Read njo ANITET 30 Bible Online

ANITET 30 - njo bible

ANITET 30

¹“Ano liangmesen arongtsü asoshi akashia süng agi tenla sabang ka yangluang.

²Aji metong nung süklep ka, lenten süklep ka aser touchi nung süklep ana. Kinük pezüsülen ajak kasa aser tezütemjia iba denji kasa dang asütsüla.

³Temalen aser tip meketa, aser iba tezüji hon temeja agi yangluang, aser ano aji meketa hon agi yangbangang.

⁴Tenla sabang tamentakdak kübokji hon tayi ana yangluang, aser itemji abentsü asoshi kinük anatsülen süngra ana-na yangluang.

⁵Süngraji akashia süng agi yanglur, idakji hon nülokang.

⁶Aser tezüngzüktepba Ozüng Süngden aliba tenembangba jakdang kong ni ne den ajuruteptsü idakji aliba süngden anasa aliba teyindangba sü jakdangji nai tenla sabangji yuang.

⁷“Kodang Aroni anepdang shia milenji renemdir, pai teronem menemba liangmesenji tenla sabang manung arongtsüla.

⁸Nikongdang kodang pai milenji tsüklokdir, pai kasaji inyaktsüla. Liangmesenji putu ajak nung tanen makai teti arongtsüla.

⁹Iba manung memeshitetba liangmesen, mesüra tarongba tenla, mesüra chiyungtsü tenla kecha nenoki metenlatsüla. Ano nenoki iba manung tajemtsü tenla kecha meshiloktsütsüla.

¹⁰Temenen pungitsü asoshi tenlaba shiruru azüji sabang nung tezü dakji rüklokja küm nung khen Aroni sabangji meshitettsüla. Küm shia teti nenoki yamaji inyaktsüla. KIBUBA dang ibai temeshitiba sabang alitsü.”

¹¹Idangji KIBUBAi Mosa dang ashi,

¹²“Kodang nai Israel nunger yongsük züngdangdir, idangji parnok dangi lendong marutsü atema nisung shiai KIBUBA nem pei taküm asoshi talang tenla agütsütsüla.

¹³ Yongsük nung dena alir shiai tekülemdak amshiba touzük amato shekel tesadang ka agütsütsüla, aser iba nungjagi KIBUBA nem shekel tesadang ka tenla agüjang.

¹⁴Shirnok yongsük nung dena lir küm metsü nungi temalen züngsem shiai KIBUBA meyong tenlaji agütsütsüla.

¹⁵Taküm tenla temenen nungi pungitsü asoshi KIBUBA nem kodang parnoki tenla agütsüdir, shekel tesadang ka dak tali takari magütsütsüla aser sensakeria ajema magütsütsüla.

¹⁶Aser nai temenen pungiba senji Israel chirtem nungi agitsüla, aser aji sentep süki mapa atema bendanga yuang, aji nenok temenen pungitsü asoshi KIBUBA madang Israel chirtem asoshi tebilemtettsü alitsü.”

¹⁷KIBUBAi Mosa dang ashi,

¹⁸ “Yongmenyin agi susa ka tetsüng dena yangluang. Aji süki aser tenla sabang na tsüngda yuang aser shitoktsü asoshi idakji tzü enokang.

¹⁹Aron aser pa jabasotemi iba tzü nungjagi parnok teka aser tetsüng shitoktsüla,

²⁰oda parnok süki mesüra tenla sabangi KIBUBA dang mi agi tenlaba tenlatsü asoshi arudang parnok masütsü asoshi parnoki iba tzü jagi shitoktsüla.

²¹Parnok masütsü asoshi parnok teka aser tetsüng shitoktsüla. Iba ozüng ya parnok aser parnok semchirtem asoshi teti benshitsüla.”

²² Ano KIBUBAi Mosa dang ashi,

²³“Teronem menemtsü tzü shekel noklang pungu, teronem menemba süngshi iba tesadang, shekel noklang ana ser tenem, aser teronem menemba ensemtzü noklang ana ser tenem,

²⁴aser akashia noklang pungu, temeshidak tatakzük aliba amato oliv totzü hin ka, nai bena arung,

²⁵aser nai teronem menemtsü yangluri yangluba teronem ama temeshi temezüba totzü yangluang, aji temeshi temezüba totzü alitsü.

²⁶Aser sentep süki, Ozüng Süngden,

²⁷langbang aser marok o ausu ajak, milendong aser iba atema oset, aser liangmesen tenladak,

²⁸tarongba tenla sabang aser idakji aliba marok-enrok, aser tamentakdak item ajak nung mezütsü asoshi nai aji amshiang.

²⁹Aji ajak dang temeshitiba asütsü asoshi nai itemji meshiteta yuang, aser item dak kechi agisa kongshidir itemjia temeshi alitsü.

³⁰“Aron aser pa jabasotem putir mapa inyakdaktsütsü asoshi nai parnok dak totzü mezüja meshitetang.

³¹Aser Israel nunger dang ya shiang, ibai kü madang nenok putusa putu asoshi temeshi temezüba totzü alitsü.

³²Ibai nisung mashi-i temang nung meshiloktsütsüla, aser ibai mesüka nenoki kecha meyoktepa meyanglutsüla. Ibai temeshi lir aser ibai dang temeshi alitsü.

³³Shibaisa iba mesüka meyoktepdir mesüra shibaisa ibai bendanger dak enloktsüdir, pa pei nübur nungi leptoktsü.”

³⁴KIBUBAi Mosa dang ashi, “Nai teronem tajung, stakte aser onika, aser galbanum bena arung; liangmesen temeja teronem menemtsü; aser ibaji shia touzük kasa alitsü;

³⁵aser ibaji teronem menemba yangluri yangluba ama metsü enoka, temeja aser temeshi nai iba jagi yangluang:

³⁶aser aji karbo anüka menüngsar sentep süki nung Ozüng Süngden tsüngdang yujang, yangji ni ne den ajuruteptsü, aji na asoshi temeshitiba alitsü.

³⁷Aser teronem koba nai yangludir, iba meyoktepba amaji nai pei asoshi meyanglutsüla: aji KIBUBA asoshi ne dang temeshi alitsü.

³⁸Shibaisa ibaji mesüka temenemtsü yangludir, pa pei nübur nungi leptoktsü.”