Read njo ANITET 27 Bible Online

ANITET 27 - njo bible

ANITET 27

¹“Nai akashia süng agi tenla dak sabang metong nung süklep pungu, aser lenten nung süklep pungu yangluang, tenladakji pezüsülen tasazük kasasa aser tongshi nung süklep asem.

²Tenladak kinük pezüsülenji tezü ka ka yangluang, anungji tezü aser tenladakji temang ka dang asütsü, aser tenladakji yongmen yin yanglokang.

³Chipo-anpo ajak, aut endokba po, mijepru, autteptsü susa, shijok, item ajak yongmen yin agi yangluang.

⁴Yongmen yin agi menja yangluang aser iba temalen kinük pezü nungji yongmen yin agi tayi pezü yangluang.

⁵Menjaji tesadang ka tashi tenladak atutsüsa sadem telunglenji yuang.

⁶Akashia süng agi süngraji yangluang aser aji yongmen yin agi yangpangang,

⁷itemji kinük ajaklen tayi nungji enoker iba nungji tenladakji abentsüla.

⁸Tenladakji süngtsük agi küroka yangluang. Tenem nung ni ne dang inyaktsü tuyuba ama itemji yanglutsüla.

⁹“Nai tekülemdak süki kima yangluang: anüolentip asoshi külen tsütsü kima atema temechiba kümpa sü tajung, süklep noklang ka tip külen asoshi sangzüa alitsüla;

¹⁰aser iba tongshi metsü, aser item tesembangtsü yongmen yin agi yangluba metsü; tongshi nung jui metenteptsü atema yanglubaji taribi alitsüla.

¹¹Aser yamaji anüdoktip tsütsü metong nung süklep noklang ka sangzüa asütsüla, aser iba tongshiji metsü aser item tesembangtsü yongmenyin agi yangluba tongshi metsü jui metenteptsüji taribi asütsüla.

¹²Anüolen tsütsü kimaji süklep tenem tongshi ter, aser tesembangtsü ter.

¹³Anüdoklen tsütsü aliba kima lentenji süklep tenem asütsüla.

¹⁴Kikümdong külen asoshi teyindangba süji süklep metsü: anüng sentsü, nakrema meremba, tezüng sü temerem, aser temechiba sü tanük, sü dak noksa enoker inyakba mapa aser item asoshi tongshi pezü den tesembangtsü pezü agitsüla.

¹⁵Aser ka asoshiji süklep terpungu sangzüa alitsüla: item asoshi tongshi asem aser tesembangtsü asem.

¹⁶Aser kima kiküm asoshi teyindangba sü süklep metsü, anüng sentsü, nakrema meremba, aser jakja-a meremba, aser temechiba kümpa sü tanük, noksa enokeri inyakba mapa; item tongshi pezü aser tesembangtsü pezü.

¹⁷Kimalen lenten meketa aliba tongshi ajakji taribi yinzü agi alenteptsüla. Iba juiji taribi aser tesembangtsüji yongmen yin asütsüla.

¹⁸Kima lenten metong nung süklep noklang ka, lenten nung süklep tenem, aser touchi süklep pungu asütsüla. Teyindangba süji temechiba sü tajung aser tesembangtsüji yongmenyin asütsüla.

¹⁹Tekülemdak süki nung amshiba osettsüset ajak, tasongtsü aser süki kimalen tangenteptsü oset ajakji yongmenyin agitsüla.

²⁰“Israel nunger dang milenji teti jangrua alitsü asoshi oliv totzü tajungtiba bener arutsü nai parnok dang mela-ang.

²¹Sentep süki nung teyindangba sü temalen koba Ozüng Süngden jakdang lir, idakji kü madang Aron aser par jabasotemi milenji nikongdang nungi anepdang tashi KIBUBA madang jangrua ayutsüla. Iba ya Israel nunger aser parnok semchirtem tarutsü putu ajak asoshi teti tezüngzüktepba ozüng alitsü.