Read njo ANITET 25 Bible Online

ANITET 25 - njo bible

ANITET 25

¹KIBUBAi Mosa dang ashi,

²“Ni asoshi Israel nungeri tenla ka ka benang ta dang shiang. Nisung shiai pei mulungtetba ama kechi tenladir aji agizükang.

³Nai agizüktsüba tenlaji hon, taribi, yongmen yin,

⁴sü tajung, anüng sentsü, nakrema meremba, tezüng sü, sü temerem, nabong züng agi yangluba sü;

⁵san tepung küp sentsü temerem nung aremba shiküp tanak, akashia süng;

⁶milen asoshi oliv totzü, temezütsü asoshi totzü aser teronem menemba liangmesen;

⁷oniks lung, temenoktsü lung, putir teku nung semoktsü[12] asoshi sentsüprang lung.

⁸Ni parnok rongnung alitsü asoshi nüburtemi kü nem temeshi tekülemdak tenladak tekülemdak ka yanglutsütsüla.

⁹Ibaji koma yanglutsü aji ni ne dang sayutsü aser nai yamaji yanglutsüla.

¹⁰“Aser parnoki akashia süng agi süngden ka yanglutsüla, metong nung süklep ana ser tesadang; lenten süklep ka ser tesadang; aser touchiji süklep ka ser tesadang asütsüla.

¹¹Ibaji hon temeja agi temalen aser telunglen ajak yangbangtsüla, aser hon agi tatembanglen ajakji südangtsüla.

¹²Aser idakji hon tayi pezü ketdakjang aser aji tetsüng pezü nungji külen tayi ana, aser külen ana ta akettsüla.

¹³Akashia süng agi süngra yangluang aser aji hon agi yangbangtsüla,

¹⁴aser süngdenji abentsü asoshi itemji tayi nungji enokang.

¹⁵Süngraji tayi nungji enoka ayutsüla aser aji magitettsüla.

¹⁶Ni ne nem agütsütsü aliba lungpak ana koba nung kü temelaba ozüngtem zülua lir aji süngden nungji enoka yuang.

¹⁷ “Aser nai hon temeja agi tenembangtsü yangluang: ibaji metong nung süklep ana ser tesadang, aser iba lentenji süklep ka ser tesadang.

¹⁸Aser tenembangba tatem anatsülenji jungjunga atsüngba hon cherubim ana nai yangluang.

¹⁹Aser tatem külen cherub ka aser külenji cherub ka ta yangluang: aser iba tatembang ana manung cherubimji temekettsü denji ka dang küma nenoki yangluang.

²⁰Aser cherubimji parnok tashikang agi akhümbanger, parnok tashikang azüklen sarar alitsüla.

²¹Aser süngden temalenji nai temekettsü den ayutsüla; aser ni ne nem agütsüba ozüngji temeshi süngden telung nung nai yuang.

²²Aser yangji ni ne den ajurutepdi, aser Ozüng Süngden manung cherubim ana tsüngda nung temekettsü nungji Israel chirtem dang temelaba koba ni ne nem agütsütsü, ajak indang ni ne den jembitsü.

²³“Akashia süng agi langbang ka, metong nung süklep ana, lenten süklep ka aser touchi nung süklep ka ser tesadang yangluang.

²⁴Aji hon temeja agi yangbangang aser hon agi tatembang ajakji meketa yangbangtsüla.

²⁵Aji meketa tekapu ka lema tebanglak keta yangluang, aser iba tebanglakji hon agi züdanga yangluang.

²⁶Iba atema hon tayi pezü yanglua, itemji tetsüng pezü nungji enokang.

²⁷Langbang abentsü asoshi süngra tebanglak anasa tayitemji alitsüla.

²⁸Süngraji akashia süng agi yangluang aser aji hon agi yangbangang.

²⁹Hon temeja agi nai su, marok aser tezüoktsüba marok, susatem tezüoktsü asoshi yangluang.

³⁰ Langbangji tezüngzüktepba süngden jakdang ayutsüla, aser langbang manung kü dang tenlatsüba amtsükji teti yujang.

³¹“Ano hon temeja agi milendong atalokdak ka yangluang. Temtsüng aser tedongji hon agi jungjunga tsünga yanglutsüla,

³²aser marok koba naro temechi mesüka yanglur, ibaji milendong atalokba denji ka dang küma anatsülenji kongsang trok tipleni sangshia, tip shia kongsang asemsem oa yanglutsüla;

³³Kongsang ka nung almond naro apungba ama marok asem, temechi ka aser naro ka; aser kongsang ka nungji almond naro apungba ama marok asem, temechi ka aser naro ka, yangji milendong nungi kongsang trok sangshia alitsü.

³⁴Aser milendong nungji almond naro apungba ama marok pezü, iba temechitem aser narotemji:

³⁵aser kongsang ana kübok temechi ka iba denji ka küma, milendong nungi kongsang trok sangshia oa alitsü.

³⁶Iba temechitem aser kongsangtemji iba den temang ka dang: ajongaji hon temeja agi ka küma atsüngba mapa alitsü.

³⁷“Milendong atalokdak asoshi milen tenet yanglur idakji ataloka yuang, aser iba jagi tejaklen nungi tesangwa agütsütsü.

³⁸Milen nung enokba angsü mejeptokba aser iba susaji hon temeja agi yangluba asütsüla.

³⁹Milendong aser iba yangluba nung amshitsü asoshi hon temeja seret semer agitsüla.

⁴⁰ Ni ne dang tenem nung inyaktsü sayuba ama nai itemji kümdanga yanglutsüla.