Read njo ANITET 24 Bible Online

ANITET 24 - njo bible

ANITET 24

¹KIBUBAi Mosa dang ashi, “Na, Aron, Nadab, Abihu aser Israel nunger tambur neter kü dangi tenemi atung, aser meta apiga nungi apudaka külemang.

²Ne dak alema tangar shinga ni anasai marutsüla. Nüburtemji keta tenem jagia matutsüla.”

³Mosai arua nüburtem dang KIBUBAi melaba o aser ozüngtem ajak ashi, aser parnok ajaki külemi langzü, “KIBUBAi ashiba ajakji onoki inyaktsü.”

⁴KIBUBAi melaba ajak Mosai zülu aser tasüngnepji anepdang pai yakta saaka tenem tsüng nungji tenladak aser tongshi terana agi yanglu. Tongshi shia Israel kidong ka ka temaitsü liasü.

⁵Aser pai Israel asangurtem KIBUBA dang tarongba tenla aser nashi pungchi tepseta telungjem tenlatem agütsütsü yok.

⁶Mosai shiruru züji tesadang ka susa nung ayu, aser tesadang kaji tenla sabang nung rükloktsü.

⁷Idangji pai tezüngzüktepba kaket koba KIBUBA ozüngtem zülua lir, aji agiteta nüburtem madang tashi agi azüng aser parnoki langzü, “Onoki KIBUBAi ashiba ajak angatsü aser pai melaba ajakji inyaktsü.”

⁸ Idangji Mosai susa nung aliba azüji bener arua nüburtem dak rüklokja ashi, “Ibai nenok KIBUBAi tezüngzüktepba agiba züji lir, koba temelabatem benshitsü pai nenok nem agütsü.”

⁹Idangji Mosa, Aron, Nadab, Abihu aser Israel tambur neterji atu,

¹⁰aser parnoki Israel Tsüngrem angu. Pa tetsüng kübok merük merüka aliba anüng sentsü ama sapfir lung agi labanga aliba angu.

¹¹Tsüngremi item Israel lenirtem madak pa teka memekang, aser parnoki Tsüngrem angu; aser parnoki chia ajem.

¹²KIBUBAi Mosa dang ashi, “Kü dangi tenemi atung, aser nüburtem atema kü temelaba ozüngtem koba ni lungpak nung zülua lir, aji ne nem agütsüdi.”

¹³Mosa aser pa teyarir Yihusua na renemer Tsüngrem tenemi atu.

¹⁴Mosai tambur dang ashi, “Onok tanaben meyipa malu tashi nenok yangi dang ata-a liang. Aron aser Hur na nenok den lir, nenok rongnung mangatettep kar adokra parnok dangi oang.”

¹⁵Kodang Mosa Sinai tenem jagi atu mepeti aji sübang.

¹⁶Aser KIBUBA sentsüwangshi Sinai tenemi alu. Anogo troknü tashi mepet jagi tenemji sübanga liasü, aser tenetnübuba nung KIBUBAi mepet nungi Mosa den jembi.

¹⁷Israel nunger nükdang tenem nung KIBUBA sentsüwangshi milak ama liasü.

¹⁸ Aser Mosai mepet jagi yia tenem nung anogo lir aser aonung lir liasü.