Read njo ANITET 29 Bible Online

ANITET 29 - njo bible

ANITET 29

¹“Parnokji meshiteta putir mapa nung kü madang tenzüktsü asoshi nai yamai Aron aser pa jabasotem dang inyaktsüla. Tarak maket nashi pungchi ka aser san tepung ana agitsüla.

²Aser wheat am tajung nungi piyazü meinoki amtsük yangluang, aser aji totzü den meyokteper amtsük yangluang.

³Itemji molok ka nung bendenang, aser nai aji nashi pungchi aser san ana denji külemi kü nem tarongba tenla agüjang.

⁴“Aron aser pa jabasotem süki kishi jagi anir arua parnok tzü chigudakjang.

⁵Aser nai süoshiji bener arua, putir temeshi sobutsü nung aketba süoshi aser putir temeshi sobutsü aser teku semoktsüji nai Aron dak semokjang, aser sangra-a atakba putir temeshi sobutsü nung peremlen jagi mesüang.

⁶Pa kolak manung kolakjenji semokjang, aser aji temeshi korang manung semokjang.

⁷Temezütsüba totzüji bena arua pa tekolak nung shilokja mezüja shimtetang.

⁸“Pa jabasotem anir arua parnok dak semoksüji sobujang;

⁹parnok dak peremlenji naijang aser parnok kolak manung korang semokjang. Aji oda nai Aron aser pa jabasotem mezüja shimtettsüla, aser nai iba temelaba ozüng agi parnok aser parnok semchirtemi kü madang teti putir ama tenzüktsü.

¹⁰“Sentep süki dangi nai nashi pungchiji anir arutsüla, aser Aron o pa jabasotemi iba kolak dakji teka agi nemettsüla.

¹¹Süki kiküm jakdang temeshi dak KIBUBA madang nashi pungchiji tepsettsüla.

¹²Nai nashi pungchi züji tera bena arua ne temeyong agi tenladak sabang tezü nungji mezütsüla. Tanüngba azüji tenladak tsüngdang shilokjang.

¹³Poknüng meyibanga aliba temo ajak, temesen, tezüngjang ana, aser idakji aliba temo agizüka tenladakji rongang.

¹⁴Saka shi, teküp aser jana, tanendak tezülen rongang. Aji temenen tenla lir.

¹⁵“San tepungji ka agiang, aser Aron aser pa jabasotemi san tepung kolak dakji teka agi nemetdakjang.

¹⁶Aser aji tepsetang aser iba züji tenladak meketa rüklokjang.

¹⁷San tepungji anüka alangsatsüla. Iba poknüng aser tetsüngji shitoker alangsa-a aliba shi aser tekolak denji yuang.

¹⁸ San tepung ajongaji tenladak sabang manung rongang; aji KIBUBA dang tarongba tenla lir, ya teronem tajung asoshi mi agi KIBUBA dang tenlaba lir.

¹⁹“San tepung kajia bena arung, aser Aron o pa jabasotemi san kolak dakji nemetdakjang.

²⁰Aser aji tepsetang aser azüji agiteta Aron aser pa jabasotem tenaronglak tajichi teka tajichi jemtsüba manung, aser tetsüng tajichi jemtsüba manung mezüjang, aser tanüngba azüji tenladak sabang meketa rüklokjang.

²¹Tenladak aliba azü aser temezütsü totzüji bena arua Aron aser pa süoshi, pa jabasotem, aser parnok süoshi nung aji rüklokjang. Idangji pa, pa jabasotem aser parnok süoshiji ni atema temeshitetba asütsü.

²²“San tepung temo, telunglen meyiba temo, temesen, tezüngjang ana meyiba temo, aser tepi tajichiji lepzükang. Kechiaser ibai bendanga agütsüba san tepung lir.

²³Amtsük tulu ka, totzü enokba amtsük telong ka aser piyazü meinokba amtsük tapu ka KIBUBA tsüngdang aliba molok nungi agiang.

²⁴Item chiyungtsü ajakji Aron aser pa jabasotem teka nung amokjang, aser aji KIBUBA tsüngdang tayipshiba tenla ka ama ayipshiang.

²⁵Parnok ket nungi nai itemji agia aji tenladak sabang manungji KIBUBA dang teronem tajung asoshi rongang, ibai kü dang mi agi tenlaba lir.

²⁶Aroni meshitettsüba san tepung tekuji nai alangtetang aser aji tayipshiba tenla ama KIBUBAmadang ayipshiang aser aji ne shilem alitsü.

²⁷Tayipshiba tenla kü nem agütsüba san tepung teku aser tepi koba putir shilem lir, aji Aron aser pa jabasotem asoshi lir.

²⁸Aji Israel chirtem nungi Aron aser par jabasotem teti asoshi parnok shilem alitsü, kechiaser aji angati agütsüba tenla ka lir, ya Israel purtem nungi parnoki yimjung tenla lir, oda KIBUBA dang parnok tenlaba lir.

²⁹Aron meyong temeshi sobutsüji pa sülen par jabasotem asoshi alitsü, aji semer parnoki bendanga meshiteta ayutsü.

³⁰Aron jabasotem shibasa pa melena putir kümdir aser tenzüktsü asoshi Temeshitiba taktang jagi yidir pai anogo tenetnü tashi putir sobutsüji sobua alitsüla.

³¹“Aser nai bendanga agütsüba san tepungji bena arua temeshidak iba shi asotsüla.

³²Aser sentep süki kiküm nung Aron aser par jabasotemi san chanu shi aser molok nung aliba amtsükji achitsüla.

³³Temenen tatokba asoshi tenla koba bendanga agütsü, aji parnoki achitsüla. Parnok dak alaka tangar shingaia aji achitsü makok kechiaser ibaji temeshi lir.

³⁴Iba bendanga agütsüba shi mesüra amtsükji kar anepdang tashi anüngra aji, mi agi rongtoktsüla; ibaji machitsüla kechiaser aji temeshi lir.

³⁵“Ni ne dang melaba ajak amato nai Aron aser pa jabasotem bendanga agütsübaji anogo tenet tashi agia iba meshiteta ayuba mapaji inyaktsüla.

³⁶Anogo shia temenen pungiba tenla nashi pungchi ka ka tenlatsüla. Iba jagi tenladakji meshitettsü, aser aji meshiteta kümdaktsütsü asoshi totzü mezüang.

³⁷Yamaji anogo tenetnü inyakang. Idangji tenladakji kanga junga meshitettsü, aser kechi agisa tenladakji kongshidir temeshi alitsü.[14]

³⁸“Tenladak anogoshia küm ka techanu san ana-na tenlatsüla.

³⁹Sanji anepdang ka aser nikongdang ka ta tenlatsüla.

⁴⁰Mezüngbuba san dakji amzü seret ka totzü temeja hin ka den meyokteper tenlatsüla, aser ano tajemtsü tenla asoshi yi hin ka shilokjang.

⁴¹San tanabubaji nikongdang tenlatsüla, aser anepdang tenla nung agütsüba ama iba denjia amzü, totzü aser yiji agütsütsüla. Ibaji ni asoshi chiyungtsü tenla amato lir; ni KIBUBAi iba mi agi tenlaba teronem nungji pelatsü.

⁴²Putu ajak nung kü dang nenoki süki kikümdong nung ibai arongtsüla. Aser ni idakji kü nüburtem den ajurutepa nenok den jembitsü.

⁴³Yangji ni Israel nunger den ajuruteptsü, aser sükiji sentsüwangshi agi meshitettsü.

⁴⁴Ni sentep süki aser tenladakji meshitettsü, aser Aron o pa jabasotemi putir mapa inyaktsü atema ni parnok meshitettsü.

⁴⁵Aser ni Israel nungertem den alitsü, aser ni parnok Tsüngrem asütsü.

⁴⁶Aser parnoki ni KIBUBA parnok Tsüngrem shibai parnok Ijip lima nungi anitet aji metettsü, anungji ni parnok rongnung alitsü. Ni KIBUBA parnok Tsüngrem lir.