Read njo ANITET 28 Bible Online

ANITET 28 - njo bible

ANITET 28

¹“Israel nunger rongnungi nedi Aroni pa jabasotem Nadab, Abihu, Eleazer aser Ithamar, anir arudakjang. Anungji parnoki kü tsüngdang putir ama tenzükdaktsü.

²Nedi Aron asoshi putir sobutsütem tobur junga aser mera keta temeshi sobutsü yanglutsüla.

³Mapa nung tetangshi nisung ajak shir nemsa ni tesangra shisatsü agüja lir, parnok dang Aron atema tekülem nung abentsü süoshi yanglutsütsü nai shiang; anungji pai ni asoshi putir mapa bendanga tenzüktsü.

⁴Item süoshi parnoki yanglutsüla, teku semoktsü, putir temeshi sobutsü, temalen asemba semoksü, teptang aketba semoksü, kolakjen sü, aser peremlen ka. Parnoki itemji putir sobutsü nedi Aron aser pa jabasotem asoshi yanglutsüla, aji oda parnoki kü dang putir mapaji tenzüktsü.

⁵Parnoki hon aser anüng sentsü, nakrema meremba, tezüng sü temerem kümpa sü tanük tajung agi aji yanglutsüla.

⁶“Temeshi sobutsüji anüng sentsü, nakrema meremba, tezüng sü temerem, aser kümpa sü tanük tajung agi sangra-a mechitepa yanglutsüla.

⁷Aji tatem anatsülen metentepa tapubang nung pungoktsü tayi ana alitsüla, aser aji külemi akanga mesülokang.

⁸Aser iba manung sangra-a yangluba peremlenji aji mesüka aser iba den ka dang alitsüla; hon, anüng sentsü, nakrema meremba, jakja-a meremba, aser kümpa sü temechiba tajung.

⁹“Aser nai oniks lung ana bena arua iba manung Israel kidong tenüng angenpoka züluang;

¹⁰parnok jakzükba ama tatongi shia lung ka nung trok aser tanüngba trokji lung ka nung angenpoka züluang.

¹¹Tangenba nisungi lung nung tenüng züluba ama, nai Israel chirtem tenüng lung ana nungji angenpoka zülutsüla; aser aji nai hon keptang nung amenokang.

¹²Aser Israel chirtem asoshi tebilemtettsü lung alitsü asoshi tapubang nung pungoka sü tila ana manung aji nai ayutsüla. Aser tebilemtettsü asoshi KIBUBA madang parnok tenüngji Aroni pa tapubang ana nung abentsüla.

¹³Aser nai hon agi keptang yanglutsüla;

¹⁴hon temeja agi yinzü ana, lisü peretepa ashiba ama yangluang aser hon keptang nungji enoktsüla.

¹⁵“Nai tesangra agi obendangba teku semoktsü putir temeshi sobutsü yangluba amaji nai yanglutsüla, hon, anüng sentsü, nakrema meremba, jakja-a meremba, aser temechiba kümpa sü tajung agi aji yanglutsüla.

¹⁶Süji tatembang pezüsülen tasazük kasasa aser aji reptepa alitsüla. Ibaji metong nung aka ka, aser lenten nunga aka ka.

¹⁷Iba nungji senti lung taren pezü amenloktsüla. Mezüngbuba taren nungji ruby, topaz aser garnet.

¹⁸Tanabuba taren nungji emerald, sapfir aser diamond;

¹⁹tasembuba taren nungji jacint, aget aser amethis.

²⁰Pezübuba taren nungji beryl, oniks, aser jasper. Item amenokdakji hon agi meketbangtsüla.

²¹Lung teranaji Israel kidong terana temaitsü asütsü asoshi lung shia nungji Israel chirtem tenüng ka ka angenpoka zülutsüla.

²²Teku semoktsü manungji hon temeja lisü agi mesentepa yinzü yanglutsüla.

²³Teku semoktsü temalen denji sendaktepa hon tayi anaji yangluang,

²⁴hon yinzü anaji teku semoktsü tatembanglen tayi ana nungji enokang.

²⁵Temesentepba yinzü külen tatem anaji keptang ana tatembanglen enoktsüla, aser aji putir tapubang nung pungokba temeshi sobutsü sü tejaklen sendakang.

²⁶Aser hon agi tayi ana yangluang aser aji putir teku semoktsü temtsünglen temeshi sobutsü anasa enokang.

²⁷Ano hon tayi ana yanglua temeshi sobutsü tapubang anasa sü ana teküpoklenji mesülokang. Iba tejaklen temetentepdak sangra-a atakba teperem naiba sü temalenji sentakang.

²⁸Teku semoktsü nung aliba tayiji putir temeshi sobutsü nung aliba tayi dakji anüng sentsü, temechiba sü agi alenlokang, anungji teku semoktsüji teperem naiba dakji sentaktsü aser aji sepshia makümtsü.

²⁹Kodangsa Aroni temeshidaki yidir, KIBUBA madang pai mamai bilemtetdaktsütsü asoshi Israel chirtem tenüng angenpoka züluba koba pa temulungjang manung atalokba obendangba teku semoktsü lir, pai aji teti abentsüla.

³⁰ Aser nai obendangba teku semoktsü nung Urim aser Thummim[13] enoktsüla; aser KIBUBA madangi Aron teku manung itemji alitsüla; aser Aroni maneni Israel chirtem obendangba pa mulungjang manung KIBUBA madang abentsüla.

³¹“Putir temeshi sobutsü ajongaji anüng sentsü temeja asütsüla.

³²Sü tiyong nungji tekolak asoshi tapok apatsüla, aser aji meshisatsü asoshi tapokji meketa artsüla.

³³Semoktsü ajaklen jarem meketa mesüa, anüng sentsü, nakrema meremba, aser tezüng sü temerem agi yanglutsüla, aser itemji meketa hon sangshia yangluang.

³⁴Hon sangshi ka sülen jarem naro ka, ta paitepa semoksü temtsüng sobutsü meketa naia oang.

³⁵Tekülem dang Aroni aji asemtsüla. Kodangsa tenzüktsü asoshi Temeshi taktangi pa kü dangi aitdir, mesüra kü dang nungi tugudir, iba sangshi olaji angashitsü, aser pa masütsü.

³⁶“Nai Hon temeja agi lungpak ka yanglua, tenüng ajenba nung angenoka züluba amai, KIBUBA DANG TEMESHI, ta iba manung züluang.

³⁷Ibaji anüng sentsü agi mechiba kolakjen manung alitsüla.

³⁸Aron tenütsü manung ibaji alitsüla. Anungji Israel nüburtemi kü dang aibelena tenla kar agüjaka, Ni KIBUBAi, parnok tenlaji agizüktsü.

³⁹“Nai sentsü balala tsünutepa atakba kümpa sü tanük agi semoksü yanglutsüla, aser nai kümpa agi semoksü yanglutsüla, aser nai kümpa sü tanük agi kolakjen ka aser noksa yoka peremlen ka ta yangluang.

⁴⁰Aser Aron jabasotem asoshi, parnok sentsüwangshi aser tobur ajung asa-a semoksü, peremlen, aser korang nai yangluang.

⁴¹Item sobutsüji nedi Aron aser pa jabasotem nem semokjang. Iba sülen parnok dak totzü mezüja putir mapa inyakdaktsütsü asoshi parnokji bendanga agüja shiteta yuang.

⁴²Aser parnok mangsa aliba nembangtsü asoshi teperem nungi tepi tashi semoktsü parnok nem yanglujang.

⁴³Aser kodang parnoki temeshi daki kü dang mepitsü asoshi yidir mesüra kodang parnoki temeshi daki anasa külemtsü asoshi arudir, itemji Aron aser pa jabasotem dak alitsü; angji parnok dak tai matutsü aser masütsü; aji teti asoshi pa aser pa dak jakzükbatem asoshi ozüng alitsü.