külemtsüla.

¹⁸“Ni asoshi tetepsetba tenlaba zü den piyazü enokba am metenlatsüla. Item benjong nung ni atema tepsetba shiruru temoji anepdang tashi mayutsüla.”

¹⁹ “Küm shia nai züsentetba nungi mezüngbuba süngjangji KIBUBA ne Tsüngrem dangi bener arutsüla. Nai nabong techanu shi pei tetsüdi mamatzü nung masotsüla.

²⁰“Na lenmang anitsü aser ni renemja akaba linük jagi na anir arutsü asoshi ni ne jakdang tenyar ka yoktsü.”

²¹Nai pa dang angang aser pai kechisa shidir aji inyakang. Pa anema tapuso, kechiaser ni pa yok, kü tenüng pa den lir aser pa anema noktakba atema tatok magütsütsü.

²²Saka nai pa ola angadi süra, aser ni ashiba ajak inyakra, idangji ne tsükchir ka aser ne anemertem dang nia anemer ka alitsü.

²³Kechiaser kü tenyar ne jakdang aotsü aser Amor nunger, Het nunger, Perez nunger, Kanan nunger, Hiv nunger aser Yebus nunger dangi ni na anir arutsü; aser ni parnok leptokadoktsü.

²⁴Parnok tsüngremtem tsüngdang tapudak, mesüra tekülem, aser par yimsü-yimbongtem tebenshi. Parnok tsüngremtem aser par tekülemba temeshi tongshitemji anüka raksajang.

²⁵Aser nenoki nenok Tsüngrem KIBUBA tenzüktsü, aser pai ne chiyungtsü aser tzü moatsütsü: aser nenok rongnung tashitak ajak agienadoktsü.

²⁶Ne linük nung shingaia pei-i tanur abenba meraksatsü mesüra tapung makümtsü. Ni ne nem arishi talang agütsütsü.

²⁷“Na anema aruba tsükchirtem kin dangi ni tetsübutsü aser mangatettep adokdaktsütsü aser ni ne tsükchirtem ne jakdang nungi meyipa tesüleni jena odaktsütsü.”

²⁸Ne jakdang nati yoka iba jagi ne lenmang nung aliba Hiv nunger, Kanan nunger aser Hit nunger ni aridoktsü.

²⁹Ni parnok küm ka nung dangbo maridoktsü, yamaji mesüra alimaji azüngazünga küma na asoshi arem shirurutemji tali züintsü.

³⁰Na aika renloka kümer linükji magi tashi ni parnokji terara dang aridoktsü.

³¹Ne litsü Temerem Tzüyim nungi Filistia nunger tzüyim tashi, lisem lima nungi Eufrata ayong tashi alitsü; kechiaser yangji aliba nisungtemji ne ket nung ni bendanga agütsütsü, aser nai parnok aridoktsü.

³²Parnok den mesüra parnok tsüngremtem den nai kecha tezüngzüktepba mayutsüla.

³³Ni anema parnoki na temenen menadaktsütsü asoshi, nai ne linük nungji parnok telidaktsü. Nai parnok tsüngremtem külemra, aji na asoshi sang ka asütsü.”