Read njo ANITET 3 Bible Online

ANITET 3 - njo bible

ANITET 3

¹Tang Mosa toko Yethro Median putir meyong san nüka liasü. Pai san telokji lisem lima ajanga anir oa Tsüngrem tenem Horebi aru.

² Aser süngsem tiyong nung milak ka nung Tsüngrem tenyar pa dangi adok; aser pai reprang, aser ajiang, süngsem nungji mi jangrua liasü.

³Anungji Mosai ashi, “Ya kanga tebangkatsü ka, kechiba süngsemji maronger ni anasa or aji reprangdi.”

⁴Kodang Mosa anasa arubaji KIBUBAi angu, süngsem tiyong nungi pai Mosa dang ja-a ashi, “Mosa! Mosa!” Aser pai langzü, “Ni yangi lir.”

⁵Tsüngremi ashi, “Yangi anasa taru, ne tsüngsem semzükang, kechiaser koba ali nung na noktaker aji temeshi lir.

⁶Ni ne tetsü-tebou Tsüngrem, Abraham, Isak aser Yakob Tsüngrem.” Idangji Mosai Tsüngrem dak rangloktsü tsübu nung pai pei tejak miim.

⁷Ano KIBUBAi ashi, “Ni atangji kü nüburtem Ijip lima nung ala-ashiba nguogo; parnok tanükertemi timtem agütsüba nungi kümzüktsü ajepba ola ni angashiogo. Parnok tia ajak ni meteta kar.

⁸Ijip nunger ket nungi parnok kümzüktsü, aser iba lima nungjagi aniteta alinük tajung aser tesadem ka mamatzü aser ninang mojitzü yima aliba lima; kong Kanan nunger, Het nunger, Amor nunger, Periz nunger, Hiv nunger, aser Yebus nunger lir, ajagi parnok anir aotsü ni alu.

⁹Tang Israel purtemi nünga ajepba ola ni angashiogo, aser Ijip nungeri parnok rishikangshiba ni nguogo.

¹⁰Anungji tang arung, kü nübur Ijip lima nungi anitettsü asoshi ni na Farao dangi yokdi.”

¹¹Saka Mosai Tsüngrem dang ashi, “Farao dangi or Ijip nungi Israel chirtem anitettsüsa ni shiba?”

¹²Aser pai ashi, “Atangji ni ne den alitsü; aser ni na yok ta metettsü asoshi na atema temaitsü ya alitsü: kodang nai nüburtem Ijip lima nungi anir arudir, külemi nenoki iba tenem nung Tsüngrem tenzüktsü.”

¹³Mosai Tsüngrem dang ashi, “Kodang ni Israel nunger dangi oa ‘Nenok tsürabur Tsüngremi ni yok’ ta shidir, parnoki kü dang pa tenüng shiba ta asüngdangra, ni parnok dang kechi ashitsü?”

¹⁴Tsüngremi Mosa dang langzü, NIJI NI LIR,[2] Israel chirtem dang nai yamai ashitsüla, “NI LIRi” nenok dangi ni yok.”

¹⁵Tsüngremi ano Mosa dang ashi, “Ya nai Israel chirtem dang shiang, KIBUBA nenok tsürabur Tsüngrem, Abraham, Isak aser Yakob Tsüngremi nenok dangi ni yok: ya teti asoshi kü tenüng, aser aji oda putu ajak nung ni bilemtettsüba lir.

¹⁶Oang aser Israel tamburtem külemi sentepdaktsür parnok dang shiang, Ni KIBUBA, parnok tsüraburtem Tsüngrem, Abraham, Isak aser Yakob Tsüngrem kü dangi adoka ashi, ni nenok dangi arua Ijip nungeri nenok dak inyakba ajak nguogo.

¹⁷Ni nenok Ijip nunger alar tia nungi aniteter, Kanan nunger, Hit nunger, Amor nunger, Periz nunger, Hiv nunger aser Yebus nunger lima kong mamatzü aser ninang mojitzü ayimer, iba lima jagi anir aotsü ni nangzükogo.

¹⁸“Nai ashiba ajak kü nüburtemi angatsü. Na aser Israel tamburtem Ijip chuba dangi or pa dang ashitsüla, ‘KIBUBA, Ibri nunger Tsüngrem onok dangi jungkai adokogo. Tang onok ozü KIBUBA Tsüngrem dang tenlatsü asoshi arem nung anogo asem lenmang odakjang ta mepishir.’

¹⁹Tashi tait teka kati meinyakra Ijip chubai nenok modaktsütsü ta ni metet.

²⁰Saka ni kü teka songtoka Ijip nunger dak kü sayatenya mapatem ajak agi azüktsü. Iba sülenji pai aonung nenok odaktsütsü.

²¹ “Ni Ijip nunger nem nenok meimdaktsütsüsa inyaktsü aser kodang nenok apusoa odir, nenok teka tazüng muodaktsütsü.

²²Tetsür shiai pei kiyonger Ijiptsür dang aser Ijiptsür kar den semloka lira parnok nungi ki osettem süoshi, hon, taribi aser sentilung meshizüka bener aotsü.”